Урысыем ибанк анахь инхэм ащыщэу «Сбербанкым» ипроектэу «искус­ственнэ интеллектым» иамалхэр агъэфедэзэ къаугупшысыгъэ оборудование медицинэм IэкIэгъэхьэгъэным тегъэпсыхьагъэм къызэрэдыхэлъытагъэу, Мыекъо­пэ къэлэ псэупIэ коим хэхьэрэ станицэу Ханскэм иIэзапIэ псэо­лъа­кIэ къыфащэфыгъ.

Банкым ипресс-къулыкъу къызэ­ритыгъэмкIэ, «телекардиографым» пэIудзыгъэ шIыкIэм тетэу цIыфым ыгу ыкIи илъынтфэхэм язытет еплъынхэу врачхэм амал къареты. Ащ ишIуагъэкIэ гу-лъынтфэ системэм зэхъокIыныгъэу фэхъугъэ­хэр игъом къыхагъэщынхэ, ЭКГ-м къыгъэлъэгъуагъэм охътабэ темы­шIэу «еджэнхэ» алъэкIы, шъолъыр сымэджэщхэм ахэр афегъакIохэшъ, сымаджэм узэреIазэмэ нахьышIур ащ иврачхэм къагъэнафэ. «Телекардиографым» цифрэ шIыкIэм тетэу гъэпсыгъэу «хъарзынэщ» иI, нахьыпэкIэ цIыфым ыгу е илъынтфэхэр зауплъэкIухэм къыгъэлъэ­гъогъагъэр ащ къытенэжьы.

Сбербанкым и Адыгэ шъолъыр Къутамэ ипащэу ДышъэкI Асхьад псэуалъэу къащэфыгъэр Ханскэм иIэзапIэ иврач шъхьаIэу Нартыкъо Ларисэ ритыгъ.

— Адыгеим иэкономики, социаль­нэ лъэныкъоми цифрэ шIыкIэр нахьыбэу ащыгъэфедэгъэным пащэхэр лъэшэу ыуж итых. Псауныгъэм икъэухъумэн исистеми ахэм ауж къимынэным анаIэ тет. Шъо­лъыр пащэхэмрэ «Сбербанкымрэ» зэдыпхыращырэ проектхэм яшIуагъэкIэ, цIыфэу республикэм исхэм медицинэ IэпыIэгъур нахь къызIэкIэгъэхьэгъошIу афэхъу. «Теле­кардиографыр» врачхэм яIофшIэн къызэригъэпсынкIэщтым, гум ыкIи лъынтфэхэм язытет изэгъэшIэн на­хьышIу къызэришIыщтым сицыхьэ телъ, — къыIуагъ ащ.