Студентхэм я Мафэрэ Москва дэт къэралыгъо университетэу М. Ло­мо­носовым ыцIэ зыхьы­рэмрэ афэгъэхьыгъэ Iоф­тхьабзэхэм ахэла­жьэзэ, Адыгеим и ЛIышъхьэу КъумпIыл Мурат республикэм щыщхэу мы апшъэрэ еджа­пIэм щеджэхэрэм ыкIи къэ­зыухыгъэхэм зэIукIэгъу адыриIагъ.

Iофтхьабзэм хэлэжьагъэх Адыгеим ыцIэкIэ сенаторхэу Александр Наролинымрэ Хъопсэрыкъо Муратрэ, МКъТУ-м иректорэу Къуижъ Саидэ, Москва дэт къэралыгъо университетыр къэзыухыгъэ­хэу АКъУ-м иректорэу Мамый Даутэ, МКъТУ-м иинженер факультет идеканэу Беданэкъо Мурат, АКъУ-м илабораторие ипащэу Николай Андреевыр, мысатыу организациеу «Совет одаренных» зыфиIорэм ипащэу Андрей Баркиныр, МКъУ-м физикэмкIэ ифакультет испецкурс изэIукIэхэр зэхэзыщэрэ комитетым итхьаматэу Константин Линскэр, МкъУ-м чIышъхьашъом ифизикэкIэ икафедрэ ипащэу Умэрэ Аминэт.

ЗэIукIэгъум хэлэжьагъэхэм Урысыем истудентхэм я МафэкIэ афэгушIуи, Адыгеим и ЛIышъхьэ зэрэхигъэунэфыкIыгъэм­кIэ, нэбгырэ пэпчъкIэ студентыгъор пшъэдэкIыжьышхо зыщихьырэ уахътэу щыт. А уахътэм ежь-ежьырэу унашъохэр аштэшъоу, ящыкIэгъэ шIэныгъэр къыз­IэкIагъэхьэшъоу, IэнатIэм щылъыкIотэнхэмкIэ лъапсэ агъэтIылъышъоу загъэсэным мэхьанэшхо иI.

«ХэгъэгумкIи дунаимкIи апшъэрэ еджэпIэ анахь дэгъухэм зэу ащыщым шъущеджэ. Тэ, Адыгеим исхэм, шъуигъэхъагъэхэм такъы­лъэплъэ, тышъорэгушхо. IэпыIэгъу тыкъызэрэшъуфэхъущтым тыпылъ. Мыщ, Москва, шъущыIэзэ шъузэлъыIэсынымкIэ, республикэ гупсэм ищыIэныгъэ кIэрычыгъэ шъумыхъунымкIэ, Адыгеим къыщыхъухэрэм шъуащыгъозэнымкIэ ищыкIэгъэ амалхэр зетэхьэх», — къыIуагъ КъумпIыл Мурат студентхэм зафигъазэзэ. (ИкIэух). Республикэм испециалист дэгъу хъущтхэм яшIэныгъэрэ якъулайныгъэрэ Адыгеими, Урысыеми зэрящыкIагъэхэр зэIукIэгъум шъхьафэу къыщыхагъэщыгъ.

Республикэм хэхъоныгъэу иIэхэм къатегущыIэзэ, ЛIышъхьэм зэрэхигъэунэфыкIыгъэмкIэ, мы аужырэ илъэси 5-м гурыт еджэпIи 5, кIэлэцIыкIу IыгъыпIэ 18, сымэджэщи 4, поликлиники 4, фельдшер-мамыку IэзэпIэ 30, культурм иуни 4, псауныгъэр зыщагъэпытэрэ физкультурэ комплекс 14 Адыгеим щагъэ­псыгъэх. Ащ дакIоу псауныгъэм икъэухъумэн, гъэсэныгъэм, культурэм, спортым япсэолъипшI пчъагъэ агъэцэкIэжьыгъ е агъэ­кIэжьыгъ. ЧIыпIэхэм язэтегъэ­псыхьанкIэ, газыр, псыр, электроэнергиер икъоу псэупIэхэм аIэкIэгъэхьэгъэнхэмкIэ, республикэм игъогу, иэнергетическэ инфраструктурэ джырэ шапхъэ­хэм адиштэу зэтегъэпсыхьэгъэ­нымкIэ, инвестициехэр нахьыбэу республикэм къыхалъхьанхэмкIэ Iофышхо ашIэ.

