Монополием пэшIуекIогъэнымкIэ Федеральнэ къулыкъум АР-мкIэ и ГъэIорышIапIэ и Общественнэ совет кIэу хэхьагъэхэм IофшIэгъу зэ­хэ­сыгъо джырэблагъэ яIагъ.

ГъэIорышIапIэм ипащэу ХьэпэкIэ Аслъан Iофтхьабзэр ­къызэIуихызэ советым хэтхэм шIу­фэс гущыIэмкIэ закъыфи­гъэ­загъ ыкIи монополием пэшIуе­кIогъэнымкIэ шъолъыр Гъэ­Iо­ры­шIапIэм общественнэ лъыплъэным ылъэныкъокIэ иIоф­шIэн зэ­рэзэхищэрэм мэхьанэшхо зэриIэр къыхигъэщыгъ.

«Советым хэхьагъэх общественнэ IофшIэным хэшIыкIышхо фызиIэ цIыфхэр ыкIи ащ къыхэкIэу япшъэрылъхэм язэшIохынкIэ гъэхъагъэхэр ашIызэ Iоф зэрашIэщтым сицыхьэ телъ», — къыIуагъ ГъэIорышIапIэм ипащэ.

Общественнэ советым хэ­хьагъэх А. Ш. Бэгъушъэр, В. В. Вдовиновыр, Т. А. Гоголевар, А. А. Дзэхъохъур, А. Я. Крюко­вар, М. А. НэмытIэкъор, М. М. НатIэкъор, О. А. Нигоевыр, С. Н. Пастернак, Г. Н. Ри­зае­выр, Р. М. ЛIымыщэкъор, П. И. Тхьаркъуахъор.

Зэхэсыгъом Общественнэ советым итхьаматэу щыха­дзыгъ Сергей Пастернак, ащ игуадзэу агъэнэфагъэх Бэгъушъэ Адамрэ НатIэкъо Муратрэ.

Нэужым Общественнэ советым хэтхэм 2023-рэ илъэсым анахь Iофыгъо шъхьаIэу анаIэ зытырагъэтыщтхэр къагъэнэфагъэх, Iоф зэришIэщт планыр аштагъ.

Общественнэ советым хэтхэм АР-м ит организациехэу фабэр, гъэстыныпхъэр, псыр ыкIи электроэнергиер цIыфхэм ыкIи предпринимательствэм исубъектхэм аIэкIэгъэхьэгъэнымкIэ фэIо-фашIэхэр зыгъэцакIэхэрэм яIофшIэн зэрэзэхащэрэр уплъэкIугъэн, цIыфхэм яхэбзэ фитыныгъэхэр къэухъумэгъэнхэ зэрэфаер къаIуагъ. Сыда пIомэ мы лъэныкъохэмкIэ монополием пэшIуекIогъэнымкIэ ГъэIорышIапIэм цIыфхэм ядэо тхылъхэр мымакIэу къаIэкIахьэх.

Мы Iофыгъом изэхэфын игъэ­кIотыгъэу тегущыIэхэзэ, фэIо-фа­шIэхэр шъолъырым зэрэщагъэцакIэрэм лъыплъэщт Iоф­шIэ­кIо куп зэхащагъ. Купым хэтхэм 2023-рэ илъэсыр екIыфэ сетевой компаниехэм ялIыкIохэм аIукIэщтых, джащ фэдэу ахэр зэхэсыгъохэм къарагъэбла­гъэхэзэ, гумэкIыгъоу щыIэхэм ядэгъэзыжьын атегущыIэщтых.

Общественнэ советыр общественнэ лъыплъэным изэхэгущыIэжь-упчIэжьэгъу къулыкъоу щыт ыкIи ащ унашъоу ышIыхэрэм кIуачIэ яIэу щыт. Советым ипшъэрылъ шъхьаIэхэм ащыщ монополием пэшIуекIорэ ве­домствэм иIофшIэн зэIухыгъэу щытыныр ыкIи бизнесым IэпыIэгъу фэхъугъэныр.

КъэIогъэн фае, Урысыем и ФАС и Общественнэ советхэм я Урысые шIэныгъэ-практическэ конференциеу щыIагъэм монополием пэшIуекIогъэнымкIэ фе­деральнэ къулыкъум АР-мкIэ и ГъэIорышIапIэ и Общественнэ совет 2022-рэ илъэсым Iоф зэришIагъэм изэфэхьысыжьхэмкIэ Къыблэ федеральнэ шъо­лъырымкIэ анахь дэгъухэм ащыщэу къыхагъэщыгъ.

КIарэ Фатим.