КъулыкъушIэм шъобжхэр тырищагъ

Илъэс 44-рэ зыныбжь хъулъфыгъэу станицэу Ханскэм щыщым къыфызэIуахыгъэ уголовнэ Iофыр УФ-м и Следственнэ комитет иследственнэ ГъэIорышIапIэу АР-м щыIэм МыекъуапэкIэ иследственнэ отдел зэхифыгъ.

Следствием къызэритырэмкIэ, лажьэ зиIэр 2022-рэ илъэсым шэкIогъум и 4-м чэщыр хэкIотагъэу иавтомобилэу «ВАЗ-2113-м» исэу Мыекъуапэ иурамэу Герценым ыцIэ зыхьырэм рычъэзэ, полицием икъулыкъушIэхэм зашIуигъэбылъын мурад иIэу гъогум дэчъэхыгъ, нэужым къулыкъушIэу щытыгъэм телъади иавтомобиль капот ар къыдыригъэдзыягъ. Ащ ыуж лажьэ зиIэм псынкIэу машинэр къыгъэчэрэгъуи къулыкъушIэр капотым къырыригъэдзыхыжьыгъ. Ащ къыхэ­кIэу къулыкъушIэм шъобжхэр тещагъэ хъугъэ ыкIи ипсауныгъэ зэрар рихыгъ.

Хъулъфыгъэр ышIагъэм еуцолIэжьыгъ, бзэджэшIагъэр зэрихьаным лъапсэ фэхъугъэр къариIуагъ.

Следствием икъулыкъу мы уголовнэ IофымкIэ материалэу къыугъоигъэр хьыкумым фигъэхьыгъ.

Ишъхьэгъусэ IэкIэкIодагъ

УФ-м и Следственнэ комитет иследственнэ ГъэIорышIапIэу АР-м щыIэм и Тэхъутэмыкъое межрайон следственнэ отдел мы районым щыщ бзылъфыгъэу илъэс 43-рэ зыныбжьым къыфызэIуахыгъэ уголовнэ Iофыр зэхифыгъ. УкIыгъэ бзэджэшIагъэ зэрэзэрихьагъэм фэшI ар агъэмысэ.

Нафэ зэрэхъугъэмкIэ, 2022-рэ илъэсым чъэпыо­гъум зыщыпсэурэ иунэу къуаджэу АдыгеякIэм дэтым илъэс 57-рэ зыныбжь ишъхьэгъусэрэ ежьыррэ щызэдешъуа­гъэх. Ащ къыхэкIэу зэшъхьэгъусэхэм азыфагу зэгурымыIоныгъэ къихьагъ ыкIи бзылъфыгъэм шхапIэм илъыгъэ шъэжъыер къышти, ишъхьэгъусэ утын бэкIае рихыгъ. Шъобжэу тещагъэхэм къахэкIэу хъулъфыгъэм а чIыпIэм идунай щихъожьыгъ.

Следствием ышIыгъэ хьыкум-медицинэ ыкIи экспертизэ уплъэкIунхэм къакIэлъыкIоу бзылъфыгъэм лажьэ зэриIэр агъэунэфыгъ.

Тэхъутэмыкъое район прокуратурэм уголовнэ Iофыр хьыкумым IэкIигъэхьагъ.

Хьыкум приставыр агъэмысагъ

Урысыем ихьыкум приставхэм якъулыкъоу Адыгэ Республикэм щыIэм хьыкум приставхэм я Тэхъутэмыкъое район отдел ипащэ игуадзэу Iоф зышIэщтыгъэм ылъэныкъокIэ АР-м иследственнэ ГъэIорышIапIэ и Тэхъутэмыкъое район отдел уголовнэ Iоф къызэIуихыгъ. ИIэнатIэ къызфигъэфедэзэ тIогъогогъо гъэпцIагъэ зыхэлъ бзэджэшIагъэ зэрэзэрихьагъэм фэшI ар агъэмысэ.

Следствием ыкIи хьыкумым зэрагъэунэфыгъэмкIэ, 2021-рэ илъэсым мэлылъфэгъум отделением ипащэ игуадзэу, джащ фэдэу Урысыем ихьыкум приставхэм якъулыкъоу Адыгэ Республикэм щыIэм хьыкум приставхэм я Тэхъутэмыкъое район отдел ипащэ истаршэ гуадзэу Iоф ышIэзэ иIэнатIэ къызфигъэфеди бзэджэшIагъэ зэрихьагъ. ЧIыфэ зытелъыгъэм ар фипщынынэу къыгъэгугъи, гъэпцIагъэкIэ сомэ мин 15 къышIуитыгъугъ. ЧIыфэ зытелъ нэмыкI горэм ылъэныкъокIэ мыщ фэдэ бзэджэшIагъэ 2020-рэ илъэсым хьыкумышIым зэрихьагъэу агъэунэфыгъ.

