УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ къызэритыгъэмкIэ, къэралыгъо ахъщэ тын зэфэшъхьафхэм процент 11,9-рэ къахэхъуагъэу къихьащт мэзэе мазэм къатынэу рагъэжьэщт.

Индексациер социальнэ IэпыIэгъу 40-мэ анэсыщт. Гущы­Iэм пае, сабыир къызыхъукIэ зэтыгъоу къатырэ ахъщэм, кIэ­лэцIыкIум пае мазэ къэс къэ­кIонэу агъэпсырэ пособием, ветеранхэм ахъщэ тынэу къара­тырэм, нэмыкIхэм къахэхъощт.

Ны мылъкум фэгъэхьыгъэ программэм къыдыхэлъытэгъэ ахъщэри къаIэтыщтэу ары Министерствэм къызэритырэр. Апэрэ сабыеу унагъом къихъу­хьагъэм пае агъэнафэрэр сомэ мин 587-м нэсыщт. Ар блэкIыгъэ илъэсым зэрэхъущтыгъэм сомэ мин 62,5-кIэ нахьыб. ЯтIонэрэ сабыим пае къатырэр сомэ мин 775,6-рэ зэрэхъущтыр. 2022-м егъэпшагъэмэ, сомэ мин 82,5-кIэ ар нахьыб.

Инфляциер зынэсыгъэр къыдалъытэзэ индексациер процент 11,9-у зэрагъэнэфагъэр Министерствэм къыщыхагъэщыгъ.

Шъугу къэдгъэкIыжьын, илъэ­сыкIэр къызихьагъэм къыщыублагъэу кIэлэцIыкIухэм апае ахъщэ тынхэр къызэратырэ системэм зэхъокIыныгъэхэр фэхъугъэх. НахьыпэкIэ сабыим ыныбжьым ифэшъуашэу тын зэфэшъхьафхэр щыIагъэхэмэ, джы зыкI пособиеу щытыщт.

Къэралыгъо фэIо-фашIэхэм япортал агъэфедэзэ ны-тыхэм лъэIу тхылъхэр атынхэ алъэ­кIыщт. ЦIыфыр зэрыпсэун ылъэ­кIыщт ахъщэ анахь макIэм епхыгъ пособиеу агъэнафэрэр. А ахъщэ анахь макIэм фэдиз мазэ къэс къызфэкIонхэри щыIэх.