АР-м иобщественнэ организациеу «Урысыем иархитекторхэм я Союз» икъэгъэлъэгъон АР-м исурэт къэгъэлъэгъуапIэ къыщызэIуахыгъ. Организацием хэхьэгъакIэхэм ар къэзыушыхьатырэ тхылъхэр къаратыжьыгъэх.

Къэгъэлъэгъоным икъызэIухын ипэублэ Адыгеим иархитектор цIэрыIохэу зидунай зыхъожьыгъэхэ Кушъу Нэфсэтрэ Игорь Чудесовымрэ яшIэжь агъэлъапIэу зы такъикърэ афэшъыгъуа­гъэх. Союзым ишъолъыр къутамэ ипащэу Галина Ирхинам ипэублэ гущыIэ къызэрэщиIуагъэмкIэ, цIыфыр искусствэм нахь пэблагъэ къэс изытет нахь дэгъущт:

— Аужырэ илъэсхэм Адыгеим зэхъокIыныгъэшIухэр щэхъух: Мыекъуапэ имызакъоу, районхэми псэолъакIэхэр бэу ащашIых, псэупIэхэм ятеплъэ непэрэ уахътэм диштэу, дахэу ыкIи гу­IэтыпIэу зэтырагъэпсыхьэх. А IофшIэныр тапэкIи лъыкIотэщт. Тызэрыгушхорэ ныбжьыкIэхэр тиархитекторхэм ясатырэ къы­хэуцох. Ахэм бэкIэ тащэгугъы, сыда пIомэ псэупIэм изытет, итеплъэ цIыфым исоциальнэ зытет, иеплъыкIэхэр зэблехъух, игушъхьэбаиныгъэ къеIэты.

АрхитектурэмкIэ ыкIи къэлэгъэпсынымкIэ Мыекъуапэ и ГъэIорышIапIэ ипроекти 5 къызэ­Iуахыгъэ къэгъэлъэгъоным хэт. ГущыIэм пае, АР-м и Лъэпкъ музей итеплъэ зэхъокIыныгъэу фэхъугъэхэр, Къэралыгъо филармонием, мэзгъэхъунэ зыгъэ­псэфыпIэу Мэздахэ язытет зэблахъун зэралъэкIыщтыр къэгъэлъэгъоным къырахьылIэгъэ макет-сурэтхэм арыолъагъо. ГъэIорышIапIэм щылэжьэрэ архитектор ныбжьыкIэхэр Мые­къуапэ иархитектор шъхьаIэу Шумэфэ Сульетэ япащэу проектхэм ягъэхьазырын дэлэжьагъэх. Мэзгъэхъунэ зыгъэпсэфыпIэу Мэздахэ фэгъэхьыгъэ проектым игъэхьазырын чIыпIэхэм япсэупIэхэм хэхъоныгъэ ягъэшIыгъэнымкIэ «ДОМ.РФ» зыфиIорэ Фондым ипроектнэ отдел къыхэлажьэзэ Iоф да­шIагъ.

АрхитектурэмкIэ ыкIи къэлэгъэпсынымкIэ Мыекъуапэ и ГъэIорышIапIэ ипащэ игуадзэу Ацумыжъ Мадинэ, ГъэIорышIапIэм къэлэгъэпсынымкIэ иотдел иIофышIэ шъхьаIэу Бэрзэдж Фатимэ ыкIи архитектор шъхьафитэу Хъуратэ Суандэ АР-м иобщественнэ организациеу «Урысыем иархитекторхэм я Союз» зэрэхагъэхьагъэхэмкIэ ар къэзыушыхьатырэ тхылъхэр къэгъэлъэгъоным щаратыжьы­гъэх, сэнэхьатэу хахыгъэм гъэ­хъагъэхэр щашIынэу афаIуагъ.

Тэу Замир.