Хэти игукъэкIыжь шъхьаIэхэм ахэт еджапIэу зыщеджагъэр, икIэлэегъэджагъэхэр, етIэфкIэ тхыхьэгъэ доскэр, оценкэхэр къыздагъэуцощтыгъэ дневникыр, апэрэ шIулъэгъур зыщаушэтыгъэр…

Илъэс тIокIищ хъугъэу кIэлэегъэджэ сэнэхьатым фэшъыпкъэу рэлажьэ ХьакIэмызэ Нуриет Мухътарэ ыпхъур. Ичылэ гупсэу Бжыхьэкъоежъым дэт еджапIэм 1962-рэ илъэсым пионервожатэ шъхьаIэу IофшIэныр щыригъэжьэгъагъ. ИлъэсиплIырэ ащ Iоф зыщешIэ ужым поселкэу Инэм зыкъыгъэзэ­жьынэу хъугъэ. Инэм еджа­пIэу N 6-м (ащыгъум N 16-м) 1968-рэ илъэсым нэс а IофшIэн дэдэр щигъэцэкIагъ, нэужым кIэлэегъэджэ институтыр къыухыгъ ыкIи а еджапIэм биологиер щаригъэхьынэу регъажьэ.

Нуриет нэгушIоу, шIыкIашIоу щыт, мыкIосэрэ мэшIо дахэ горэ ыгу къыщэблэ ифэбагъэ укъыгъэфабэу. Гъунэ зимыIэр игукIэгъу. Зы лъэбэкъу ыдзы­гъэн фаеп имыхьамелэ ыпэ имытэу. ЩыкIэрэм иIэпыIэгъу: уихъяр­мэ, къыб­дэгушIон, уикъинмэ, къыбдиIэтын.

ШIыкIэ-амал зэфэшъхьафхэр ыгъэфедэхэзэ, сабыеу ригъаджэхэрэм шIэныгъэхэр апегъохых. УпчIэ гъэшIэгъонхэр, гупшысэ куухэр къафегъэтэджых ригъаджэхэрэм, нэмыкI литературэхэр агъэфедэхэзэ пшъэрылъэу афигъэуцу­хэрэр зэшIуахых. Темэ гъэнэфагъэу акIурэм ехьылIагъэу щыIэ пстэур аугъо­ин, нахь шъхьаIэр къыхахын, еплъыкIэу фыряIэр къыраIотыкIын, къырагъэлъэгъукIын алъэкIынэу егъасэх. Зэфэхьысыжь гъэнэфагъэхэр арегъэшIых, яеп­лъыкIи къаушыхьатыжьын алъэкIынэу регъасэх.

Тыкъэзыуцухьэрэ чIыопсым идэхагъэ зэхарегъашIэ, икъэухъумэн фещэх. Къэ­кIырэ лъэпкъ гори рамычынэу, бзыуи, псэушъхьэ цIыкIуи яягъэ арамыгъэкIынэу епIух. «Тхылъ Плъыжьым» дагъэхьагъэ пэпчъ зэрагъэшIэн, къаухъумэн зэрэфаем анаIэ тарарегъадзэ. КъэкIырэ пэпчъ кIэ жъгъэеу къыпызыгъи, жьыбгъэм къылъэси чIым тефагъи къэкIын, заушъомбгъун, къэ­гъэгъэ дахэхэри къапыкIэн, тын бэгъуагъи къытпагъохын зэралъэкIыщтыр апашъхьэ къырегъэуцо.

IэпкIэ-лъапкI ыныбжь емылъытыгъэу (илъэс 80 хъугъэ). ИIофшIакIэ зэрэщысэтехыпIэм, уасэ зэрэфашIырэм ишыхьатых медальхэу, щытхъу тхылъэу къыфагъэшъошагъэхэр. ЫгъэлъэпIэрэ шIухьафтын шъхьаIэмэ ащыщых бгъэхалъхьэу «За верность профессии» зыфиIоу Урысыем гъэсэныгъэмкIэ и Министерствэ къыфигъэшъошагъэр, медальхэу «Почетный работник образования РФ», «100 лет РА» зыцIэхэр. Къэпчъыгъуай, къэлъытэгъуай Нуриет игъэхъагъэхэр. Илъэс 22-рэ а зы еджапIэм Iоф щыдэсшIагъ, сырэгушхо ащ фэдэ цIыф гъусэу зэрэ­сиIагъэм.

Унэгъо дахэ зэдашIагъ Нуриетрэ Сулейманрэ. ЗэдапIугъэ сабыиплIыр щыIэныгъэм лъэпсэ дахэ щызыдзыгъэ­мэ ащыщых. Ахэм къакIэхъухьэгъэ сабый дышъэхэр Нуриет ипытапIэх. 2017-рэ илъэсым къа­фагъэшъошагъ медалэу «За любовь и верность» зыфиIорэр.

Непэ анахь гущыIэ лъапIэу, нахь гъэшIуагъэу сыгу къыщыджэхэрэр есIомэ сшIоигъу Нуриет. КъэIогъошIоп, тхыгъошIоп щытхъу усэр. Узфэусэрэм, узфэразэм елъытыгъ угу къыщыущырэ гупшысэхэр. ГукъэкIыжьэу узщесырэм гупсэфэу хэбгъуатэрэм, бзэрабзэу убзэ къетIатэ. ГукIэгъоу къыс­фыуиIагъэр тыгъэм инурэу сыгу къыщепсы. УишIушIэ сигъашIэ дэбагъо, сишъаомэ ягукъэкIыжь лъапI. Згъэлъа­пIэу, Мухътарэ ыпхъоу Нуриет! Сыпфэразэу сыпфэусэ непэ. Сигуапэу уицIы­фыгъэ апэсэгъохы гъэзетеджэхэм. СыпфэлъаIо уищы­IакIэ кIэракIэу, уисабыйхэм насыпыр къяшIэкIыгъэу, уишIушIагъэ уищыIэныгъэ гъогу къызэлъигъэ­нэфэу, уигупсэмэ уадатхъэу упсэунэу.

ЦУШЪХЬЭ Гощэхъурай.