ИкIыгъэ тхьамафэм къыкIоцI ешъуагъэу автомобилыр зезыфэщтыгъэ нэбгырэ 36-рэ Адыгеим иавтоинспекторхэм къагъэуцугъ.

Щылэ мазэм 9-м къыщегъэжьагъэу и 15-м нэс Адыгеим игъогухэм хъугъэ-шIэгъи 9 атехъухьагъ, ахэм зы нэбгырэ ахэ­кIодагъ, 11-мэ шъобжхэр хахыгъэх.

А уахътэм къыкIоцI шъобж зыхамыхыгъэ аварие 55-рэ тишъолъыр игъогухэм джыри ате­хъухьагъ. Ахэр нахьыбэу зыщыхъугъэхэр къалэу Мыекъуапэ (23-рэ) ыкIи Тэхъутэмыкъое районыр (22-рэ) арых.

Адыгеим и Къэралыгъо автоинспекцие къызэритыгъэмкIэ, хъугъэ-шIэгъэ 19-мэ лъапсэ афэхъу-гъэр машинэхэм азыфагу илъын фэе зэпэчыжьа-гъэр зэраукъуагъэр, 11-мэ — зикIогъу автомобилыр зэрэбламыгъэкIыгъэр, 5-м — къызэкIэкIорэ транспортым иамалхэр къызфигъэфедэнхэ зэрэфаер ащ къебгъукIохэрэм къыдалъытагъэп.

ПIалъэу зигугъу къэтшIырэм къыкIоцI гъогум дэчъэхыгъэхэу хъугъэ-­шIэгъи 2 атхыгъ, гъогогъу 12-рэ пэрыохъу зэ­фэшъхьафхэм ыкIи щыт транспортхэм атехьагъэ­хэу агъэунэфыгъ. ГъогурыкIоным ишапхъэхэр гъогогъу 2023-рэ аукъуагъэхэу къыхагъэщыгъ.

Ешъуагъэу автомобилыр зезыфэщтыгъэ нэбгырэ 36-мэ административнэ пшъэдэкIыжь арагъэхьыщт. Ахэр нахьыбэу къыщаубытыгъэх къалэу Мые­къуа­пэ ыкIи Тэхъутэмыкъое районым.

ЛъэсрыкIуи 134-мэ алъэ­ныкъокIи протоколхэр атхыгъэх. Ахэр амыгъэу­нэфыгъэ чIыпIэхэм (ана­хьэу машинэхэр бэу зэрыкIохэрэм) гъогур ащызэпачыгъ.

ГъогурыкIоным ишап­хъэхэр шIокI имыIэу агъэ­цэкIэнхэу Адыгеим и ГИБДД транспортыр зезыфэхэрэм закъыфегъазэ. Анахьэу мэзэхэ уахътэм сакъыныгъэ къызхагъэфэнэу, псынкIэу мызекIонхэу инспекторхэр къяджэх.