АР-м и Къэралыгъо Совет — Хасэм и Тхьаматэу Вла­ди­мир Нарожнэр мы тхьамафэм Мыекъопэ районым ит псэупIэу Абдзэхэхьаблэ щыIагъ.

Парламентым ипресс­-къулыкъу тызэрэщигъэ­гъозагъэмкIэ, ащ иадминистрацие ипащэу Юрий Михайленкэм ар IукIагъ. ЦIыфэу коим щыпсэу­хэрэм парламентым идепутатхэм зыкъызафа­гъазэм Iофыгъоу зигугъу къашIыгъэхэр ары анахь шъхьаIэу зытегущыIагъэ­хэр. «Социальнэ гази­фикациеу» УФ-м и Президентэу Владимир Пу­тиныр кIэщакIо зыфэхъугъэм ипхырыщын ахэм зэу ащыщ.

Мы псэупIэр щагу 3175-рэ мэхъу. Ащ щыщэу унэ 797-мэ гъэстыныпхъэ шхъуантIэр ящэлIагъ, 2378-у ар зищыкIагъэхэм ащыщэу 680-р станицэхэу Севастопольскэмрэ Новосвободнэмрэ адэтых.

ПсэупIэхэм давление ин зиIэ гъэстыныпхъэ шхъуантIэр ящэлIэгъах, «догазификацием» ищыкIэгъэ тхылъхэр агъэ­хьазырых. Владимир Нарожнэм Iофхэм язытет еплъыкIэу фыриIэр къыриIотыкIызэ, цIыфхэм ама­лэу къэралыгъом къа­ритыгъэр чанэу зэрагъэфедэрэр, ежьхэм алъэ­ныкъокIэ ашIэн фаехэр зэрамыгъэгужъохэрэр къыхигъэщыгъ.

Ащ нэмыкIэу федеральнэ ыкIи шъолъыр программэ зэфэшъхьафэу псэу­пIэхэм яинфраструктурэ нахьышIу шIыгъэным тегъэпсыхьагъэхэм зэра­хэлажьэхэрэм, хэбзэIахьхэр бюджетым къыхэзылъхьащт хъызмэтшIапIэхэм ягъэпсын, медицинэ IэпыIэгъур цIыфхэм къыз­IэкIэгъэхьэгъошIу афэшIыгъэным япхыгъэ Iофхэм парламентым и Тхьама­тэрэ псэупIэ кой администрацием ипащэрэ атегущыIагъэх.

Джащ фэдэу пресс-­къулыкъум тызэрэщигъэгъозагъэмкIэ, зигугъу ашIы­гъэхэм ащыщ щагу псэушъхьэу псэупIэ коим дэтым икIэлъытыкIыжьын, ахэр чIыпIэ гъэнэфагъэ щамыгъэхъухэу, шъхьарытIупщэу урамхэм зэ­ратетхэм Iофыгъоу къы­хьыхэрэр. Былымхэр автомобиль гъогухэм ате­хьэх, водительхэр агъэо­хъух.

Республикэ парламентым ипащэ ар Iэпэдэлэл пшIын Iофэу зэрэщымытым къыкIигъэтхъызэ, ащ идэгъэзыжьын фэIоры­шIэщт шапхъэхэр хэбзэ­гъэу­цугъэхэм ащыгъэнэ­фэ­гъэнхэр игъоу зэри­лъы­тэрэр къыIуагъ, псэупIэ кой администрацием ипащэ нахь чанэу ащ ыуж итынэу фигъэпытагъ.

Сурэтыр: АР-м и Къэралыгъо Совет — Хасэм исайт.

ХЪУТ Нэфсэт.