Миллиони 100 къафатIупщыщт
УФ-м гъэсэныгъэмрэ шIэныгъэмрэкIэ и Министерствэ программэу «Патриот-2030» зыфиIорэр 2021 — 2022-рэ илъэсхэм щыIэныгъэм зэрэщыпхыращыгъэм изэфэхьысыжьхэр бэмышIэу ышIыгъэх.
Анахь дэгъухэм Адыгэ къэралыгъо университетыр ахэхьагъ ыкIи 2023-рэ илъэсым сомэ миллиони 100 хъурэ грантыр къыфагъэшъошэнэу агъэнэфагъ.
ЗэкIэмкIи мы илъэсым УФ-м ишъолъыр 54-мэ арыт апшъэрэ еджэпIи 119-мэ грант аратыщт. Адыгэ къэралыгъо университетым ипресс-къулыкъу къызэриIуагъэмкIэ, мы лъэныкъомкIэ апшъэрэ еджапIэм гъэхъэгъэшIухэр иIэх. Ахэм ащыщ 2021 — 2022-рэ илъэсхэм ежьхэм агъэпсыгъэ гъэсэныгъэ программэм игъэцэкIэн зэраублагъэр. Джащ фэдэу хэгъэгум ит апшъэрэ еджэпIэ анахь дэгъухэр ягъусэхэу программитIу атIупщыгъ, научнэ лабораториищ къызэIуахыгъ, компьютернэ ыкIи информационнэ паркым Iэмэ-псымакIэхэр чIагъэуцуагъэх, нэмыкIхэри.
«Патриот-2030» зыфиIорэм къыдыхэлъытагъэу 2023-рэ илъэсым Адыгэ къэралыгъо университетым стратегическэ проектхэу «Математика: новый взгляд», «Яблоневая долина» ыкIи «Адыгея — территории здоровья» зыфиIохэрэм Iоф адишIэщт.