Урысыем иархитекторхэм я Союз ишъолъыр къутамэ зызэхащагъэр илъэс 25-рэ зыщыхъурэм ехъулIэу Адыгеим иархитектор ныбжьыкIэхэм япроектхэм якъэгъэлъэгъон республикэм исурэт къэгъэлъэгъуапIэ къы­щызэIуахыгъ. АР-м и ЛIышъхьэу КъумпIыл Мурат IофшIагъэу къырахьылIагъэхэм нэIуасэ зафишIыгъ, архитектор ныбжьыкIэхэм адэгущыIагъ.

Iофтхьабзэм хэлэжьагъэх АР-м ифедеральнэ инспектор шъхьаIэу Сергей Дрокиныр, АР-м культурэмкIэ иминист­рэу Аулъэ Юрэ, архитектурэмкIэ ыкIи къэлэгъэпсынымкIэ Комитетым итхьаматэу Зезэрыхьэ Азэмат, Урысыем иархитекторхэм я Союз и Адыгэ шъо­лъыр къутамэ итхьаматэу Галина Ирхинар, сурэт къэгъэлъэгъуапIэм ипащэу Бырсыр Абдулахь.

Галина Ирхинам зэрэхигъэунэфы­кIыгъэмкIэ, IофшIэгъэ 40-м ехъу къэгъэ­лъэгъоным къырахьылIагъ. Архитектор ныбжьыкIэхэми, IэпэIэсэныгъэшхо зиIэ архитекторхэми япроектхэр ахэм ахэлъых.

Проект анахь гъэшIэгъонхэм ащыщхэр пхыращынэу рахъухьэ. Экспозициер зы­кIагъэхьазырыгъэр республикэм исхэр архитектурэмкIэ ыкIи къалэм изэтегъэпсыхьанкIэ проектыкIэу щыIэхэм нэIуасэ афашIынхэр, Краснодар — ­Мые­къуапэ — Налщык къызэлъызыубытыщтхэ архитектурэ къэгъэлъэгъоным ипро­ект хэлэжьэнхэр ары.

Республикэм ипсэолъэ ин заулэу агъэкIэжьыщтым е агъэпсыщтым яэс­кизхэр цIыфхэм зэрагъэлъэгъун алъэ­кIыщт. Ахэм ахэхьэх искусствэхэмкIэ кIэлэцIыкIу еджапIэр, Мыекъуапэ иперинатальнэ гупчэ, республикэ диагностическэ гупчэр, спортымкIэ Унэшхоу Кобл Якъубэ ыцIэ зыхьырэр, цIыфхэм япсауныгъэ зыщагъэпытэрэ физкультурэ комплексэу «Ошъутен» зыфиIорэр ыкIи нэмыкIхэр. IофшIагъэхэм ащыщыбэ Санкт-Петербург ыкIи Къырым икъалэу Саки афэгъэхьыгъ.

Республикэм и ЛIышъхьэ Iофтхьабзэм хэлажьэхэрэм шIуфэс къарихыгъ, архитектор сэнэхьатым уасэу фашIырэр къэIэтыгъэным, ныбжьыкIэхэм а сэнэ­хьатым анаIэ къытырадзэным мэхьанэшхо зэриIэр хигъэунэфыкIыгъ.

Мы аужырэ илъэсхэм проект гъэшIэгъон пчъагъэ республикэм щагъэцэкIагъ. Псэуалъэхэм якIо­лIэгъошIоу щытыныр, ахэм федэ къахьыныр шэпхъэ шъхьа­Iэхэм ащыщых. Ау псэуалъэм нэри егупсэфылIэн, тиреспубликэ илъэ­гъупхъэ чIыпIэу ар хъун фае. Пэрыт технологиехэм арыгъозэрэ, ти­псэупIэхэм ятеплъэ на­хьышIу зышIын, агу етыгъэу Iоф зышIэн зылъэ­кIыщт ныбжьыкIэхэм бэкIэ тащэгугъы», — къыIуагъ КъумпIыл Мурат.

Къэгъэлъэгъоныр къызызэIуахыгъэ мафэм архитектор ныбжьыкIэхэу Ацумыжъ Мадинэ, Бэрзэдж Фатимэ, Ксения Ир­хинам, Хъурэтэ Суандэ Урысыем иархитекторхэм я Союз зэраштагъэхэр къэзыушыхьатырэ тхылъхэр аратыжьыгъэх.

Республикэм и ЛIы­шъхьэ Урысыем иархи­текторхэм я Союз хагъэ­хьагъэхэм къафэгу­шIуагъ, тапэкIи яIофшIэн гъэхъагъэхэр щашIынэу къафэлъэIуагъ. Къэгъэ­лъэгъоным къырахьылIэгъэ Iоф­шIэгъэ заулэхэмкIэ КъумпIыл Мурат проектхэр зэхэзгъэуцуагъэ­хэм еплъыкIэу иIэмкIэ адэгощагъ.

Республикэм ипащэ джащ фэдэу республикэм исурэтышIхэу портретхэр зышIыхэрэм якъэгъэлъэгъонэу сурэт къэгъэлъэгъуапIэм щыкIорэми нэ­Iуасэ зыфишIыгъ. ЖивописымкIэ, графикэмкIэ, декоративнэ-прикладной искусствэмкIэ IофшIэгъэ 70-рэ фэдиз, профессиональнэ сурэтышIхэм яскульптурэхэр ащ къыщагъэлъагъох.

АР-м и ЛIышъхьэ ипресс-къулыкъу Сурэтхэр: А. Гусев.