Керим-Заде Зухра Чэрымэ ыпхъум имэфэкI бэмышIэу хигъэунэфы­кIыгъ. Ащ пае сэнэхьатхэм зыщахагъэхъорэ Адыгэ республикэ ин­ститутым ипащэу Тхьагъо Фатимэ, иIофшIэгъугъэхэм, еджапIэхэм япа­щэхэу, район методистхэу Iоф зыдишIагъэхэм ацIэкIэ Зухра тыфэгушIо тшIоигъу.

Зухра щылэ мазэм и 21-м, 1953-рэ илъэсым къуаджэу Кощ­хьаблэ къыщыхъугъ. Къоджэ еджапIэу N 2-р къызеух нэуж Адыгэ къэралыгъо кIэлэ­егъэджэ институтым чIахьи, шIу ылъэ­гъу­рэ кIэлэегъэджэ сэнэ­хьатыр иIэу 1976-рэ илъэсым къыу­хыгъ.

Зухра Кощхьэблэ гурыт еджа­пIэм вожатэ шъхьаIу, Кощхьэблэ райисполкомым зыныбжь имыкъугъэхэм яIофхэмкIэ икомиссие пшъэкIэдыжь зыхьырэ исекретарэу, Кощхьэблэ районsv гъэсэныгъэмкIэ иотдел иинспекторэу Iоф ышIагъ.

IофшIэкIэшIоу IэкIэлъыр къы­далъытэзэ, 1986-рэ илъэсым Адыгэ хэку институтэу кIэлэегъа­джэхэм яшIэныгъэхэм зыщахагъахъорэм къырагъэблагъэ ыкIи еджапIэхэм япащэхэм Iоф адэ­шIэгъэнымкIэ кабинетым ипащэу агъэнафэ. 1999-рэ илъэсым къыщегъэжьагъэу 2012-рэ илъэ­сым нэс мы институтым ипащэ игуадзэу (егъэджэн-методическэ IофыгъохэмкIэ) Iоф ешIэ.

2012-рэ илъэсым къыщегъэ­жьагъэу еджапIэхэм япащэхэм, район методистхэм яметодистэу лэжьагъэ. А лъэхъаным Зухра еджапIэхэм япащэхэм Iоф зэрадэпшIэщт шIыкIэ-гъэ­псыкIэу, нормативнэ документэу щыIэхэм игъэкIотыгъэу нэ­Iуасэ зафешIы ыкIи ыгуи, ыпси етыгъэу, иIофшIэн хэшIыкIышхо фыриIэу ипшъэрылъхэр зэшIуехых: курсхэр, семинархэр, конференциехэр, зэнэкъо­къухэр, къэгъэлъэгъонхэр, педа­гогическэ егъэджэнхэр зэхещэх.

Зухра еджапIэхэм япащэхэм апае зэхигъэуцогъэ егъэджэн­-методическэ материалхэр узIэпащэу егъэпсых.

ЕджапIэхэм япащэхэм яIоф­шIакIэ ущызыгъэгъозэрэ тхылъ пчъагъэ ытхыгъ. Ахэм ащыщых Шэуджэн район методическэ кабинетым ипащэу Беданэкъо Нэфсэт, Пщыжъхьэблэ гурыт еджапIэм ипащэ игуадзэу Бы­лымыхьэ Лизэ яIофшIакIэ фэгъэхьыгъэр, институтым ыныбжь илъэс 80 зэрэхъурэм ипэгъокIэу сборник, республикэ зэнэ­къокъоу «Новой школе — новые учителя» зыфиIорэм пае сборникэу «Советы молодым педагогам», нэмыкIхэри.

Ахэм ямызакъоу, еджапIэхэм япащэхэм, методистхэм IофшIэным икъулайныгъэ къыз­IэкIагъэхьаным иамал зэфэ­шъхьафхэр игъэкIотыгъэу ыгъэ­федагъэх. Ащ фэдэу методи­ческэ IэпыIэгъухэр япчъагъэкIэ бэдэдэ хъухэу ыгъэхьазырыгъэх. Ахэм ащыщых «Организация методической работы на диагностической основе», «Образцы формулировок приказов и записей в трудовых книжках», «Методика проведения активных семинаров» зыфиIохэрэр, нэмыкIхэри.

Зухра IофшIэкIэшIоу IэкIэ­лъыр еджапIэхэм япащэхэм зэ­ранигъэсыщтым ишъыпкъэу Iоф дишIагъ. Мы институтым Iоф щешIэфэ иIофшIэн хэшIыкIышхо зэрэфыриIэр, курс зэ­хэщэнхэмкIэ IэпэIэсэныгъэ ин зэрэхэлъыр нафэ къытфишIыгъ. ИнститутымкIэ иIофшIэгъухэм ыкIи еджапIэхэм япащэхэу, рай­он методистхэу Iоф зыди­шIагъэхэм шIу алъэгъоу, алъы­тэу, иIофшIэни, иIофшIакIи уасэ фашIэу щытыгъ. Ежьыри а илъэс пчъагъэхэм ишIэныгъэ зэрэхигъэхъощтым пае зыдэмышъхьахыжьэу курс зэфэ­шъхьафхэу методистхэм яшIэныгъэхэм зыщахагъахъохэрэм ащеджагъ. 2017-рэ илъэсым жъоныгъокIэ мазэм Красноярскэ институтэу кIэлэегъаджэхэм яшIэныгъэхэм зыщахагъа­хъорэм курсхэр щикIугъэх.

Зухра иIофшIагъэ Адыгэ Рес­публикэм гъэсэныгъэмрэ шIэныгъэмрэкIэ и Министерствэ осэ ин ритыгъ, 1995-рэ илъэсым «Отличник народного просвещения» зыфиIорэ щытхъуцIэр къыфагъэшъошагъ. 1999-рэ илъэ­сым медалэу «Ветеран труда» зыфиIорэ бгъэхалъхьэр къыратыгъ. 2021-рэ илъэсым апшъэрэ ква­лификационнэ категорие къыфагъэшъошагъ.

Зухра илъэс 50-м ехъурэ Iоф ышIагъ, ащ щыщэу илъэс 36-рэ сэнэхьатхэм зыщахагъэхъорэ Адыгэ республикэ институтым щылэжьагъ. 2021-рэ илъэсыр ары ныIэп Зухра изыгъэпсэфыгъо уахътэ къэсыгъэу зилъытагъэр. Къэгъанэ имыIэу егъэ­джэн-пIуныгъэм зиIахьышхо хэ­зылъхьэгъэ IофшIэкIошхом тыгу къыддеIэу имэфэкI мафэ пае тыфэгушIо! Псауныгъэ пытэ иIэу игупсэхэм илъэсыбэрэ адэпсэунэу фэтэIо.

КIэсэбэжъ Нэфсэт. Сэнэхьатхэм зыщахагъа­хъо­рэ Адыгэ республикэ институтым инаучнэ IофышI.