Адыгеим иятIонэрэ къалэу Адыгэкъалэ ипащэу ЛIыхэсэ Махьмудэ нэмыкI IофшIапIэ зэрэIухьэрэм къыхэкIэу къалэм иактив зэфэхьысыжь зэIукIэ джырэблагъэ дыриIагъ.

— Мэфэ заулэкIэ сищыIэныгъэ чIыпIэ гъэнэфагъэ щызыубытыгъэ IофшIэныр сыухыщт. Муниципальнэ образованиеу «Адыгэкъалэ» ипэщэ IэнатIэ а чэзыур епхыгъагъ. Ар IофшIэн къиныгъ, ау гъэшIэгъонэу щытыгъ. СыкъызэплъэкIыжьызэ къэсIон слъэкIыщт итхъухьагъэр зэкIэ икъоу джырэкIэ гъэцэкIагъэ зэрэмыхъугъэр. Ау сызэрыгушхон слъэкIыщт гъэхъагъэхэри зэрэщыIэхэм сегъэгушIо, — къыхигъэщыгъ ЛIыхэсэ Махьмуд.

Илъэси 5-м къыкIоцI Iофэу ышIагъэм икIэуххэр зэфихьысыжьхэзэ, ЛIыхэсэ Махьмуд къыIуагъ къалэм ихэхъоныгъэ­кIэ проект пстэуми язэшIо­хынкIэ Адыгеим и ЛIышъхьэу КъумпIыл Мурат ишIуагъэ къы­зэраригъэ­кIыгъэм пае зэрэфэразэр. Ра­хъухьагъэхэм язы­Iахьышхо непи зэшIуахы, къэлэ Iофыгъуабэмэ язэшIохынкIэ ЛIышъхьэм IэпыIэгъоу къариты­гъэм пае инэу ар фэраз. Ана­хьэу къыхигъэщы­гъэр иIофшIэгъухэм, ичIыпIэгъухэм IэпыIэгъушхоу къыратыгъэр ары.

— Адыгэкъалэ иIофхэр нахь дэгъу хъухэзэ зэрэлъыкIотэщтым сехъырэхъышэрэп, сыда пIомэ къалэм итарихъ къаухъумэзэ, джыри нахь хэхъо­ныгъэ ащ рагъэшIыным фэхьазыр цIыфхэр мыщ щэпсэух. Тикъалэ щынэгъончъэу, зэтегъэпсыхьагъэу, щыпсэухэрэмкIи хьакIэу къакIохэрэмкIи гуIэтыпIэу хъунэу сыфай. ТапэкIи бэ джыри зэшIохы­гъэн фаеу щыIэр. ЗэкIэ къызэрадэхъущтым сицыхьэ телъ, — къыхигъэщыгъ ЛIыхэсэ Махьмуд.