Адыгэ Республикэм хэгъэгу кIоцI IофхэмкIэ и Министерствэ иколлегие игъэкIотыгъэ зэхэсыгъо иIагъ. 2022-рэ илъэсым къулыкъум Iофэу ышIагъэр ащ щызэфахьысыжьыгъ.

Зэхэсыгъом хэлэжьагъэх Адыгэ Рес­публикэм и ЛIышъхьэрэ министрэхэм я Кабинетрэ я Администрацие ипащэу Владимир Свеженец, Къэралыгъо Советым – Хасэм и Тхьаматэу Владимир Нарожнэр, федеральнэ инспектор шъхьа­Iэу Сергей Дрокиныр, Адыгэ Респуб­ликэм и Апшъэрэ хьыкум итхьаматэу Шумэн Байзэт, Адыгеим ипрокурорэу Игорь Шевченкэр, республикэм ихэбзэухъумэкIо къулыкъухэм япащэхэр.

Iофтхьабзэр къызэIуихыгъ Адыгеим хэгъэгу кIоцI IофхэмкIэ иминистрэу, полицием игенерал-майорэу Олег Без­с­мельницыным. Пэублэм къулыкъур ахьызэ хэкIодэгъэ къулыкъушIэхэм зы такъикърэ афэшъыгъуагъэх ыкIи АР-м и МВД административнэ унэу хэтым гъэрекIо къыщызэIуахыгъэ мыжъо пхъэм­бгъум къэгъэгъэ блэрыр кIэралъхьагъ.

Министрэм ипэублэ гущыIэ къыщи­Iуагъ общественнэ зэфыщытыкIэхэм япхыгъэ хабзэхэр мыукъогъэнхэмкIэ пшъэрылъхэр икъоу республикэм зэрэщагъэцакIэхэрэр. Къыблэ федеральнэ шъолъы­рымрэ Урысыемрэ ялъытыгъэмэ, гурытымкIэ бзэджэшIагъэу республикэм щызэрахьагъэр нахь макI. Джащ фэдэу Олег Безсмельницыным къыIуагъ мы илъэсым къыщегъэжьагъэу Адыгеим иполицие ичIыпIэ отделэу зиIофшIэнкIэ нахь къахэщыгъэхэм зэIэпахырэ кубокыр ыкIи быракъыр афагъэшъуашэзэ ашIынэу зэрэрахъухьагъэр. БлэкIыгъэ илъэсым изэфэхьысыжьхэмкIэ, апэрэ чIыпIэр фагъэшъошагъ Урысыем и МВД иотделэу Мыекъопэ районым щыIэм, ащ ипащэр полицием иполковникэу ШъхьэхъутIэ Айдэмыр.

Адыгэ Республикэм хэгъэгу кIоцI IофхэмкIэ и Министерствэ иштаб ипащэу, къулыкъум иполковникэу Максим Черносмага икIыгъэ илъэсым Iофэу ашIагъэм къытегущыIагъ. Iофхэр нахь зыщагъэлъэшын фэе лъэныкъо заулэхэм ягугъу къышIыгъ. Пшъэрылъ шъхьаIэхэм ащыщых телефонкIэ зэрагъапцIэхэрэм, хэбзэнчъэу наркотикхэр къызэрэрагъэ­кIокIыхэрэм япхыгъэ бзэджэшIагъэхэр къегъэIыхыгъэнхэр, гъогухэм тхьамыкIагъохэр нахь макIэу атехъухьанхэмкIэ, Iэтахъохэм бзэджэшIагъэхэр зэрамы­хьанхэмкIэ ищыкIэгъэ амалхэр зехьэгъэнхэр. 2022-рэ илъэсым зэкIэмкIи бзэджэшIэгъэ 4388-рэ зэрахьагъэу АР-м щагъэунэфыгъ, 2021-рэ илъэсым егъэп­шагъэмэ, а пчъагъэр нахь макI. Къыблэ федеральнэ шъолъырым ыкIи къэралыгъом зэрэпсаоу ягъэпшагъэмэ, нэбгырэ мини 100-м телъытагъэу Адыгеим щызэрахьэгъэ бзэджэшIагъэхэм япчъагъэ бэкIэ нахь макI.

