ЧIыгур гощыгъэнымкIэ Iофыгъохэр «Роскадастрэм» зэрэфагъэзэжьыгъэм фэшI ащ епхыгъэ тхылъхэр джы «Росреестрэм» и ГъэIорышIапIэу АР-м щыIэм къытыжьыщтхэп. ИлъэсыкIэу къихьагъэм ищылэ мазэ и 9-м къыщыублагъэу «Роскадастрэм» и къутамэу АР-м щыIэр ары а фэIо-фашIэр зыгъэцакIэрэр.

Мы фондыр чIыгур зэрэгощыгъэм, ар геодезие е картографие зашIым къыгъэлъэгъуагъэхэм япхыгъэ тхылъхэм яхъарзынэщ. Ащ нэмыкIэуи псэупIэхэм ячIыгухэр инвентаризацие зэрашIыгъэхэм, дачэ ыкIи чъыг­хэтэ обществэхэм ячIыгухэр икIэрыкIэу зэратхыжьыгъэ­хэм, чIыгум изытет уасэу фашIыгъэм, муниципальнэ образованиехэм, псэолъэ зэфэшъхьафхэм ягъунапкъэхэм афэгъэхьыгъэ материалхэр хэлъых.

— Тхылъ зэфэшъхьафыбэ мы фондым Iэ­кIэлъ. Арышъ, ахэр амыгъэкощырэ мылъкур зи­унаехэм ямызакъоу, кадастрэ Iофым пылъ инженерхэм, хэбзэ къулыкъухэм, нэмыкI инстанциехэм ящыкIагъэхэу мэхъу. Фондым къыхэхыгъэ материалхэр ыпкIэ хэмылъэу къэт­тыщтых, — къыIуагъ «Роскадастрэм» и Къутамэу АР-м щыIэм ипащэу ХъокIо Аюбэ. ЧIыгур гощыгъэным епхыгъэ Iофыгъохэм алъэныкъокIэ материал зищыкIагъэхэм электроннэ почтэмкIэ лъэIу тхылъыр къагъэ­хьын алъэ­кIыщт. Мары адресыр: filial@0I.kadastr.ru. «Роскадастрэм» и Къутамэ къырахьылIэми хъущт. Ар зыдэщыIэр: 385009, Адыгэ Республик, къа­лэу Мыекъуа­пэ, урамэу Юннатовыр,9д. Телефоныр: 8(8772) 59-30-46(доб.2217,22I2).

— ЧIыгур гощыгъэным епхыгъэ Iофыгъохэр «Роскадастрэм» зэрэфагъэзэжьыгъэм мэхьанэшхо иI. Сыда пIомэ чIыгу къэкIуапIэхэр шIуагъэ къатэу гъэ­федэгъэнхэм ыкIи ахэр къэ­гъэгъунэгъэнхэм ар зэрэгощыгъэм епхыгъэ тхылъхэр лъэшэу ищыкIагъэх. ЧIыгу гъунапкъэм ыпкъ къикIэу зэгъунэгъуитIур зыщызэпэуцужьырэм фондым ихъарзынэщ хэлъ тхылъхэм яшIуагъэ къакIоу бэрэ къыхэкIы, — къыIуагъ Росреестрэм АР-мкIэ и ГъэIорышIапIэ ипащэу Марина Никифировам.