Социальнэ гумэкIыгъохэм ядэгъэзыжьын пэIуа­гъэхьанэу икIыгъэ илъэсым икIэуххэм адэжь унэе предприниматель нэбгырэ 12-мэ ыкIи зы хъызмэт­шIапIэ грантхэр аратыгъэх, зэкIэмкIи сомэ миллиони 6,2-рэ.

АР-м экономикэ хэхъоныгъэмкIэ ыкIи сатыумкIэ и Министерствэ къызэрэщаIуагъэмкIэ, предпринимательмэ аратыгъэ грантхэмкIэ псэупIэхэр бэджэндэу аштэнхэ е агъэцэкIэжьынхэ алъэкIыщт, Iэмэ-псымэу ящыкIагъэхэр, агъэпсэолъэщт техникэр ащэфы хъущт. Джащ фэдэу медтехникэу ящыкIагъэр, протезно-ортопедическэ пкъыгъохэр зэрагъэгъотышъу­щтых, сэкъатныгъэ зиIэхэр зэрэзэращэщтхэ транспортыр а Iофым фытегъэпсыхьагъэмкIэ зэблахъу­жьынэу, коммунальнэ фэIо-фашIэмэ ауасэ атынэу амалхэр яIэщтых.

«Предпринимательствэ цIыкIур ыкIи гурытыр» зыфиIорэ лъэпкъ проектым ишIуагъэкIэ 2022-рэ илъэ­сым тикъэралыгъо щылэжьэрэ хъызмэтшIэпIэ мини 2,2-мэ грантхэр аратыгъэх, джы ахэм шIушIэ Iоф­тхьабзэхэр зэрахьэх, социальнэ гумэкIыгъоу щыIэхэр нахь макIэ зэрашIыщтым пылъых.

«2023-рэ илъэсым грант IэпыIэгъоу щыIэр къагъэнэжьыщт. Ар къызэратыщтхэм япчъагъи зеушъом­бгъу — социальнэ хъызмэтшIапIэкIэ алъытагъэхэм афэдэу сэкъатныгъэ зиIэ сатыушIхэри а IофыгъошIум къыхэлэжьэнхэ алъэкIыщт, грант IэпыIэгъур къа­лэжьыщт, ежьхэм анэмыкI яIофшIапIэмэ аIумыты хъумэ», — къыIуагъ экономикэ хэхъоныгъэмкIэ Урысыем иминистрэ игуадзэу Татьяна Илюшниковам.

Грант IэпыIэгъур зытефэхэрэр, социальнэ сатыушI статусыр къыдэхыгъэным пае ищыкIагъэм, а Iофыгъохэм афэгъэхьыгъэ игъэкIотыгъэ къэбархэм «Мой бизнес» зыфиIорэ Гупчэм зыщыщагъэгъозэн алъэ­кIыщт. Цифрэ платформэу МСП.рф. зыфиIорэм «иунэе кабинет» ихьэхэрэми къэбарыр рагъотэщт.