БлэкIыгъэ илъэсым тиреспубликэ икриминогеннэ зытет зыпкъитыныгъэ иIагъ. Общественнэ чIыпIэхэм нахь ма­кIэу бзэджэшIагъэ ащызэрахьаным ылъэ­ныкъокIэ Урысыем ишъолъырхэр пштэмэ, Адыгеим ятIонэрэ чIыпIэр ыIыгъ.

Гъэлъэшыгъэ шIыкIэм тетэу анаIэ зытырагъэтыгъэхэм ащыщ бзэджэшIэгъэ хьылъэу зэрахьэхэрэм ыкIи къэбар-телекоммуникационнэ технологием ылъэныкъокIэ хэбзэгъэуцугъэр зэраукъорэм епхыгъэ пэшIорыгъэшъ Iофтхьабзэхэр зэхэщэгъэнхэр.

2022-рэ илъэсым къулыкъум иподразделение наркотикым епхыгъэ бзэджэшIэгъэ 258-рэ къычIигъэщыгъ. Хэбзэнчъэу къырагъэкIокIыгъэ наркотик зы­хэлъ вещество килограмм 60 къаIахыгъ. 2022-рэ илъэсым Адыгэ Республикэм гъогу хъугъэ-шIагъэу къыщыхъугъэхэм ыкIи ахэм ахэкIодагъэхэм япчъагъэ къыщыкIагъ.

АР-м и ЛIышъхьэу КъумпIыл Мурат ыцIэкIэ Владимир Свеженец ведомствэм ипащэ ыкIи министерствэм икъулыкъу­шIэхэм оперативнэ-къулыкъу IофшIэныр щытхъу хэлъэу зэрагъэцакIэрэм, гъэцэ­кIэкIо хэбзэ къулыкъухэм аIэ зэкIэдзагъэу зэрадэлажьэхэрэм фэшI ирэзэныгъэ гущыIэхэр апигъохыгъэх. Ащ зэрэхигъэунэфыкIыгъэмкIэ, цIыфхэр щынэгъончъэу псэунхэм, рэхьатныгъэр рес­публикэм къыщыухъумэгъэным апае хабзэм игъэцэкIэкIо къулыкъухэмрэ АР-м хэгъэгу кIоцI IофхэмкIэ и Министерствэрэ язэдэлэжьэныгъэ урыгушхонэу щыт. Республикэм къэралыгъо гъэпсыкIэ иIэ зыхъугъэр гъэрекIо илъэси 100 зэрэхъугъэм фэгъэхьыгъэ Iофтхьабзэу зэхащагъэхэм цIыфхэм яхэбзэ рэхьатныгъэ къэухъумэгъэнхэмкIэ къулыкъу­шIэхэм яIофшIэн щытхъу хэлъэу зэрагъэцэкIагъэр шIукIэ къафилъэгъугъ.

«Шъуиведомствэ хэбзэухъумэкIо къу­лыкъухэми, хабзэм икъулыкъухэми зэдэлэжьэныгъэ пытэ адыриI. Щынэгъон­чъэным епхыгъэ IофыгъохэмкIэ тIэ зэкIэдзагъэу зэкIэми тызэдэлажьэ. Та­пэкIи цIыфхэр щынэгъончъэу щыIэнхэмкIэ ищыкIагъэр икъоу шIэгъэн фае», — хигъэунэфыкIыгъ В. Свеженец.

ТелефонкIэ зэрагъапцIэхэрэм пэуцужьыгъэнымкIэ цIыфхэм адэгущыIэнхэ фаеу ащ ылъытагъ. ЯIофшIэнкIэ анахьэу анаIэ зытырагъэтыщт лъэныкъохэр терроризмэмрэ экстремизмэмрэ апэуцужьыгъэныр, хэбзэнчъэу наркотикхэр зэрагъэ­зекIохэрэм, экономическэ бзэджэшIагъэхэм, къолъхьэ тын-Iыхыным ябэныгъэ­ныр ары.

