Народнэ депутатхэм якъэлэ Совет изичэзыу я VII-рэ сессие муниципальнэ образованиеу «Адыгэкъалэ» ипащэ тыгъуасэ щыхадзыгъ.

Хэдзыныр зэпхыгъагъэр джырэкIэ Адыгэкъалэ ипащэу ЛIыхэсэ Махьмуд ежь ишIоигъоныгъэкIэ иIэнатIэ къызэ­ригъэтIы­лъыжьыгъэр ары. Тыгъуа­сэ щыIэгъэ зэхэсыгъом ари хэлэжьагъ.

Къэлэ Советым итхьаматэу ТIэшъу Аскэр сессиер зэрищагъ. Ащ иIоф­шIэн джащ фэдэу хэлэжьагъэх Адыгэ Рес­публикэм и Комитетэу чIыпIэ зы­гъэ­IорышIэжьынымкIэ къулыкъухэм адэлажьэрэм итхьаматэу, муниципальнэ образованиеу «Адыгэ­къалэ» ипэщэ IэнатIэ Iуа­гъэхьащтым икъыхэхын фэгъэзэгъэ комиссием итхьа­матэу КIэдыкIое Рус­лъан, Теуцожь районым ипрокурорэу Антон Ле­бедевыр, АР-м и Къэралыгъо Совет — Хасэм идепутатхэу Мыгу Адамрэ Джанхъот Аслъанрэ.

Комиссием Адыгэкъалэ ипэщэ Iэна­тIэкIэ нэбгыри­тIу ыгъэнэфэгъагъ — Хьач­мамыкъо Азэматрэ Хъуадэ Айдэмыррэ. Депутатхэм шъэф мэкъэтынкIэ къалэм ипащэ хадзыгъ. Сессием хэлэжьэгъэ депутат 14-ми амакъэ Хьачмамыкъо Азэмат, джырэ нэс Теуцожь районым ипа­щэу щытыгъэм, фатыгъ.

Пащэу хадзыгъэм иполномочиехэм япIалъэ илъэ­си 5 мэхъу. Джырэ пащэу ЛIыхэсэ Махьмуд ипол­номочиехэм япIа­лъэ зикIыкIэ, щылэ мазэм и 24-м къыщегъэжьагъэу ащ ипшъэрылъхэр зэри­гъэцэ­кIэщтхэмкIэ къалэм иадминистрацие ипресс-къу­лыкъу макъэ къыгъэIугъ.

— Хьачмамыкъо Азэмат пащэу зэ­рэхадзыгъэм­кIэ сыгу къыздеIэу сыфэгушIо, Адыгэкъали, ащ щыпсэухэрэми апае гъэ­хъагъэхэр ышIынэу сыфэ­­лъаIо. Ар къызэрэдэ­хъущтым сицыхьэ телъ, — къыIуагъ ЛIыхэсэ Махьмуд.

Шъугу къэтэгъэкIыжьы, Хьачмамыкъо Азэмат илъэс 52-рэ ыныбжь, 2010-рэ илъэсым къыщегъэжьагъэу 2023-рэ илъэ­сым нэс Теуцожь районым пэщэныгъэ дызэрихьагъ.

Хьачмамыкъо Азэмат Щамсудин ­ыкъор 1970-рэ илъэсым бэдзэогъум и 4-м къуаджэу Пэнэжьыкъуае къыщы­хъугъ. ЛэжьэкIо Бы­ракъ Плъыжьым иорден къызыфагъэшъошэгъэ Пшызэ аграр универси­тетыр 1993-рэ илъэсым къыухыгъ. Iахьзэхэлъ обществэу «Пэ­нэжьыкъое гъомылэпхъэшI комбинатым» имастерэу IофшIэныр ыублагъ. 2004-рэ илъэсым къыщегъэжьа­гъэу Iахьзэхэлъ обществэу «Кубаньэнерго» икъутамэ инженерэу щылэжьагъ. 2007-рэ илъэсым игъэтхапэ къыщегъэжьагъэу муниципальнэ образованиеу «Теуцожь районым» иадминистрацие ипащэ иапэ­рэ гуадзэу щытыгъ. 2010-рэ илъэсым ищылэ мазэ къыщыублагъэу Теуцожь районым ипащэ ипшъэ­рылъхэр ыгъэцэкIагъэх, 2011-рэ илъэсым итыгъэгъазэ къыщегъэжьагъэу а районым ипэщагъ. Унагъо иI, сабыищ епIу.