Адыгеир апэрипшIым ащыщ
УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу гъогухэм язэтегъэпсыхьан Урысыем щылъагъэкIуатэ.
ЦIыфхэм яеплъыкIэхэм язэгъэшIэн пылъ Гупчэм (ВЦИОМ) 2022-рэ илъэсым итыгъэгъэзэ мазэ зэхищэгъэ ушэтынхэм къызэрагъэнэфагъэмкIэ, къэралыгъом исым ипроцент 52-р автомобиль гъогухэм язытет егъэразэ, инфраструктурэр нахьышIу зэрэхъугъэри къыхагъэщы.
Федеральнэ гъогу агентствэм ипащэу Роман Новак къызэриIуагъэмкIэ, программэхэм, проектхэм къадыхэлъытагъэу, къэралыгъо бюджетым къыхэхыгъэ ахъщэ пэIуагъахьэзэ квадрат метрэ миллиони 165-м ехъу икIыгъэ илъэсым агъэкIэжьыгъ е ашIыгъ. ЕплъыкIэхэр зэзгъэшIэгъэ Гупчэм шъолъыр 85-рэ къызэлъиубытыгъ, ахэм ащыпсэоу зэупчIыгъэхэр нэбгырэ мини 170-м ехъу.
ЦIыфхэм ярэзэныгъэ анахьыбэу къызщыраIотыкIыгъэу, ащкIэ пэрытныгъэр зыубытыгъэхэм ащыщых Чэчэн Республикэр (процент 86-рэ), къалэу Севастополь (процент 81-рэ), Къырым Республикэр (процент-80), Къэбэртэе-Бэлъкъарыр (процент 73-рэ)…
Мы лъэныкъомкIэ апэ хъугъэ субъектипшIым ащыщ Адыгеири. Республикэм щыпсэоу зэупчIыгъэхэм япроцент 65-р гъогухэм язытет егъэразэ. Ахэр нахь шъуамбгъо зэрэхъугъэхэр, шэпхъэшIухэм зэрадиштэхэрэр, инфраструктурэр зэрэзэхъокIыгъэр, республикэм ипащэхэм ащ лъэшэу анаIэ зэратетыр цIыфхэм къыхагъэщыгъ.
Гъогоу агъэкIэжьыгъэхэм, зэхэкIыпIэу ашIыгъэхэм, лъэмыджэу ашIыжьыгъэхэм япчъагъэ ар къаушыхьаты. ГущыIэм пае, Мыекъуапэ къэзыухьэрэ гъогум иIахьхэу зэмкIэ километри 10,4-рэ, етIанэ километри 7,5-рэ атыгъ, Тэхъутэмыкъое районымкIэ поселкэу Инэм икIэу БжыхьэкъоякIэм кIорэ гъогум фашIыгъэ зэхэкIыпIэр аухи атIупщыгъ, Адыгеим икъэлэ шъхьаIэ иурамхэм ащыщыбэхэр агъэцэкIэжьыгъэх, гъогурыкIоныр зыгъэIорышIэщт ыкIи ащ ищынэгъончъагъэ къэзыгъэгъунэщт псэолъакIэхэр агъэуцугъэх.
Джащ фэдэу зэупчIыгъэхэм япроцент 54-мэ шъолъыр мэхьанэ зиIэ гъогухэмрэ псэупIэхэр зэпызычыхэрэмрэ язытети нахьышIу зэрэхъугъэм къыкIагъэтхъыгъ. Шъугу къэдгъэкIыжьын, 2030-рэ илъэсым нэс ащ фэдэ шъолъыр гъогухэм япроцент 60-р, псэупIэхэр зэпызычыхэрэм япроцент 85-р шэпхъэшIухэм адиштэу шIыгъэнхэр пшъэрылъ шъхьаIэхэм ащыщ.