Зичэзыу шIушIэ IэпыIэгъур гъогу техьагъ
Мыекъопэ къэзэкъ отделым ия 16-рэ шIушIэ IэпыIэгъур хэушъхьафыкIыгъэ дзэ операцием хэлажьэхэрэм афарагъэщагъ.
Къэзэкъхэм къаугъоигъэ шIушIэ IэпыIэгъоу тонни 3,5-м ехъурэр дзэ къулыкъушIэхэм, хэушъхьафыкIыгъэ къэзэкъ-гуфит отрядхэу «Кубань», «Барс 16» зыфиIохэрэм афащэщтых.
ШIушIэ IэпыIэгъум ягупсэхэм къагъэхьыгъэхэр, щыгъын фабэхэр, псэу зашъохэрэ псыр, Мостовской ыкIи Шытхьэлэ районхэм къащэгъэ генераторитIу, хэтэрыкIхэр, гъомылапхъэхэр, Iэмэ-псымэ зэфэшъхьафхэр хэлъых. Джащ фэдэу Шытхьэлэ ыкIи Апшеронскэ районхэм якъэзэкъ ныбжьыкIэхэм къагъэхьазырыгъэ сурэтхэр ыкIи письмэхэр афащагъэх. ХэушъхьафыкIыгъэ дзэ операцием хэлажьэхэрэм ягоспиталь пае медицинэ Iэмэ-псымэхэр ыкIи Iэзэгъу уцхэр афащэщтых. Ащ нэмыкIэу Мыекъопэ къэзэкъ отделым икъэзэкъхэм къалэу Новодружескэ щыпсэухэрэ ини цIыкIуи ящыкIэгъэщт лъэкъопылъхьэ ыкIи щыгъын фабэхэр, кIэлэцIыкIу шхынхэр ыкIи джэгуалъэхэу Бжъэдыгъухьэблэ гурыт еджапIэу N 21-м физикэмкIэ ыкIи химиемкIэ икIэлэегъаджэу Людмила Тимофеевам ыIэкIэ ышIыгъэхэр аIэкIагъэхьащтых.
Гъогу мафэ техьанхэу къэзэкъхэм къафэлъэIуагъ динлэжьэу Роман Малинка.
ШIушIэ IэпыIэгъум иугъоин чанэу къыхэлэжьагъэх Мыекъопэ къэзэкъ отделым икъэзэкъ обществэу районхэм ащыIэхэр, Пшызэ шъолъыр ыкIи Адыгеим ащыпсэухэрэр, Москва щыщ унагъо горэ (сомэ мини 10 къаритыгъ), Мыекъуапэ и Георгиевскэ чылыс къакIохэрэр, дзэ ансамблэу «Родничок» зыфиIорэм икъэзэкъ ныбжьыкIэхэр ыкIи ахэм янэ-ятэхэр. Поселкэу Краснооктябрьскэм щыпсэурэ Лариса Бариновам дзэкIолIхэм лъэпэд фабэхэр афихъыгъэх.
ШIушIэ IэпыIэгъур чIыпIэм нэзыгъэсыщтхэм ахэтых Апшеронскэ районым иатаманэу Сергей Коростылевыр, штабым ипащэу Сергей Хлудневыр, Мыекъопэ къэзэкъ отделым иполкэу Вильяминовым ыцIэ зыхьырэм игенералэу Виктор Мельниковыр, ащ иIэпыIэгъоу Игорь Агарковыр ыкIи Апшеронскэ районымкIэ Урысыем иермэлхэм я Союз ипащэу Владимир Тахмазян.
ШIушIэ IэпыIэгъум иушъэн хэлэжьагъэх Адыгеим икъэзэкъ ныбжьыкIэхэм я Союз хэтхэу Илья Шевелевыр ыкIи Афина Ткачевар.
Екатерина Загорулько.