Мыекъопэ къэлэ администра­цием культурэмкIэ и ГъэIоры­шIапIэ зэхищэгъэгъэ зэнэкъокъоу «Арт-елка — 2023» зыфиIорэм икIэух культурэм и Унэу «Гигантым» щызэфахьысыжьыгъ.

ХэбзэшIу зэрэхъугъэу, мы Iофтхьабзэм изэхэщэнкIэ къотэгъу хъугъэ компаниеу «ЭкоЦентр» зыфиIорэр ыкIи экологи­ем ишапхъэхэм анахь адиштэхэу къыхахыгъэ елкэхэр зиIэшIа­гъэхэм шIухьафтынхэр аритыгъэх.

ГъэIорышIапIэм къызэритыгъэмкIэ, «Елочка — символ года», «Техно-елка», «Елочка в национальном стиле» зыфиIорэ лъэныкъохэмкIэ IофшIэгъэ 432-рэ къырахьылIагъ. Мыекъопэ, Красногвардейскэ, Шэуджэн, Кощхьэблэ ыкIи Джэджэ районхэм, къалэу Мыекъуапэ якIэлэеджакIохэр ары хэлэжьагъэхэр.

ООО-у «ЭкоЦентр» зыфи­Iорэм и Адыгэ шъолъыр къутамэ ипащэу Алыбэрд Налбый жъы хъугъэ пкъыгъохэр чIамы­дзыжьхэу, джыри зэ «псэ къызэрапагъэкIэжьыгъэм», твор­ческэу а Iофыгъом къызэрекIолIагъэхэм пае кIэлэ­еджакIоу хэлэжьагъэхэм, ахэм якIэлэегъаджэхэм, янэ-ятэхэм зэрафэразэр ипсалъэ къыщыхигъэщыгъ, зиIофшIагъэ анахь гъэшIэгъонэу алъытагъэхэм шIухьафтынхэр аритыжьыгъэх.

Шъолъыр операторым къыхигъэщыгъэх кинотеатрэм зэкIом натрыф гъэтIыпIагъэу (попкорн) къыщэфыгъагъэм щыщэу къэнагъэм елкэ хэзышIыкIыгъэу Валерия Якимцовар, хы хьамлашкIор елкэ зышIыгъэ Аделина Новиковар ыкIи чэтыц фыжьым хишIыкIи илъэсыкIэм итамыгъэ чъыг дахэ зышIыгъэ Диана Рябоконь.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.