Индустриальнэ паркыр Тэхъу­тэмыкъое районым, зыгъэпсэфыпIэу «Лэгъонакъэ» Мыекъопэ районым ащыгъэпсыгъэнхэмкIэ инвестиционнэ проектхэм кIэухышIухэр къатынэу мэгу­гъэх.

«Хэгъэгум и Президентэу Владимир Путиным шъолъырхэм къызэрафигъэнэфагъэмкIэ, инвестициехэр нахьыбэу къахалъхьаным, инновационнэ экономикэм изегъэушъомбгъун ахэр яшъыпкъэу пылъынхэ фае», — къыIуагъ КъумпIыл Мурат.

IэпэIэсэныгъэ ин зыхэлъ кадрэхэу пэрыт технологиехэм ягъэфедэн хэшIыкIышхо фызиIэхэр Адыгеим зэрищыкIагъэ­хэр, ащ епхыгъэу научнэ консорциумэу «Вернадский — Адыгэ Республик» зыфиIорэм изэ­хэщэнкIэ республикэмрэ Московскэ къэралыгъо университетымрэ зэзэгъыныгъэ зэрэзэдашIыгъэр зэIукIэгъум щыхагъэунэфыкIыгъ. КъумпIыл Мурат МКъУ-м истудентхэмрэ ар къэзыухыгъэ­хэмрэ къяджагъ Адыгеим зэпхыныгъэу къыдыряIэр зыIэпамыгъэзынэу, лъэныкъо пстэумкIи ащ хэхъоныгъэ егъэшIыгъэ­ным фэIорышIэнхэу. Специалист ныбжьыкIэхэу зичIыгу гупсэ фэлэжьэнэу тезыубытагъэхэм нахь икъоу яамалхэм зыкъызэIуягъэхыгъэнымкIэ афэлъэкIыщтыр зэкIэ зэрашIэщтыр, ясэнэхьат ахэр щылъыкIотэнхэмкIэ амалышхохэр зэрарагъэгъотыщтхэр республикэм ипащэ къы­Iуагъ.

ЗэIукIэгъум илъэхъан фэе пстэуми амал яIагъ зыгъэгумэкIырэ IофыгъохэмкIэ респуб­ликэм и ЛIышъхьэ упчIэхэр ра­тынэу. Адыгеим ипромышленность, имэкъу-мэщ зягъэушъомбгъугъэным, финансхэм, гъэсэныгъэм, псауныгъэм икъэухъу­мэн, зекIоным хэхъо­ныгъэ ягъэшIыгъэным, технологиякIэ­хэм ягъэфедэн япхыгъэ IофыгъохэмкIэ КъумпIыл Мурат апшъэрэ еджапIэм истудентхэмрэ ар къэзыухыгъэхэмрэ адэгущыIагъ. Экономикэ шъолъыр хэушъхьафыкIыгъэм изэхэщэнкIэ, хэгъэгум ишъолъырхэм авиациер ащыгъэфедэгъэ­нымкIэ, республикэм итарихъ, ишэн-хабзэхэм, зэрыгушхорэ лъэныкъо­хэм нэIуасэ афашIыхэзэ, Адыгеим культурэмкIэ икластер изэхэщэнкIэ хэбзэ къулыкъухэм Iофэу ашIэрэми мы зэIукIэгъум щытегущыIагъэх.

Джащ фэдэу ныбжьыкIэ политикэр республикэм зэрэщыпхыращырэм, лъэпкъ культурэм, адыгабзэм, лъэпкъ шэн-хабзэхэм якъызэтегъэнэжьын ныбжьыкIэхэр къызэрэхагъэлажьэрэм КъумпIыл Мурат лъэшэу ынаIэ тыригъэтыгъ. Ныб­жьыкIэхэм япредложениехэу бизнес цIыкIумрэ гурытымрэ зягъэушъомбгъугъэным, тыкъэзыуцухьэрэ дунаим икъэухъу­мэн, IT-технологиехэм якъы­хэхынрэ ягъэфедэнрэ, инвестициехэр нахьыбэу республикэм къыхалъхьанхэм атегъэпсыхьагъэхэм къадыригъэштэным зэрэфэхьазырыр республикэм и ЛIышъхьэ къыхигъэщыгъ.

«Непэ Адыгеим зэкIэ щашIэрэр зыфашIэрэр къыткIэхъухьащтхэр ары. Шъощ фэдэ ныбжьыкIэ сэнаущхэр ары непэ рес­публикэм хьалэлэу фэлажьэхэрэм ачIыпI иуцон зылъэкIыщтхэр», — къыIуагъ Адыгеим и ЛIышъхьэ.