Херсон хэкум и Геническэ район. Мы псэупIэм Адыгеим икIыгъэ медицинэ IофышIэ купыр ящэнэрэу кIуагъэ. ЫпэкIэ къызэрэттыгъагъэу, мы мазэм и 15-м аужырэхэр гъогу техьагъэх. КIэлэцIыкIу хирургэу Гумэ Ахьмэд ятIонэрэу ежь ишIоигъоныгъэкIэ шъхьафит ашIыжьыгъэ псэупIэм мазэрэ къэтынэу кIоныр къыхихыгъ. Мы мафэхэм телефонкIэ ащ тыдэгущыIагъ.

ЫпэрапшIэу тигущыIэгъу нэIуасэ шъу­фэтшIын. Гумэ Ахьмэд илъэс 30 ыныбжь. 2015-рэ илъэсым Пшызэ къэралыгъо медицинэ университетыр къыухыгъ «Iэзэн Iоф» зыфиIорэ лъэныкъомкIэ, Краснодар краим иклиническэ кIэлэцIыкIу сымэджэщ кIэлэцIыкIу хирургиемкIэ интернатурэр 2016-рэ илъэсым нэс щихьыгъ, ар къызеухым, Адыгэ респуб­ликэ кIэлэцIыкIу клиническэ сымэджэщым Iоф щишIэнэу Iухьагъ, хирургическэ отделением хирургэу Iут. Ащ дакIоу 2017-м икIэух щыублагъэу 2019-рэ илъэ­сым икъежьапIэ нэс Краснодар краим икIэлэцIыкIу клиническэ сымэджэщ иапэрэ хирургическэ отделение, 2017-рэ — 2020-рэ илъэсхэм Шытхьалэ дэт кIэ­лэцIыкIу IэзапIэм ащылэжьагъ. КIэлэцIыкIу адэбз узхэмкIэ апэрэ егъэ­джэ­жьынхэр 2018-рэ илъэсым щикIугъэх кIэлэцIыкIу гематологиемкIэ, адэбз узхэмкIэ ыкIи иммунологиемкIэ Лъэпкъ медицинэ ушэтын гупчэу Дмитрий Рогачевым ыцIэ зыхьэу Москва дэтым, 2019-рэ илъэсым къыщыублагъэу кIэлэцIыкIу онкологэу сабыйхэм яузхэр гъэ­унэфыгъэнхэмкIэ гупчэу Адыгэ респуб­ликэ кIэлэцIыкIу сымэджэщым хэтым Iоф щешIэ, 2020-рэ илъэсым игъэтхапэ щегъэжьагъэу мы сымэджэщым хирургиемкIэ иотделение ипащ. ИшIэныгъэхэм ахигъэхъоныр имурадэу кIэлэцIыкIу хирургиемкIэ конференциехэм чанэу ахэлажьэ, аужырэу 2021-рэ илъэсым зыдэщыIагъэр Москва игупчэ зыгъэсапIэхэм ащыщ.

Гумэ Ахьмэд унагъо иI, ишъхьэгъусэу Дианэрэ ежьыррэ шъэо цIыкIу зэдапIу.

Къин хэфагъэм IэпыIэгъу егъэгъотыгъэныр зэкIэми апшъэу ылъытэзэ, Херсон хэкум и Геническэ район кIэлэцIыкIухэм яIазэхэрэ медицинэм иIофышIэхэр агъэкIонхэ фаеу зызэхехым, Ахьмэд зы такъикъи егупшысагъэп — аугъоирэ купым хэхьанэу унашъо ышIыгъ. Джы мары ятIонэрэу кIуагъэ, илъэсыкIэм ыпэкIэ мазэрэ къэтыгъ, джыри щылэ мазэм и 15-м ыгъэзэжьыгъэу Iоф ешIэ. ХэушъхьафыкIыгъэ дзэ операциер зыщыкIорэ шъолъырым пэблагъэу чIыпIэр зэрэщытым врачыр къызэримыгъащтэрэр игущыIэхэм къащыхигъэщыгъ.

