Адыгэ Республикэм ибюджет къи­кIэу зэтыгъо ахъщэ тынэу гъот макIэ зиIэ унагъохэм, зизакъоу псэухэрэм, чIыпIэ зэжъу ифагъэхэм аратырэм щылэ мазэм и 18-м къыщегъэжьа­гъэу хагъэхъуагъ.

Ащ пае зэтыгъо къэралыгъо социальнэ ахъщэ IэпыIэгъоу АР-м ибюджет къикIырэм фэгъэхьыгъэ Унашъоу щыIэм зэхъокIыныгъэхэр фашIыгъэх.

МашIохэм, тхьамыкIагъоу къэхъухэрэм зизэрар зэкIырэ цIыфхэм къэралыгъо социальнэ IэпыIэгъоу аратыщтыгъэр сомэ мин 20 хъущтыгъэмэ, джы ар сомэ мин 50-м нагъэсыгъ. Унагъор зыпшъэ дэлъыгъэ цIыфыр щымыIэжь хъумэ, унэм епхыгъэ гъэцэкIэжьынхэм апэIуагъэ­хьанэу аратырэми хэхъуагъ, ар зэрэ­хъугъэр сомэ мин 50.

Iэзэгъу уцхэм язэгъэгъотын, медицинэм епхыгъэ пкъыгъохэм якъэщэфын, сымэджэ хьылъэм хэушъхьафыкIыгъэ шхынэу ратырэм изэгъэгъотын, ар операцие ужэу е медицинэ учреждением чIэлъэу щытмэ, ащ фэдэ Iофыгъохэм апае сомэ мини 7 атыщтыгъэмэ, джы ари сомэ мини 10 хъугъэ.

АР-м псауныгъэр къэухъумэгъэнымкIэ и Министерствэ нэмыкI шъолъырым щагъэхъужьынэу е илажьэр щагъэунэфы­нэу сымаджэр ыгъэкIуагъэмэ, IэпыIэ­гъоу ащ фэдэ сымаджэм ыгъэкIодыгъэ ахъщэм щыщэу сомэ мини 10-м фырагъэгъэзэ­жьыщт, тапэкIэ ар сомэ мини 7 зэрэхъу­щтыгъэр; Краснодар краим исымэ­джэщмэ ащагъэхъужьынэу агъэ­кIуагъэм со­мэ мин 15 къыратыжьыщт, тапэкIэ ар минипшIыгъ; УФ-м инэмыкI шъолъыр­хэмкIэ агъэнэфагъэр сомэ мин 50-м нэсыгъ, зэрэхъущтыгъэр сомэ мин 20.

Зигугъу къэтшIыгъэмэ анэмыкIэу, со­циальнэ IэпыIэгъоу щыгъыным, гъомылапхъэм, пхъэм, Iэзэгъу уцым якъэщэфын апэIуагъэхьанэу атыщтыр сомэ мини 3, тапэкIэ зэрэхъущтыгъэр сомэ мини 2, ар унагъом Iоф зышIэн зымы­лъэкIэу зы нэбгырэ исэу щытмэ; сомэ мини 5 аратыщт Iоф зышIэн зымылъэкIэу нэбгыритIу унэм исмэ; мини 10-р Iоф зышIэн зымылъэкIэу нэбгырищ е на­хьыбэ унэм исмэ.