Урысые печатым и Мафэ республикэм и Правительствэ зычIэт унэм журналистикэм ылъэныкъокIэ Адыгеим и ЛIышъхьэ ишIухьафтынхэр зыфагъэшъошагъэхэм щаратыжьыгъэх, почтэм, хаутырэ, телевизионнэ къэбарлъыгъэIэс амалхэм ялIыкIохэр зыхэлэжьэгъэ Iэнэ хъурайи щызэхащагъ. Адыгеим и ЛIышъхьэу КъумпIыл Мурат зэIукIэр зэрищагъ.

Iофтхьабзэм хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженецрэ ащ игуадзэу Къонэ Зауррэ, АР-м финансхэмкIэ иминистрэу Виктор Орловыр, АР-м лъэпкъ IофхэмкIэ, IэкIыб къэралхэм арыс тилъэпкъэгъу­хэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэ­лэхъо Аскэр, Урысыем ипочти, федеральнэ, республикэ, муниципальнэ къэбарлъыгъэIэс амалхэми ялIыкIохэр.

Джащ фэдэу зэIукIэм хэлэ­жьагъ Урысыем IофшIэнымкIэ и ЛIыхъужъэу, Адыгеим итха­кIохэм я Союз итхьаматэу, АР-м илитературнэ-художественнэ, икIэлэцIыкIу журналхэм яредакцие иредактор шъхьаIэу, общественнэ IофышIэу МэщбэшIэ Исхьакъ.

ЗэIукIэм хэлажьэхэрэм шIу­фэс къарихи, Адыгеим и ЛIышъхьэ республикэм ижурналистхэм урысые печатым и МафэкIэ къафэгушIуагъ. АР-м ипащэ зэ­рэхигъэунэфыкIыгъэмкIэ, къэбар жъугъэм икъэралыгъо амалхэм хабзэмрэ обществэмрэ нахь зэрапхых, обществэм хэлъ зэгурыIоныгъэр нахь агъэпытэ.

«Пандемием илъэхъан Iэпэ­Iэсэныгъэшхо зэрэшъухэлъыр икъоу къэжъугъэлъэгъуагъ, охътэ кIэкIым къыкIоцI узым икъэбар цIыфхэм алъыжъугъэ­Iэсын шъулъэкIыгъ. Коронавирусым ебэныжьыгъэнымкIэ къэбарэу ящыкIагъэр псынкIэу цIыфхэм аIэкIэжъугъахьэ­щтыгъ. ГъэрекIо имэзэ къызэрымыкIохэми тицыхьэ къы­шъутелъыгъ. БлэкIыгъэ илъэсыр псынкIагъэп — Адыгэ Республикэр илъэси 100 зэ­рэхъурэр хэдгъэунэфыкIыгъ. Юбилей Iофтхьабзэхэр зэкIэ игъэкIотыгъэу хаутырэ, электрон тедзэгъухэмкIэ, телевидениемкIэ, социальнэ хъытыу­хэмкIэ къагъэлъэгъуагъэх», — къыIуагъ КъумпIыл Мурат.

АР-м и ЛIышъхьэ зэрэхигъэу­нэфыкIыгъэмкIэ, республикэ къэбарлъыгъэIэс амалхэм хэгъэ­гум санкцие къызырашIылIэгъэ лъэхъаным Адыгеим изигъо Iо­фыгъохэр, мобилизацием къы­хиубытагъэхэмрэ ахэм яунагъо­хэмрэ IэпыIэгъу зэрафэхъухэрэр лъэныкъо пстэури къызэлъиубытэу къырагъэлъэгъукIыгъ.

Къэбар нэпцIхэм ягъогупэ пыбзыкIыгъэнымкIэ, медиаформатыкIэхэр къызфэгъэфедэгъэн­хэмкIэ, республикэм иполитическэ, иобщественнэ, икультурэ хъугъэ-шIагъэхэм яхьылIэгъэ къэбархэр икъоу алъыгъэIэсыгъэнхэмкIэ Адыгеим ижурналистхэм Iофышхо зэрашIагъэр шъхьафэу зэIукIэм щыхагъэунэфыкIыгъ.

