Урысые Федерацием и Президентэу Владимир Путиныр кIэщакIо зыфэхъугъэ лъэпкъ проект 12-мэ япхырыщын Адыгеим щылъагъэкIуатэ. Ахэм къадыхэлъытэгъэ пстэур гъэцэкIэгъэным фэшI шъолъыр проект зэфэшъхьафхэр аштагъэх.

— Лъэпкъ проектхэм мурадэу яIэхэр гъэцэкIэгъэнхэр пшъэрылъ шъхьа­Iэу Урысые Федерацием и Президентэу Владимир Путиным къытфигъэуцу­хэрэм ащыщ. 2022-рэ илъэсэу икIыгъэм про­ектхэм япхырыщын сомэ миллиарди 9,5-рэ пэIу­хьагъ. Ахэм къадыхэлъытагъэу шIагъэ хъугъэхэм, мылъкур зыпэIухьагъэхэм тапэкIэ нэIуасэ шъуа­фэсшIыщт, — къащыхигъэщыгъ АР-м и ЛIы­шъхьэу КъумпIыл Мурат исо­циальнэ нэкIубгъохэм.

Республикэм ипащэ апэ къызэфихьысыжьы­гъэр «Псауныгъ» зыфиIорэ лъэпкъ проектым ишIуагъэкIэ зэшIохыгъэ хъугъэ­хэр ары. Ащ къызэритхыгъэмкIэ, илъэсэу икIыгъэм мы проектым игъэцэкIэн сомэ миллион 638-рэ пстэумкIи пэ­Iуагъэхьагъ. Нэужым ахъщэмкIэ шIагъэ хъугъэхэм къащыуцугъ.

Лъэпкъ проектэу «Псау­ныгъ» зыфиIорэм цIыфым апэрэ медицинэ IэпыIэ­гъур егъэгъотыгъэным епхыгъэ пстэур зыпкъ игъэуцогъэныр имурад шъхьаIэхэм ащыщ. Мары ащ ишIуагъэкIэ, икIыгъэ илъэсым зы поликлиникэм ишIын республикэм щылъагъэкIотагъ, кIэу зы рагъэжьагъ. Джащ фэдэу къоджэ псэупIитIумэ амбулаториехэр ащашIых, зы къоджэ поликлиникэ агъэ­кIэжьи, ищыкIэгъэ пстэур чIагъэуцуагъ.

Джащ фэдэу лъэпкъ проектым къыдыхэлъы­тагъэу адэбз ыкIи гу-лъынт­фэ уз къызэолIа­гъэхэм зыщяIазэхэрэ учреждениехэм ачIэт оборудованиехэм ащыщхэр шэпхъэшIухэм адиштэ­хэ­рэмкIэ зэблахъугъэх.

Медицинэ IэпыIэгъур цIыфхэм нахь къызIэкIэгъэхьэгъошIу афэхъуным, зыкI къэралыгъо къэ­барлъыгъэIэс системэм зегъэушъомбгъугъэным афэшI проектым къыды­хэлъытагъэу агъэпсыгъ кол-гупчэ. Ащ шIуагъэу иIэр «пандемием» илъэ­хъани, нэужыми къэлъэгъуагъ. Джы ар врачым дэжь зыхатхэщтыми, IэпыIэгъу псынкIэм къеджэщтхэми, нэмыкI гумэкIыгъо яIэми цIыфхэм лъэшэу къашъхьапэ.

Джащ фэдэу лъэпкъ проектэу «Псауныгъ» зыфиIорэм къыдыхэлъыта­гъэу Адыгеим щагъэпсыгъ елбэтэу цIыфым медицинэ IэпыIэгъу егъэгъотыгъэным тегъэпсыхьэгъэ санитар авиациер. АР-м и ЛIышъхьэ инэкIубгъо къы­зэрэщитхыгъэмкIэ, икIыгъэ илъэсым ар агъэфе­дэзэ нэбгырэ 51-мэ IэпыIэгъу аратыгъ.

А зэпстэумэ анэмыкIэу псауныгъэм икъэухъумэн фэгъэзэгъэ организациехэм апае автомобиль 14, гу-лъынтфэ уз зиIэхэм апае ыкIи ащ цIыфыр щызыухъумэрэ Iэзэгъу уц­хэр къащэфыгъэх, лъэ­хъаным диштэрэ оборудование зэфэшъхьафищ агъэуцугъ.

Сурэтхэр: АР-м псауныгъэр къэухъумэгъэнымкIэ и Министерств.

Зыгъэхьазырыгъэр ХЪУТ Нэфсэт.