Къэлэ паркым чъыгхэр зэрэщыраупкIырэр къырамыгъэкIоу Мыекъуапэ дэсхэм мы аужырэ мафэхэм тхыгъабэ къытIэкIагъэхьагъ.

Къэлэдэсхэр зыгъэгумэкIырэр паркым чъыгэу дэтыр нахь макIэ зэрэхъурэр ары.

Мыекъуапэ имэрэу Геннадий Митрофановым къызэрэзэхи­фыгъэмкIэ, джыдэдэм паркым щыраупкIыхэрэр чъыгыжъхэу къэлэдэсхэм къатеукIорэен зы­лъэкIыщтхэр ары. Мэзым икъэу­хъумэн фэгъэзэгъэ гупчэм испе­циалистхэм ащ дэт чъыгхэр зэкIэ ауплъэкIугъэх ыкIи актхэр зэхагъэуцуагъэх.

— ЧъыгыкIэхэр гъэтIысхьажьыгъэнхэр Адыгэ Республикэм и ЛIышъхьэу КъумпIыл Мурат къы­гъэнэфэгъэ пшъэрылъ шъхьа­Iэхэм зэу ащыщ. ГъэрекIо чъыг 20 къэлэ паркым щыраупкIы­гъагъ, ахэм ачIыпIэ чъыг ныбжьыкIэ 900-м ехъу агъэтIыс­хьа­жьыгъ. Мыгъи Пушкиным ыцIэ зыхьырэ урамым щыраупкIыгъэ чъыгхэм ачIыпIэ чъыги 100 агъэ­тIысхьажьыщт, — къыIуагъ Геннадий Митрофановым.

Ащ зэрэхигъэунэфыкIыгъэмкIэ, зигъэчэрэгъузэ чъыгхэм псы атезыкIэрэ оборудованиер паркым ичIыпIакIэу агъэпсыгъэми, Мыекъуапэ иобщественнэ чIыпIэхэу зэтырагъэпсыхьажьы­гъэхэми ащагъэфедэ.