Медицинэ IэпыIэгъу псынкIэм ыкIи медицинэ катастрофэхэмкIэ Адыгэ республикэ гупчэм иврачхэр шъолъырым щыпсэухэрэм япсауныгъэ къаухъумэным сыдигъуи фэхьазырых.

АР-м псауныгъэр къэухъумэгъэнымкIэ и Министерствэ къызэритыгъэмкIэ, илъэсыкIэ мэфэкI ыкIи зыгъэпсэфыгъо мафэхэу кIуагъэхэм медицинэ IэпыIэгъу псынкIэм иIофышIэхэм нэбгырэ 6340-мэ яфэIо-фашIэхэр афагъэцэкIагъ. Мыщ фыкъоныгъэ закъохэр арэп хэтхэр, шъобжхэри, хэужъыныхьэгъэ узхэм ябырсырыгъуи, пэтхъу-Iутхъум ыкIи гу-лъынтфэ узхэм агъэгумэкIыхэрэми IэпыIэгъу арагъэгъотыгъ.

— Зыгъэпсэфыгъо мафэу кIуагъэхэм чэщ-зымафэм гъогогъу 800 — 900-рэ къа­фытеуагъэх. Пэтхъу-Iутхъум ыкIи гриппым япхыгъэу республикэм эпидемиологиемкIэ изытет нахь къызэрэзэIыхьагъэм ар епхыгъ, — къыщаIуагъ псауныгъэр къэ­ухъумэгъэнымкIэ шъолъыр министерствэм.

2022-рэ илъэсым тыгъэгъазэм и 30-м къыщегъэ­жьагъэу 2023-рэ илъэсым щылэ мазэм и 9-м нэс медицинэ IэпыIэгъу псынкIэм иврачхэм нэбгырэ 296-рэ сымэджэщхэм ащагъэх. Ахэм ащыщэу 46-м яшъхьэкуцI лъыкъекIокIын зэщыкъуагъ ыкIи гум зэригъэгумэкIыхэрэм, адрэ пчъагъэу сымэджэщым ращэлIагъэхэм янахьыбэр зэпахырэ узхэм япхы­гъагъ. Мы уахътэм Iофхэм язытет нахь зыпкъ иуцуагъ ыкIи чэщ-зымафэм закъыфэзыгъазэхэрэм япчъагъэ 400-500-м нэс къеIыхыгъ.

Мобильнэ отрядым сыдигъуи гъэлъэшыгъэ шIыкIэм тетэу Iоф ышIэным фэхьазыр.