Мэзаем къахэхъощт
КъэкIощт мазэм и 1-м къыщыублагъэу хэушъхьафыкIыгъэ цIыф купхэм социальнэ ахъщэ тынэу къафакIохэрэм къахэхъощт.
Бюджетым фэгъэхьыгъэ республикэ хэбзэгъэуцугъэм къызэрэдэлъытагъэм тетэу, Адыгеим щыпсэоу ащ фэдэ ахъщэ къызэратыхэрэм проценти 6,1-кIэ индексацие афашIыщт.
Ащ фэдэ хэхъоныгъэм ишIуагъэкIэ:
1. 2004-рэ илъэсым итыгъэгъазэ и 31-м нэс ветеранхэм е ахэм арагъапшэхэрэм ахалъытагъэхэм къафэкIорэ социальнэ ахъщэ тыныр сомэ 1458,6-рэ хъущт.
2. 1941-рэ илъэсым имэкъуогъу и 22-м щыублагъэу 1945-м ижъоныгъуакIэ и 9-м нэс пштэмэ, а уахътэм къыхиубытэу мэзихым нахь мымакIэу Iоф зышIагъэхэм е Хэгъэгу зэошхом илъэхъан псэемыблэжьэу зэрэлэжьагъэхэм фэшI СССР-м иорден е имедаль къызфагъэшъошагъэхэм къаратырэр сомэ 1547,19-м нэсыщт.
3. Реабилитацием къыхиубытагъэхэм къафэкIорэ социальнэ ахъщэр сомэ 1703-м ехъущт.
4. Политическэ репрессиехэм зэрар къызфахьыгъэхэм къаратырэри ащ фэдиз хъущт.
5. «Адыгеим и Щытхъузехь» зыфиIорэ медалыр, АР-м и Къэралыгъо Совет — Хасэм ищытхъу тамыгъэу «Закон. Пшъэрылъ. ЦIыфыгъ» зыфиIорэр къызфагъэшъошэгъэ бзылъфыгъэу илъэс 20-м ыкIи хъулъфыгъэу 25-м нахь мымакIэу IофшIэгъэ илъэс зиIэхэм афагъэнэфэгъэ социальнэ тыныр сомэ 1458,6-рэ хъущт.
6. Бзылъфыгъэу илъэс 40-м къыщымыкIэу Iоф зышIагъэхэм ыкIи хъулъфыгъэу 45-м нахь мымакIэу IофшIэгъэ илъэсхэр зиIэхэми ащ фэдиз къаратыщт.