Гъэсэныгъэм ихэхъоныгъэхэр
Лъэпкъ проектэу «Гъэсэныгъ» зыфиIорэм ишIуагъэкIэ 2022-рэ илъэсым федеральнэ бюджетым къыхэхыгъэ сомэ миллион 757,6-рэ Адыгеим щагъэфедагъ.
Гъэсэныгъэм исистемэ хэхъоныгъэу блэкIыгъэ илъэсым ышIыгъэхэм язэфэхьысыжь АР-м и ЛIышъхьэу КъумпIыл Мурат исоциальнэ нэкIубгъохэм къащитхыгъ.
— Федеральнэ гупчэм IэпыIэгъоу къытырэм ишIуагъэкIэ Адыгеим щызэшIохыгъэ хъугъэр бэ. Лъэпкъ проектэу «Гъэсэныгъэм» къызэрэдилъытэу, джырэ шапхъэхэм адиштэу еджапIэхэр зэтегъэпсыхьагъэх, яматериальнэ базэ зыкъиIэтыгъ, гъэсэныгъэ тедзэ зыщарагъэгъотырэ гупчэхэр нахьыбэ хъугъэх, къоджэ псэупIэхэм Iоф ащызышIэрэ кIэлэегъэджэ ныбжьыкIэхэм ахэтэгъахъо, — къыхегъэщы КъумпIыл Мурат.
2022-рэ илъэсым къоджэ псэупIэхэм ащылэжьэрэ кIэлэегъэджэ 12-мэ ахъщэ IэпыIэгъу аратыгъ. Мыекъопэ индустриальнэ техникумым джырэкIэ нахь агъэфедэрэ сэнэхьат зэфэшъхьафхэм зыщафарагъэджэжьырэ Гупчэ гъэрекIо къащызэIуахыгъ.
Гъэсэныгъэ тедзэм ылъэныкъокIи гъэхъэгъэ дэгъухэр щыIэх. Муниципальнэ технопаркэу «Кванториум» зыфиIорэр Мыекъуапэ дэт эколого-биологическэ лицееу N 35-м гъэрекIо къыщызэIуахыгъ. Тэхъутэмыкъое районым гурыт еджэпIищ кIэу щашIынэу аублагъ. Гъэсэныгъэ естественнэ-научнэ технологическэ лъэныкъохэм япхыгъэ гупчэу «Точка роста» зыфиIорэ 24-рэ къызэIуахыгъ ыкIи чанэу Iоф ашIэ. Джащ фэдэу гъэсэныгъэ тедзэ зыщарагъэгъотыщт чIыпIэ мини 2 фэдиз агъэпсыгъ. Гурыт сэнэхьат гъэсэныгъэ языгъэгъотырэ учреждении 3-мэ мастерскои 6 ащагъэпсыгъ.
КIэлэцIыкIухэмрэ ныбжьыкIэ сэнаущхэмрэ гъэсэныгъэ тедзэу арагъэгъотырэм зырагъэушъомбгъу. Илъэси 5-м къыщегъэжьагъэу илъэс 18-м нэс зыныбжь кIэлэцIыкIухэм япроцент 77,8-мэ гъэсэныгъэ тедзэ арагъэгъоты. Гурыт еджапIэхэм яспорт инфраструктурэ нахьышIу шIыгъэным джащ фэдэу анаIэ лъэшэу тетыгъ. Лъэпкъ проектым ишIуагъэкIэ спортивнэ зал 13 агъэкIэжьыгъ.