— Зы такъикъи сыщынагъэп, къин хэфагъэхэм IэпыIэгъу яз­гъэгъотыныр сэ сишIоигъоныгъ, — къытфиIотагъ Ахьмэд. — Мы чIыпIэм щыпсэухэрэр илъэсыбэрэ гумэкIыгъомэ ахэтыгъэх. Специалистхэр ямакIэх, фельдшер зимыIэ псэупIэхэри щыIэх.

Ахьмэд къызэриIотагъэмкIэ, Адыгеим икIыгъэ купэу педиатритIу, кIэлэцIыкIу хирургыр, кIэлэцIыкIу психиатрэр ыкIи психологыр, неврологыр, УЗИ-мкIэ врачыр, лаборантыр, медсестрау плIы зыхахьэхэрэм илъэси 2-м къыщыублагъэу илъэс 17 зы­ныбжь анэсырэмэ япсауныгъэ ауп­лъэкIу. Геническэ районым ит еджапIэхэмрэ кIэлэцIыкIу Iы­гъы­пIэхэмрэ уп­лъэкIунхэр ащызэхащэх.

— Тызэплъы­хэрэм уз зэфэшъхьафхэр къахэтэгъэщых, — къытфеIуатэ тигущыIэгъу. — КIэлэцIыкIухэм ялажьэм елъытыгъэу тапэкIэ нахь куоу зыщауплъэкIущтхэ е зыщяIэзэщтхэ IэзапIэхэм афэдгъэкIонхэ фаеуи къыхэкIы. ТиIофшIэнкIэ къыт­фэфедэщт мобильнэ комплексэу аужырэ шапхъэхэм адиштэрэ медицинэ псэуалъэхэр зэрытыри къытатыгъ. Джащ фэдэу пэшIорыгъэшъ уплъэкIунхэр зэшIотхынхэм пае дгъэфедэрэ псэуалъэхэр Адыгэ Республикэм псауныгъэр къэухъумэгъэнымкIэ и Министерствэ къытIэкIигъэ­хьагъэх, Адыгеим иIэшъхьэтетхэм анаIэ къызэрэттетыр зэхэтэшIэ зэпыт. ЛIышъхьэу КъумпIыл Мурати къэкIогъагъ, ежь ышъхьэкIэ зэригъэлъэгъугъ ти­щыIакIэ, тызфэныкъо щыIэмэ къыкIэупчIагъ. Къыхэзгъэщынэу сыфай къэуцурэ IофыгъохэмкIэ чIыпIэ администрациеми ишIуа­гъэ къызэрэтигъэкIырэр. Ны— тыхэри къызэрэтфэразэхэр къы­таIо зэпыт — бэшIагъэ мыщ медицинэ уплъэкIун тэрэз зы­щызэхамыщагъэр, зямыIэза­гъэхэр.

Медицинэм иIофышIэхэу Адыгеим икIыгъэхэм зэкIэмкIи сабый минищым ехъу блэкIыгъэ къэкIогъухэм ауплъэкIугъ, ящэ­нэ­рэ купым — нэбгырэ 300 фэдиз. Анахьэу къыхагъэщыгъэ­хэр нэгъу-кIэтIый узхэр, чый-пэкIоцI-тхьакIумэ, Iэпкъ-лъэпкъ узхэр, хирургием епхыгъэхэр. IэпыIэгъу зищыкIагъэхэу агъэ­нафэхэрэр сымэджэщ зэфэшъхьафхэм агъэкIощтых, федеральнэ мэхьанэ зиIэхэри ахэтхэу.

ДжырэкIэ етIупщыгъэу тимедицинэ иIофышIэхэм сабыйхэм яуплъэкIун зэшIуахы, мэзаем и 22-м нэс къэтыщтых, и 23-м республикэм къагъэзэжьыщт, яунагъохэм къахэхьажьыщтых.

МэщлIэкъо Саид.