Къэралыгъо фэIо-фашIэхэр нахьышIоу гъэцэкIэгъэнхэ, участковэхэм яIофшIэн хэбзэ икъу хэлъхьэгъэн зэрэфаем зэхэ­сыгъом хэлэжьагъэхэм В. Свеженец анаIэ тыраригъэдзагъ. Хэбзэукъоныгъэу алъэгъухэрэм афэгъэхьыгъэу цIыфхэм къэбарэу къаIэкIагъахьэхэрэм псынкIэу ахэплъэнхэ зэрэфаер къыIуагъ. Ащ зэрэхигъэунэфыкIыгъэмкIэ, цIыфхэм IэпыIэгъу зэрафэхъущтхэм сыдигъуи яцыхьэ телъын фае.

АР-м и Къэралыгъо Совет — Хасэм и Тхьаматэу Владимир Нарожнэм ежь ышъхьэкIи депутатхэм ацIэкIи АР-м хэгъэгу кIоцI IофхэмкIэ и Министерствэ шIуагъэ къытэу IофшIэныр зэригъэца­кIэрэм фэшI «тхьашъуегъэпсэу» къари­Iуагъ. Ащ зэрилъытэрэмкIэ, тапэкIи хэбзэ рэхьатныгъэр къэухъумэгъэным ыкIи гъогурыкIоныр щынэгъончъэу щытыным, Iэтахъохэм хэбзэукъоныгъэхэр амышIынхэмкIэ пэшIорыгъэшъ Iофтхьабзэу зэрахьэхэрэр гъэлъэшыгъэнхэм мэхьанэшхо яI. В. Нарожнэм зэрэхигъэу­нэфыкIыгъэмкIэ, бзэджэшIагъэхэр нахь макIэу зэрахьанхэмкIэ яшIуагъэ къэкIо хэбзэухъумэкIо къулыкъухэм, гъэсэныгъэм, культурэм, спортым афэгъэзэгъэ учреждениехэм, ныбжьыкIэ движениехэм, общественнэ организациехэм азыфагу илъ зэдэлэжьэныгъэм. АР-м и ЛIышъхьэу КъумпIыл Мурат иIэпыIэгъу къызэраригъэкIырэм ыкIи республикэм щынагъо имылъыным иIо­фы­гъохэм язэшIохын чанэу къызэрэхэла­жьэрэм афэшI зэрэфэразэр Олег Безсмельницыным къыIуагъ. Джащ фэдэу къэралыгъо хэбзэ ыкIи хэбзэухъумэкIо къулыкъухэм зэпхыныгъэ зэдыряIэу зэрэзэдэлажьэхэрэр шIукIэ къыхигъэщыгъ, шъолъырым рэхьатныгъэ илъыным­кIэ ащ мэхьанэшхо зэриIэр къыIуагъ.

ТапэкIи къулыкъум гъэлъэшыгъэу ынаIэ зытыригъэтыщт лъэныкъохэм ащыщ общественнэ щынэгъончъагъэр къэухъумэгъэныр, экстремизмэ нэшанэ зиIэ бзэджэшIагъэхэр къэмыгъэхъугъэнхэр, гъогурыкIоныр щынэгъончъэу щытыныр.

Полицием икъулыкъушIэхэу зиIофшIэн гъэхъагъэхэр щызышIыгъэхэм зэхэсыгъом тынхэр къащыфагъэшъошагъэх. Хабзэмрэ рэхьатныгъэмрэ якъэухъумэн яIахьышIу зэрэхэлъым фэшI АР-м и ЛIышъхьэ и Рэзэныгъэ тхылъ къафагъэ­шъошагъ полицием иподполковникэу Панэкъо Анзор, полицием икапитанэу Шэртэнэ Азэмат ыкIи полицием истаршэ лейтенантэу Виктория Константиновам. Джащ фэдэу IофышIэ зырызхэм АР-м и Къэралыгъо Совет — Хасэм ищытхъу тхылъхэмрэ Урысыем хэгъэгу кIоцI IофхэмкIэ иведомствэ тынхэмрэ къафагъэшъошагъэх.

КIАРЭ Фатим.