Лъапсэр агъэунэфы

2023-рэ илъэсым щылэ мазэм и 11-м сыхьатыр 21.45-м, Мыекъуапэ и МВД идежурнэ часть иотдел макъэ къырагъэIугъ урамхэу «2-я Короткая» ыкIи «Дорожная» зыфиIохэрэр зыщызэуалIэхэрэм дэжь аварие къыщыхъугъэу.

Къэралыгъо автоинспекцием икъулыкъушIэхэм пэшIорыгъэшъэу зэрагъэунэфыгъэмкIэ, илъэс 23-рэ зыныбжь кIалэу Мыекъуапэ щыщыр ГАЗ-3102-м ируль кIэрысэу къызщигъэзэщтым, автомобилэу «Ладэм» еутэкIыгъ.

Мы хъугъэ-шIагъэм ыпкъ къикIэу «Ладэм» исыгъэ бзылъфыгъэу илъэс 30 зыныбжьым шъобжхэр тещагъэхэу сымэджэщым ащагъ.

Мы мэфэ дэдэм джыри зы гъогу хъугъэ-шIагъэ къэхъугъэу Мыекъопэ районым и МВД идежурнэ часть иотдел къэбар къыIэкIэхьагъ. Илъэс 86-рэ зыныбжь хъулъфыгъэм автомобилыр фэмыгъэIорышIэу ыпэ къикIырэ машинэм еутэкIыгъ. Мы хъугъэ-шIагъэм ыпкъ къикIэу илъэс 85-рэ зыныбжь бзылъфыгъэм шъобжхэр тещагъэхэу сымэджэщым чIэфагъ.

Къэралыгъо автоинспекцием гъогу хъугъэ-шIэгъи­тIумкIэ уплъэкIунхэр регъэкIокIы, ахэм лъапсэ афэхъу­гъэр зэхефы.

Имые картэм ахъщэр рихыгъ

АР-м иполицие идежурнэ часть Мыекъуапэ щыщ илъэс 49-рэ зыныбжь хъулъфыгъэм зыфигъэзагъ. Ащ къызэриIуагъэмкIэ, банкым къыритыгъэ картэм илъ ахъщэр зэрэрахыгъэм фэгъэхьыгъэ къэбар ителефон къэкIуагъ.

Ежь хъулъфыгъэм икартэ зыгорэм къыщычIина­гъэу ыгъотыжьыщтыгъэп. ЗэкIэмкIи рахыгъэр сомэ мин 14-м ехъу.

Полицием икъулыкъушIэхэм лъыхъун Iофтхьабзэу зэрахьагъэхэм къакIэлъыкIоу ыпэкIэ хьапс зытелъыгъэ илъэс 27-рэ зыныбжь хъулъфыгъэр къаубытыгъ. Ащ къызэриIуагъэмкIэ, картэр къыгъотыгъ, ахъщэр къырихызэ ежь зыфаем пэIуигъэхьагъ.

Мы лъэныкъомкIэ следствием уголовнэ Iоф къызэIуихыгъ. Санкцием къызэригъэнафэрэмкIэ, илъэси 6-м нэс хьапс хъулъфыгъэм тыралъхьан алъэкIыщт.

АР-м хэгъэгу кIоцI IофхэмкIэ и Министерствэ шъугу къегъэкIыжьы, картэр шъушIокIодыгъэмэ псынкIэ Iофэу банкым зафэжъугъаз ыкIи ащ ахъщэр рамыхышъунэу яжъугъэшI.

ГъэпцIагъэ зезыхьагъэр къаубытыгъ

2022-рэ илъэсым тыгъэгъазэм Урысыем и МВД иотделэу Мыекъуапэ щыIэм идежурнэ часть Ростов хэкум щыщ бзылъфыгъэу илъэс 45-рэ зыныбжьым зыкъыфигъэзагъ. Ащ къариIуагъ гъэпцIагъэ зыхэлъ бзэджэшIагъэ къызэрэдызэрахьагъэр.

Уголовнэ лъыхъуным икъулыкъушIэхэм зэрагъэунэфыгъэмкIэ, гъэрекIо, гъатхэм, бзылъфыгъэр Мыекъуа­пэ щыщ хъулъфыгъэм нэIуасэ фэхъугъ. ТIэкIурэ зэдэгущыIагъэхэу хъулъфыгъэр бзылъфыгъэм елъэ­Iугъ ахъщэ чIыфэ къыритынэу ыкIи риIуагъ бэ тыримыгъа­шIэу къыритыжьынэу. Сыдэу щытми, бзылъфыгъэм ышIошъ ыгъэхъуи, сомэ мин 220-рэ ащ къыIихыгъ, ау уахътэу зыщыритыжьыщтыр къызэсым, хъулъфыгъэм зигъэкIодыгъ.

КъулыкъушIэхэм лъыхъун Iофтхьабзэу зэрахьагъэхэм яшIуагъэкIэ зэгуцафэхэрэ хъулъфыгъэр къаубытыгъ, ищ илъэс 39-рэ ыныбжь, ыпэкIэ хьапс телъыгъ.

