ПсэолъэшIыным ылъэныкъокIэ Адыгеим Iофэу щашIагъэр нахьыбэ хъугъэ, 2022-рэ илъэсым ишэкIогъу мазэ сомэ млрд. 7,3-рэ зытефэгъэ Iофхэр щагъэцэкIагъэх, ар 2021-рэ илъэсым ебгъапшэмэ, проценти 177,3-рэ хэхъуагъ.

Ау 2022-рэ илъэсым ищылэ мазэ къыщегъэжьагъэу ишэкIогъу мазэ нэс пштэмэ, сомэ млрд. 33,4-рэ зытефэгъэ псэолъэшIын Iофхэр ашIагъэх, ыпэрэ илъэсым егъэпшагъэмэ, про­центи 130,4-кIэ нахьыб. А пчъагъэхэр Адыгеястатым къытIэкIигъэхьагъэх.

Ащ иIофышIэхэм къызэраIуагъэмкIэ, 2022-рэ илъэсым ишэкIогъу мазэ нэс унэу ашIыгъэхэм япроцент 98-м цIыфхэр ащыпсэунхэм фытегъэпсы­хьагъэх. А уахътэм къыкIоцI респуб­ликэм щылэжьэгъэ организацие зэ­фэшъхьафмэ фэтэр 5061-рэ зыхэт унэхэр ашIыгъэх, ахэм квадратнэ мет­рэ мин 447-рэ аубытыгъ, 2021-рэ илъэсым елъытыгъэмэ, зэрэхъугъэр проценти 150,9-рэ.

ПсэолъэшIынымкIэ Адыгэ Рес­публикэм и Министерствэ къызэри­тыгъэмкIэ, 2022-рэ илъэсым фэ­тэрыбэу зэхэт унэ 20 атыгъ. А унэу атыгъэхэм яшIын цIыфхэри хэлэ­жьагъэх, яунэе ахъщэ халъхьагъ. ЗэкIэмкIи а унэхэм фэтэр 2351-рэ ахэт, квадратнэ метрэ мин 96,15-рэ аубытыгъ.