2023-рэ илъэсэу къихьагъэм кIэу къыздихьыгъэхэм ащыщ Урысые Федерацием Социальнэ фонд иIэ зэрэхъугъэр.

Ащ фэдэ къулыкъукIэ щыIэныгъэм къызэрэхэхьагъэм, пенсиехэм, страхованием афэгъэзэгъэ ведомствэхэр зэрэщымыIэжьыщтхэм цIыфхэм гумэкI къахилъхьагъ. Ащ фэшI Социальнэ фондыкIэм зэрихъокIырэм, пшъэрылъэу иIэщтхэм, цIыфхэм кIэу къафихьыгъэм защыдгъэгъозэнэу ащ и Къутамэу АР-м щыIэм зыфэдгъэзагъ.

Ащ ипресс-къулыкъу тызэрэщигъэгъозагъэмкIэ, Социальнэ фондыр кIэу агъэпсыгъэп. ПенсиехэмкIэ ыкIи социальнэ страхованиемкIэ фондхэр зэхагъэ­хьажьхи, ащ фэдэу зыкI ведомствэ щыIэ хъугъэ. ЦIыфхэм ящыкIэгъэ фэIо-фашIэхэр нахь къызIэкIэгъэхьэгъошIу афэшIыгъэныр, IофшIэпIэ чIыпIэхэр къэзытыхэрэм административнэ пшъэрылъэу атегъэуагъэр нахь мэкIэныр, шIокI зимыIэ социальнэ страхованием цIыфэу къызэлъиубытырэр нахьыбэ хъуныр ямурадэу къэралыгъом ипащэхэм мы зэхъокIыныгъэхэр къаугупшысыгъэх.

Джы пенсиехэмкIэ ыкIи социальнэ страхованиемкIэ фонд­хэм якъутамэхэу Адыгеим щыIагъэхэр Социальнэ фондым икъутамэ хъугъэх. НахьыпэкIэ мы ведомствитIум ахъщэ тынэу агъэпсыщтыгъэхэр зэкIэ Социальнэ фондым фагъэзэжьыгъэх. Нахьыпэрэм фэдэу республикэм ирайонхэмрэ къалэхэмрэ шъо­лъыр Къутамэм епхыгъэ отделэу Iоф ащызышIэхэрэм ахэр агъэ­псыщтых. СыдигъокIи зэрэщытыгъэу, цIыфхэм Iоф адэзышIэрэ къулыкъухэм пенсиехэм, ахъщэ тынхэм е социальнэ страхованием алъэныкъокIэ упчIэ зиIэу закъыфэзгъазэхэрэм джэуапхэр къаратыжьыщтых, упчIэжьэгъу къафэхъущтых.

Пресс-къулыкъум къызэритыгъэмкIэ, цIыфыр къэсымэджагъэу, охътэ гъэнэфагъэм Iоф ымышIагъэмэ, пособиеу ащ къыфэкIощтыр, «больничнэкIэ» тызаджэрэр, джы Социальнэ фондыр ары зыгъэпсыщтыр. Шапхъэу зэрагъэпсырэм ыкIи къызэратIупщырэм зэхъокIыныгъэ афэхъугъэп. КIэу мы лъэныкъом къыхэхьагъэр IофшIапIэ къэзытырэм зэзэгъыныгъэ ди­шIыгъэу Iоф зышIэхэрэми (гражданско-правовой договор) «больничнэхэр» къафэкIонхэу зэрашIыгъэр ары. 2023-рэ илъэ­сым ищылэ мазэ и 1-м къыщегъэжьагъэу ащ фэгъэхьыгъэ хэбзэгъэуцугъэм кIуачIэ иIэ хъугъэ.

Къэралыгъом ипащэхэм мурадэу зыфагъэуцужьыгъэм тетэу, Социальнэ фондыр щыIэ зэрэхъугъэм взносхэм ятынкIэ Iофхэр къыгъэпсынкIагъэх. Джы IофшIэпIэ чIыпIэхэр къэзыты­хэрэм зыкI тарифкIэ ахэр агъэ­хьыщтых ыкIи Федеральнэ казначействэм страхованиехэм ар атыригощэщт. Ащ имыза­къоу, отчетхэр тыдэкIи агъэхьыжьынхэ ищыкIэгъэжьэп.

Урысые Федерацием и Президентэу Владимир Путиныр кIэщакIо фэхъугъэу бзылъфы­гъэу сабый ежэхэрэм, унагъоу кIэлэцIыкIу зэрысхэм апае ахъщэ тын зэфэшъхьафхэр къэ­ралыгъом къетIупщых. Ахэм ягъэпсын ПенсиехэмкIэ фондыр фэгъэзэгъагъ.

ГъэрекIо, цIыфхэм ахъщэ IэпыIэгъухэм ягъэпсын нахь IэшIэх хъуным фэшI, зыкI ахъщэ тын афэкIонэу шIыгъэным фэгъэхьыгъэ унашъом Владимир Путиныр кIэтхагъ. Илъэсэу къи­хьагъэм ищылэ мазэ и 1-м къыщыублагъэу ащ кIуачIэ иIэ хъугъэ. ЗыкI ахъщэ тыным игъэ­псыни УФ-м и Социальнэ фонд фэгъэзагъ.

Пособиехэм ягъэпсын пае лъэIу тхылъхэр нахьыбэрэхэм электроннэ шIыкIэм тетэу атых. Арэу щытми, тхьапэм тет шIыкIэри къэнэжьыгъ. Пресс-къулыкъум къызэрэщыхагъэщыгъэм­кIэ, Социальнэ фондым икъулыкъоу цIыфхэм Iоф адэзы­шIэрэм е МФЦ-м уякIуалIэми, тхылъыр пIахыщт. Мы мазэм и 9-м къыщыублагъэу ахэр аштэх.

НахьыпэкIэ зэрэщытыгъэм тетэу пенсиехэри, ны мылъкум исертификати мы къулыкъум щагъэпсыщтых, пIалъэу яIагъэм тетэу къатыщтых, специалистэу Iоф зышIэщтыгъэхэри фондым ишъолъыр Къутамэ икомандэ къыхэнэжьыгъэх.

ЗэрэхъурэмкIэ, къулыкъум ыцIэ зэблахъугъэу, ащ иIофшIэн зэхъокIыныгъэхэр фашIыгъэхэми, фэIо-фашIэу агъэцакIэщтыгъэхэм къащыкIагъэп, цIыфхэмкIэ зыпари зэхъокIыгъэ хъугъэп. Ар пстэумэ анахь шъхьаI.

ХЪУТ Нэфсэт.