«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу Адыгеим икъэлэ шъхьаIэ иурамэу Чкаловым ыцIэ зыхьырэм аужырэ шапхъэхэм адиштэрэ лъэсрыкIо зэ­пырыкIыпIэ фашIыгъ. Гъогум тешIыхьэгъэ «зебрэр» мэзахэ зыхъукIэ проекторхэмкIэ къагъэнэфы. Ащ ишIуагъэкIэ, лъэсрыкIоу къытехьагъэр во­дительхэм зэхэугуфыкIыгъэу алъэгъу. Нэфрыгъуазэ зыдэщымыт урам зэхэкIыпI ар зыщагъэ­псыгъэр. Къэлэ администра-цием социальнэ интернет нэ­кIубгъохэм цIыфхэм еплъыкIэу къаратхэхэрэр къыдилъытэзэ, чIыпIэр къыхихыгъ. Мы районым фэтэрыбэу зэхэт ыкIи ад­министративнэ унэхэр, медицинэм епхыгъэ учреждениехэр бэу итых, цIыфэу щызэ­блэ­кIырэри макIэп. ГъогурыкIоныр щынэгъончъэ шIыгъэн зэрэфаер икIыгъэ илъэ­сым истатистики къеушыхьаты. Нэфрыгъуазэ зыдэщымыт чIыпIэхэм гъогур ащызэпызычырэ лъэсрыкIуабэ гъогу хъугъэ­-шIагъэхэм ахэфагъэх, ахэкIодагъэх е шъобжхэр ахахыгъ. ГИБДД-м и Мыекъопэ отдел ипащэ игуадзэу Александр Выходцевым къызэриIуагъэмкIэ, 2022-рэ илъэсым лъэсрыкIохэр зыхэфэгъэхэ хъугъэ-шIэгъэ 52-рэ къэлэ шъхьаIэм щагъэунэфыгъ. Ахэм ащыщэу 32-мкIэ нэфрыгъуазэ зыдэщымыт чIыпIэм гъогур щызэпачыщтыгъ. ГухэкIми, нэбгыритф ахэм ахэ­кIодагъ. Къыхэдгъэщымэ тшIоигъор урамэу Чкаловым ыцIэ зыхьырэм зэпыры­кIыпIэр зыща­гъэпсыгъэм ыуж зыпари хъу­гъэ-шIагъэ зэрэ­щымыхъугъэр ары. Мы псэуа­лъэм шIуагъэу къытыгъэр зэфихьысыжьынышъ, ар игъоу щытмэ теубытагъэ хэлъэу къэзыIощтыр ащ игъэфедэн пылъ пIалъэр зыте­кIырэм ыуж ко­миссиеу еплъыщтыр ары.