Урысыем и МВД иотделэу Мыекъуапэ щыIэм хъулъ­фыгъэм уголовнэ Iоф къыфызэIуихыгъ.

Адыгеим иполицие икъулыкъушIэхэм цIыфхэм закъы­фагъазэ сакъыныгъэ къызхагъэфэнэу, амышIэрэ цIыфым цыхьэ фамышIынэу. ЗыгорэкIэ бзэджэшIагъэ къадызэрахьагъэу егуцафэхэмэ полицием ителефон номерэу 02-м (мобильнэ номерэу 102-м) теонхэу къяджэх.

Ешъуагъэу ятIуа­нэу къагъэуцугъ

Автомобиль гъогоу «Мыекъуапэ — Псыбай» зыфиIорэм ия 104-рэ километрэ, поселкэу Майскэм пэгъунэгъоу, Адыгеим и Къэралыгъо автоинспекторхэм къулыкъур щахьызэ Краснодар краим щыщ хъулъфыгъэу илъэс 30 зыныбжьыр иавтомобиль исэу къагъэуцугъ. Хъулъфыгъэр ешъуагъэу рулым зэрэIусым къулыкъушIэхэм гу лъатагъ. Медицинэ уплъэкIуныр рагъэшIынэу ащ зыраIом, къафезэгъыгъэп.

КъулыкъушIэхэм уплъэкIунэу ашIыгъэхэм къызэрагъэлъэгъуагъэмкIэ, 2021-рэ илъэсым ешъуагъэу къагъэуцуи хъулъфыгъэм административнэ Iоф къыфызэIуахыгъагъ. Ащыгъум машинэр зэрифэн фимытэу иправэ Iахыгъагъ.

Къэралыгъо автоинспекторхэм къаугъоигъэ материалхэмкIэ Урысыем и МВД имежмуниципальнэ отдел уголовнэ Iоф къызэIуихыгъ. Санкцием къызэригъэ­нафэрэмкIэ, илъэси 3-м нэс хьапс хъулъфыгъэм ра­гъэхьын алъэкIыщт.

Адыгеим иполицие водительхэм агу къегъэкIыжьы, ешъуагъэу къызагъэуцухэкIэ тазыр ин зэратыралъхьащтыр ыкIи машинэр зэрафэн фимытхэу правэр зэраIахыщтыр.

Лъыхъуным щыIэхэр къагъотыжьыгъэх

АР-м хэгъэгу кIоцI IофхэмкIэ и Министерствэ зэхищэгъэ пэшIорыгъэшъ Iофтхьабзэу «Лъыхъун» зыфиIорэм икIэуххэр зэфихьысыжьыгъэх.

Iофтхьабзэм дакIоу Адыгеим иполицие икъулыкъу­шIэхэм зыдэщыIэхэр амышIэу кIодыгъэхэм ялъыхъун фэгъэхьыгъэ Iофтхьабзэхэри рагъэкIокIыгъэх.

Адыгеим иполицие икъулыкъушIэхэм дэкIыгъо Iоф­тхьабзэу зэрахьагъэхэм яшIуагъэкIэ федеральнэ ыкIи шъолъыр лъыхъуным щыIагъэхэм ащыщэу нэбгыри 7-р зыдэщыIэхэр агъэунэфыгъ ыкIи къаубытыгъэх. Ащ нэмыкIэу зыдэщыIэр амышIэу кIодыгъагъэ нэбгыри 7 къагъотыжьыгъ.

Наркотик грамм 60-м ехъу ­къырахыгъ

Къэбарэу къаIэкIэхьагъэмкIэ уплъэкIунхэр ашIызэ АР-м хэгъэгу кIоцI IофхэмкIэ и Министерствэ наркотикхэм хэбзэнчъэу ягъэзекIон лъыплъэрэ отделым илъэс 35-рэ зыныбжь хъулъфыгъэм иунэ наркотик зыхэлъ пкъыгъо къырагъотагъ.

Эксперт-криминалистхэм зэрагъэунэфыгъэмкIэ, къыпкъырахыгъэр наркотик лъэпкъэу «марихуанэр» грамм 60-м ехъущтыгъ.

Урысыем и МВД иотделэу Мыекъуапэ щыIэм уголовнэ Iоф къызэIуихыгъ, илъэси 3-м нэс хьапс хъулъ­фыгъэм тыралъхьан алъэкIыщт.

Адыгеим иполицие цIыфхэм закъыфегъазэ, хэбзэнчъэу наркотикыр къезыгъэкIокIыхэрэм, IузыгъэкIыхэрэм ыкIи ар зыгъэфедэхэрэм ащыгъуазэхэмэ полицием идежурнэ часть ителефон номерхэу (8772) 57-17-27-м, 59-62-54-м е номерэу 02-м (мобильнэ номерэу 102-м) къытеонхэу.

Зыгъэхьазырыгъэр КIАРЭ Фатим.