Бзылъфыгъэу сабый ежэхэрэм, унагъоу кIэлэцIыкIу зэрысхэм апае ахъщэ тын зэфэшъхьафхэр къэралыгъом къетых.

ЦIыфхэм мы IэпыIэгъухэм ягъэпсын нахь IэшIэх афэшIыгъэ­ным фэшI зыкI ахъщэ тын афэ­кIоным фэгъэхьыгъэ унашъо аштагъ. Илъэсэу къихьагъэм ищылэ мазэ и 1-м къыщыублагъэу ащ кIуачIэ иIэ хъугъэ. ЗыкI ахъщэ тыным ПенсиехэмкIэ фондыр ары фагъэзэгъагъэр, джы УФ-м и Социальнэ фонд ахэр щагъэпсых.

Фондым и Къутамэу АР-м щыIэм ипресс-къулыкъу тызэрэщигъэгъозагъэмкIэ, зыкI ахъщэ тыным къыхиубытэхэрэр сабый ежэрэ бзылъфыгъэу, жьэу учетым хэуцуагъэхэмрэ зыныбжь илъэс 17-м шIомыкIыгъэу кIэлэцIыкIу е зихэхъогъу зиIэ ны-тыхэмрэ.

ЗыкI пособием хагъэхьагъэх сабый ежэрэ бзылъфыгъэхэм афагъэнэфэгъэ пособиер, кIэ­лэцIыкIу къызфэхъугъэхэм ащ ыныбжь илъэси 3 охъуфэкIэ къаратырэр, ящэнэрэ е ащ къы­кIэлъыкIорэр къызфэхъугъэхэм апае пособиер, илъэси 3 — 7 ыкIи илъэси 8 — 17 зыныбжь кIэлэцIыкIу е зихэхъогъу зиIэ унагъохэм афагъэнэфагъэр.

Социальнэ фондым и Къутамэ пособиехэм ягъэпсын пае лъэIу тхылъхэр илъэсэу къихьагъэм ищылэ мазэ и 9-м къыщегъэжьагъэу ештэх. Нахьыбэхэм электроннэ шIыкIэм тетэу ахэр атых. Арэу щытми, тхьапэм тет шIыкIэри къэнэжьыгъ. Пресс-къулыкъум къызэрэщыхагъэщыгъэмкIэ, фондым икъулыкъоу цIыфхэм Iоф адэзышIэрэм е МФЦ-м ­уякIуалIэми, тхылъыр пIахыщт.

Унагъом гъотэу иIэр ащ ис пэпчъ тегощагъэмэ, зы нэбгырэм тефэрэр цIыфыр зэрыпсэун ылъэкIыщт ахъщэ анахь макIэу шъолъырым щагъэнэфагъэм фэдиз мыхъурэмэ, кIэлэцIыкIу­хэм апае агъэнэфэгъэ пособиер ыгъэпсын фит. КъыфэкIощтыр кIэлэцIыкIур зэрыпсэун ылъэ­кIыщт ахъщэ анахь макIэм, АдыгеимкIэ ар сомэ 12415-рэ мэхъу, ызыныкъом, ипроцент 75-м е проценти 100-м фэд­изыщт.

Сабый ежэрэ бзылъфыгъэхэм афагъэнэфагъэр цIыфыр зэры­псэун ылъэкIыщт ахъщэ анахь макIэм, тиреспубликэкIэ ар сомэ 13476-рэ, ипроцент 50, 75-м е 100-м афэдиз.

Хэбзэгъэуцугъэм къызэрэдэлъытагъэмкIэ, унагъом кIэлэцIыкIоу е зихэхъогъоу ис пэпчъ по­собие фагъэнафэ. Гъотэу яIэр агъэунэфыным пае, ахъщэ тыныр зыщагъэнэфэщт уахътэм нэс къы­далъытэ. ГущыIэм пае, лъэIу тхылъыр гъэтхэпэ мазэм аIэкIэ­хьагъэу, ащ къыпкъырыкIыхэзэ къалъытэмэ, мэзаем ахъ­щэу уна­гъом къыфэкIуагъэри хагъэ­хьащт.

Унагъоу мы ахъщэ тынхэм ащыщ къызфакIохэрэр, илъэсэу къихьагъэм ищылэ мазэ и 1-м нэмысэу сабый къызфэхъугъэхэр игъорыгъоу зыкI ахъщэ тыным техьажьынхэм фэшI, ыпэкIэ щы­Iэ­гъэ шапхъэхэм атетэу къаратыщтмэ хьауми зыкI пособиер нахьышIоу алъытэмэ ежь-ежьырэу къыхахын амал араты.