Адыгеим и ЛIышъхьэу КъумпIыл Мурат Адыгэ Республикэм и Къэра­лыгъо филармоние къыпэIулъ чIыналъэм изэтегъэпсыхьан фэгъэхьыгъэ IофшIэгъу зэIукIэгъур зэрищагъ.

Джащ фэдэу Iофтхьабзэм хэлэжьагъэх АР-м культурэмкIэ иминистрэу Аулъэ Юрэ, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэрэ гуадзэу Лафышъ Рэмэзан, Мыекъуапэ имэрэу Геннадий Митрофановыр, АР-м и Къэралыгъо филармоние игенеральнэ пащэу Къулэ Мухьа­мэд, муниципальнэ образо­ваниеу «Къалэу Мыекъуапэ» ар­хитектурэмкIэ ыкIи къэлэ­гъэпсынымкIэ игъэIорышIапIэ ипащэ игуадзэу Ацумыжъ Мадинэ.

Мыекъуапэ икъулыкъухэмрэ иадминистрациерэ япащэхэм зыгъэпсэфыпIакIэм изэтегъэпсыхьан телъытэгъэ проектымкIэ предложениехэу АР-м и ЛIышъхьэ зыхэплъэщтхэр зэIу­кIэгъум къащыхалъхьагъэх. Ар­хитектурэм ылъэныкъокIэ проектэу рахъухьагъэхэм игъэкIотыгъэу ахэплъагъэх, гъэтэрэзыжьын заули ахэм афашIыгъ.

«Республикэм и Къэралыгъо филармоние мэхьанэшхо зиIэ псэуалъ. Адыгеим икультурнэ щыIэныгъэ епхыгъэ Iофтхьэбзабэ мыщ щагъэцакIэ. Ежь унэри, ащ къыпэIулъ пчэгури культу­рэмкIэ мы учреждениеу мэхьа­нэшхо зиIэм диштэнхэ фае. Пчэгоу агъэкIэжьырэр Мые­къуапэ игупчэу нахь зэтедгъэ­псыхьэрэм иархитектурнэ ансамблэ изы Iахьэу хъущт. Ныбжь зэфэшъхьафхэр зиIэ къэлэдэсхэм языгъэпсэфыпIэу, зекIохэмкIэ лъэгъупхъэ чIыпIэу филармонием къыпэIулъ пчэгур хъуным пае Iофышхо зэшIуахын фаеу хъущт», — къыIуагъ Адыгеим и ЛIышъхьэ.

Проектым къызэрэщыдэлъытагъэмкIэ, зыщытезекIухьащтхэ лъэсгъогухэр зиIэщт, пхъэн­тIэ­кIухэр зыдэтыщт, пчыхьэрэ зэ­пагъэнэфыщт, лъэпкъ нэша­нэхэр зиIэ пкъыгъохэр зыдэтыщт зыгъэпсэфыпIэм квадрат метрэ мин 13 иинэгъэщт.

Архитектурэ композицием игупчэу хъущтхэр сценэ шъхьэ­ихыгъэмрэ перголэ фыжьышхоу хъэренэхэр зыпышIэ­гъэщтхэмрэ ары. Ар къаухьэу сакурэ, мые чъыгхэр, багрянникыр агъэтIысхьащтых. Урамэу Победэм ылъэныкъо къэгъэгъэ гъэкIыпIэ щагъэпсыщт. Мы илъэ­сым игъэмафэ ехъулIэу IофшIэнхэр зэшIуахынхэу рахъухьэ.

Пчэгоу агъэкIэжьырэм игъэ­нэфынкIэ, филармонием къеп­хыгъэ инженер коммуника­циехэм язэблэхъункIэ, видеокамерэхэм ягъэуцункIэ, къэ­гъагъэхэмрэ куандэхэмрэ псы атекIэгъэнымкIэ, творческэ кол­­лективхэм сценэ шъхьэихыгъэм зыкъыщагъэлъэгъоным телъытэгъэ аппаратурэм игъэуцункIэ пшъэрылъ заулэ Адыгеим и ЛIышъхьэ афишIыгъ. Скве­рыкIэм итеплъэ нахь дахэ хъуным пае IофшIэнхэр игъом ыкIи дэгъоу агъэцэкIэнхэм мэхьанэшхо зэриIэр КъумпIыл Мурат шъхьафэу къыхигъэщыгъ.

АР-м и ЛIышъхьэ ипресс-къулыкъу Сурэтхэр: А. Гусев.