Лъэпкъ проектэу «Демография» зыфиIорэр агъэцакIэзэ, IофшIэн ягъэгъотыгъэнымкIэ гупчэхэм япшъэрылъхэр фэшъхьафхэу, шэпхъакIэмэ атетхэу кадрэхэр зыщагъэхьа­зырхэрэ гупчэ мэхъужьых.

Ахэр экономикэм зэ­хъокIыныгъэу фэхъухэрэм, IофшIэпIэ чIыпIэхэм IофыгъуакIэу къащырахьыжьэ­хэрэм нахь афытегъэ­псы­хьагъэх. КъулыкъушIапIэр зычIэт унэм изакъоп, Iофэу агъэцакIэрэр зэрэ­псаоу зэрахъокIы.

Ащ фэдэ зэблэхъу­ныгъэхэр зыщашIыгъэмэ ащыщ Адыгэ Республикэм IофшIэн ягъэгъотыгъэ­нымкIэ и Гупчэ икъутамэу Тэхъутэмыкъое районым щыIэр, ащ илэжьакIэ икIыгъэ илъэсым икIэухым ехъулIэу нэмыкI шъыпкъэ хъугъэ.

Технологическэ инновациеу щыIэхэр агъэфе­дэхэзэ цIыфхэм IофшIэн ягъэгъотыгъэнымкIэ екIо­лIакIэхэр къагъотыгъэх, IофшIэн лъыхъухэрэмрэ ар язытыхэрэмрэ зэра­щэ­лIэнхэ алъэкIы. Ащ фэ­дэ шIыкIэм мы илъэсым иапэрэ мафэхэм къащегъэжьагъэу техьагъэх.

— Кадрэхэм япхыгъэ къулыкъушIэхэр ары Iоф­шIэпIэ чIыпIэ зиIэхэм джы IэпыIэгъу афэхъухэ­рэр. Электроннэ шIыкIэм тетэуи IофшIапIэ къязытыхэрэм IофышIэхэр къафагъотынхэ амал яIэ хъу­гъэ, ахэм афэгъэзэгъэ упчIэжьэгъу къулы­къушIэхэр тIоу гощыгъэх: зыхэр IофшIэн къязытырэмэ, адрэхэр лъыхъухэ­рэмэ афэгъэзагъэх, — къыщаIотагъ АР-м Iоф­шIэн ягъэгъотыгъэнымкIэ и Гупчэ.

Ведомствэм къызэращаIуагъэмкIэ, псэолъэ­шIыным, сатыум, псауныгъэм икъэухъумэн ыкIи гъэсэныгъэм алъэныкъокIэ лэжьэнхэ зылъэкIыщт IофышIэхэр ары тапэкIэ нахь зыщыщыкIэнхэу Адыгэ Республикэм ща­гъэнафэрэр.