Хьыкумым унашъоу ышIыгъэмкIэ хъулъфыгъэм илъэси 3 хьапс условнэу тыралъхьагъ.

ЫукIын гухэлъ иIагъ

Мыекъуапэ щыщ илъэс 54-рэ зыныбжь хъулъфыгъэм ылъэныкъокIэ АР-м иследственнэ ГъэIорышIапIэ МыекъуапэкIэ иследственнэ отдел уголовнэ Iоф къызэIуихыгъ. УкIын Iоф зэрихьан гухэлъ ащ иIагъэу агъэунэфыгъ.

Следствием къызэритырэмкIэ, 2022-рэ илъэсым шэкIогъум чэщыр хэкIотагъэу лажьэ зиIэр ешъуагъэу ыпэкIэ зэмызэгъыныгъэ зыдириIэгъэ инэIуасэм дэжь кIуагъэ. Иунэ ихьи, хъулъфыгъэр чъыеу зелъэгъум ыукIынэу ыгу къихьагъ. ШхапIэм илъыгъэ шъэжъыер къышти, чъыерэм ыпшъэ дэжь хэпыджагъ. Зэрар зэрихыгъэмрэ нэмыкI хъулъфыгъэу ащ къыдилъыгъэм­рэ къэущыгъэх ыкIи бзэджашIэм къыпэуцужьыгъэх. Лажьэ зиIэм псынкIэу къыкIиIэжьыгъ, бысымэу шъобж­хэр зытещагъэхэм IэпыIэгъу фэхъугъэх.

БзэджашIэр къаубытыгъэу хьапсым дэс. Уголовнэ Iофэу къыфызэIуахыгъэр зэхафы.

ХэбзэIахьыр зэримытыгъэмкIэ агъэпщынэ

АР-м иследственнэ ГъэIорышIапIэ и Тэхъутэмыкъое межрайон следственнэ отдел илъэс 48-рэ зыныбжь предпринимателым уголовнэ Iофэу къыфызэIуахыгъэм хэплъагъ. Бэ хъурэ хэбзэIахьыр зэримытыгъэм фэшI ар агъэмысэ.

КъызэрэчIагъэщыгъэмкIэ, гъунэпкъэ гъэнэфагъэ зиIэ пшъэдэкIыжь зыхьырэ обществэм ипащэу Iоф ышIэзэ, 2017-рэ илъэсым щылэ мазэм къыщегъэжьагъэу 2019-рэ илъэсым мэкъуогъум нэс къэбар нэпцIхэр зэрыт декларациер ащ къулыкъум IэкIигъэхьагъ ыкIи сомэ миллион 380-м ехъу хъурэ хэбзэIахьыр ыты­гъэп. Следователыр зэрэкIэлъэIугъэм тетэу организацием имылъку хьыкумым арест тырилъхьагъ. Тэхъутэмыкъое район прокуратурэм зэхифыгъэ Iофыр хьыкумым фигъэхьыгъ.

Ешъуагъэу ыукIыгъ

Красногвардейскэ районым щыщ илъэс 47-рэ зыныбжь хъулъфыгъэм инэIуасэ зэриукIыгъэм фэгъэхьыгъэ уголовнэ Iофэу къызэIуахыгъэм Джэджэ межрайон следственнэ отделыр хэплъагъ.

2023-рэ илъэсым щылэ мазэм и 7-м, мафэм хъулъ­фыгъэмрэ ащ инэIуасэмрэ зэшъхьэгъусэ горэхэм адэжь хьакIапIэ щыIэхэу зэдешъуагъэх. Iанэм зэдыпэсхэу хъулъфыгъэмрэ инэIуасэмрэ азыфагу зэгурымыIоныгъэ къихьагъ, нэужым зэзэонхэу къырагъэ­кIыгъ. Лажьэ зиIэм ыIыгъыгъэ шъэжъыемкIэ инэIуасэ хэпы­джагъ, шъобжэу тещагъэхэм къахэкIэу а чIыпIэм ащ идунай щихъожьыгъ.

ХэбзэухъумэкIо къулыкъухэм зэрахьэгъэ Iофтхьабзэхэм яшIуагъэкIэ укIын бзэджэшIагъэ зезыхьагъэр къаубытыгъ. ЫшIагъэм ар еуцолIэжьыгъ.

Мы мафэхэм яхъулIэу уголовнэ Iофым изэхэфын лъагъэкIуатэ.

Зыгъэхьазырыгъэр КIАРЭ Фатим.