2023-рэ илъэсым иапэрэ мазэ фабэу ыкIи гъушъэу икIыгъ, ау къихьагъэм ом изытет зыпкъ итыщтэп.

ГурытымкIэ жьым хэт температурэр илъэсыбэхэм ащы­Iэгъэ шапхъэхэм градуси 2-кIэ ашъхьадэкIыгъ. Температурэр зыпкъ итыгъэп. Мазэм къыкIоцI фабэр градус 18-м ыкIи чъыIэр градус 13-м анэсэу, къыгъэщтэу къыхэкIыгъ. Щылэ мазэм ощх-осэу къехыгъэр шап­хъэу щыIэхэм анахь мэкIагъ. Зы мафэ горэ къыхэкIыгъ ощ­хым ыуж ос цIынэр къыкIэ­лъыкIуагъэу. Метеостанцием зэ­ригъэунэфыгъэмкIэ, илъэсыбэхэм щыIэгъэ къэгъэлъэгъонхэм ягъэпшагъэмэ, щылэ мазэм ощх-осэу къехыгъэр процент 18 — 49-рэ фэдиз. Щылэ мазэм ом зыпари щынагъо къызди­хьыгъэп.

Непэ кIымафэм иаужырэ ма­­зэ къехьэ. ЛатиныбзэкIэ «фев­­ралым» къикIырэр зыгъэ­къэ­бзэжьыныр ары. Ижъырэ Урысыем мы мазэм илъэсыр зэфишIыжьыщтыгъ, ащ къыхэкIэу «меженькIэ» еджэщтыгъэх. Тэ тикъыблэ лъэныкъокIэ мэзаем зэреджэхэрэр «ветродуй». Ма­фэм нэфынэу щыIэм хахъозэ джы лъыкIотэщт, сыхьатитIу фэ­диз мэзаем икIыхьагъэ хэ­хъощт, ащ къыхэкIэу тыгъэри нахьыбэрэ къепсыщт.

ГидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым тызэ­рэщигъэгъозагъэмкIэ, мэзаем температурэу щыIэщтыр зыпкъ итыщтэп. Мазэм къыкIоцI арк­тикэ жьы чъыIэр, джащ фэдэу средиземноморскэ лъэныкъом къикIырэ фабэр къыхьыщт. Мы аужырэ илъэс 80-м мэзэе мазэр нахь чъыIэу къызщыхэкIыгъэр 1950-рэ илъэсыр ары, чъыIэу градус 31,6-рэ агъэунэфыгъагъ. Анахь фабэу къызщыхэкIыгъэр 2016-рэ илъэ­сыр ары, ащыгъум градус 24-рэ агъэунэфыгъагъ.

Мэзэе мазэм ом изытет зы шапхъэм итыщт, ощх къещхыщт, нэужым ос цIынэр къыкIэлъыкIощт. ГурытымкIэ мазэм къыкIоцI температурэр ыкIи ощх-осэу къехыщтыр шапхъэхэу щыIэхэм анахь мэкIэщт. Къушъхьэхэм ыкIи ащ къапыщылъ чIыпIэхэм осыр инэу къаще­сыщт, ащ къыхэкIэу ос зэхэлъыр къецохъохыным ищынагъо щыIэщт. КъызыщыучъыIырэ уахътэм мылыр чъыгхэм ыкIи электрорыкIуапIэхэм апишIы­хьащт. Ошъуапщэу, гъогухэр цIэн­лъагъоу къыхэкIыщт. Къушъхьэхэм лъэшэу ос къащесыщт. Жьыбгъэр нэгъэупIэпIэгъум метрэ 15-м ехъоу къепщэщт.

Апэрэ мэфипшIыр. Чэщым чъыIэр градуси 4 фэдизыщт, къыхэкIыщт чъыIэр градус 12-м зыщынэсыщтри. Мафэм чъыIэр градуси 3-м, фабэр гра­дуси 2-м кIахьэуи къыхэ­кIыщт.

ЯтIонэрэ мэфипшIыр. Чэщ­хэр чъыIэщтых градуси 5 — 13-м нэсэу, мафэхэм фабэр гра­дуси 8-м зыщынэсыщтхэри къыхэ­кIыщт.

Ящэнэрэ мэфипшIыр. Мэзаем икIэухым ом изытет нахь къэу­чъыIыщт. Чэщым чъыIэр гра­дуси 10-м, мафэм чъыIэр гра­дуси 5-м анэсыщт. Къыхэ­кIы­щтых мафэхэр фабэхэу, гра­­дуси 9-м кIахьэу.

Къушъхьэхэм температурэр градуси 6 — 8-кIэ нахь ащы­чъы­Iэщт.

Мы мазэм бжыхьасэхэм чъы­Iэр къягоощтэп.

Псыхъохэм адэт псыр шап­хъэу щыIэхэм ашIокIыщтэп. Къушъхьэхэм ателъ осыр къыз­щигъэжъурэ уахътэм ыкIи лъэ­­шэу къызещхырэм, псыхъо­хэм адэт псыр къыдэкIоещт.

КIАРЭ Фатим.