КъумпIыл Мурат зэIукIэм къызэрэщиIуагъэмкIэ, муниципальнэ къэбарлъыгъэIэс амал­хэм яIофышIэхэм ялэжьапкIэ къэIэтыгъэнымкIэ пшъэрылъэу афишIыгъэр къалэхэмрэ районхэмрэ япащэхэм гъэрекIо агъэ­цэкIагъ. Джащ фэдэу мы илъэсым къыщегъэжьагъэу респуб­ликэ гъэзетхэу «Адыгэ макъэм­рэ» «Советскэ Адыгеимрэ» яредакциехэм яIофышIэхэм ялэжьэпкIэ фонд къыхэхъощт. Ахэр мылъкукIи техникэкIи нахьышIоу зэтегъэпсыхьэгъэнхэм пае сомэ миллиони 2,5-рэ къафатIупщыщт. Мы охътэ благъэм ахэм автотранспортыкIэ къафащэфыщт. Мыекъопэ къэлэ телевидениери агъэкIэжьыщт.

Республикэм и ЛIышъхьэ ишIухьафтын икъыдэхынкIэ зэнэкъокъум щатекIуагъэхэм къатегущыIэзэ, КъумпIыл Мурат зэнэкъокъум хэлэжьэгъэ пстэуми тхьашъуегъэпсэу ариIуагъ. Республикэм ижурналистхэм яIэпэIэсэныгъэ зыкъызэриIэ­тыгъэр, ахэр яIоф нахь зэрегу­гъу­хэрэр зэIукIэм къыщыхагъэ­щыгъ.

Зэнэкъокъум икIэуххэм ате­тэу мыгъэ АР-м и ЛIышъхьэ ишIухьафтын фагъэшъошагъ Къэралыгъо телерадиокомпаниеу «Адыгеим» иавтор куп (журналистэу Къудаикъо Алый, режиссерхэу Оксана Ступкинамрэ ЕмкIуж Анзоррэ, видеоинженерэу Ольга Ефимовам) Адыгэ Республикэм ия 100-рэ илъэс фэгъэхьыгъэ фильмэу «Становление» зыфиIорэр зэрагъэу­цугъэм фэшI. ГъэзетхэмкIэ шIухьафтыныр къыфагъэшъо­шагъ «Майкопские новости» иредактор шъхьаIэу Мария Куренинам истатьяу «Мирные. Из Мариуполя с любовью» зыфиIорэм пае.

КъумпIыл Мурат къызэрэхигъэщыгъэмкIэ, IофшIэгъитIури зигъо Iофыгъохэм афэгъэхьыгъагъэх, IэпэIэсэныгъэшхо ахэлъэу ахэм адэлэжьагъэх.

Республикэм ипащэрэ къэбар жъугъэм иамалхэм ялIыкIохэмрэ республикэм къыщыхъурэ хъугъэ-шIагъэхэм яхьылIэгъэ къэбархэр алъыгъэIэсыгъэнхэмкIэ, журналист коллективхэм язигъо IофыгъохэмкIэ еплъыкIэу яIэхэр къыраIотыкIыгъ. Адыгеим и ЛIышъхьэ муниципалитет пэпчъ иIофхэм язытет, зэхъокIыны­гъэу афэхъугъэхэм, цIыфхэмрэ общественнэ организациехэмрэ чIыпIэ хэбзэ къулыкъухэм зэдэ­лэжьэныгъэу адыряIэм къа­кIэупчIагъ.

Гъэзетхэм, журналхэм зэра­кIатхэхэрэм, почтэхэм гъэзетхэр, журналхэр, письмэхэр нахьышIоу цIыфхэм аIэкIагъэ­хьанхэм, журналист IофшIагъэ­хэм ягугъунхэм, республикэм исоциальнэ-экономикэ Iофхэм язытет лъэныкъо пстэури къыдалъытэзэ къэгъэлъэгъогъэнхэм япхыгъэ Iофыгъохэми шъхьафэу атегущыIагъэх.

КъумпIыл Мурат журналистхэм къяджагъ обществэр зыфэныкъохэм нахь лъэшэу анаIэ атырагъэтынэу, мэкъу-мэщым щылажьэхэрэм, къоджэ интеллигенцием илIыкIохэм, рабочэ сэнэхьатхэм арылажьэхэрэм яIофшIэн нахь игъэкIотыгъэу къагъэлъэгъонэу.

Адыгеим и ЛIышъхьэ респуб­ликэм ыцIэ чыжьэу зыгъэIурэ товархэм яIугъэкIын журналистхэм нахь лъэшэу анаIэ тырагъэ­тыным, хъугъэ-шIагъэхэр нахь икъоу зэхафыным мэхьанэшхо зэряIэр къыхигъэщыгъ.

АР-м и ЛIышъхьэ ипресс-къулыкъу