Шапхъэхэр къагъэпхъэшагъэх

Ар зыфэгъэхьыгъэр таксихэр ары. Ахэм яIофшIэн зы­гъэIорышIэщт хэ­бзэгъэуцугъакIэм илъэсэу къихьагъэм иIо­ныгъо и 1-м кIуачIэ иIэ хъущт.

Ащ къызэрэдэлъыта­гъэмкIэ, егъэзыгъэ зыхэлъ бзэджэшIагъэ зэри­хьагъэу хьапс зытелъы­гъэр такси рулым кIэры­тIысхьан фитыжьыщтэп. Ащ имызакъоу, таксихэм «шашкэхэр» атетынхэр шIокI зимыIэ Iоф къы­шIыгъ, ахэр зыгъэIоры­шIэрэ организациеу «аг­регаторкIэ» заджэхэрэм пшъэрылъэу яIэхэми къа­хи­гъэхъуагъ.

УФ-м транспортымкIэ и Министерствэ къызэ­ритырэмкIэ, пассажирхэми, ахэр зезыщэхэрэми яфитныгъэхэр къэухъумэгъэнхэм хэбзэгъэуцугъэр тегъэ­псы­хьагъ. Агрегаторхэм яфитыныгъэхэмрэ пшъэрылъэу яIэхэмрэ зэхэугуфыкIыгъэу апэрэу тхыгъэ хъугъэ.

Джы, законыкIэм къызэрэщиIорэмкIэ, ежь-ежьырэу IофшIэн къызфэзгъотыжьыхэрэми (самоза­нятые) автомобиль псын­кIэмкIэ цIыфхэр зэра­щэнхэу фитыныгъэ яIэщт. Шъолъыр мэхьанэ яIэу реестрэ зэфэ­шъхьафищ агъэпсыщт. Зыр таксихэр зыгъэIорышIэхэрэм яреестр, ятIонэрэм автомобиль псынкIэмкIэ цIыфхэр зезыщэхэрэр щыгъэу­нэфыгъэщтых, ящэнэрэр автомобильхэм яреестрэщт.

Ащ тетэу законыкIэм зэкIэри ячIыпIэ къыгъэуцугъэми, «Российская газета» зыфиIорэр зы­дэгущыIэгъэ экспертхэм джыри щыкIэгъабэ щыIэу алъытэ. Iоныгъо мазэм хэбзэгъэуцугъэм кIуачIэ иIэ зыхъукIэ зэпстэур къыгъэлъэгъощт.

Георгиевскэ лентэр зыушъхьакIухэрэм

«Российскэ газетэм» къызэрэхиу­тыгъэм­кIэ, Георгиевскэ лентэр дзэ щытхъум итамыгъэхэм ащыщ шIыгъэным кIэщакIо фэхъугъэхэр «Единэ Россием» и Апшъэрэ Совет исекретарэу Андрей Турчакрэ граждан обществэм изегъэушъомбгъункIэ УФ-м и Къэралыгъо Думэ и Комитет ипащэ игуадзэу Ольга Занкорэ.

ЗаконыкIэм тамыгъэр къэухъумэгъэныр, ащ зиягъэ езгъэкIыхэрэм пшъэ­дэкIыжь ягъэхьыгъэныр ары пшъэрылъ шъхьаIэу иIэр. Джы Георгиевскэ лентэм мыхъун раIолIэныр, цIыфхэм апашъхьэ ар щагъэстыныр, щызэIатхъыныр е щаулъэгуныр, интернет нэкIубгъохэм ащ пае гущыIэ Iаехэр ара­тхэнхэр ушъхьакIугъэкIэ алъытэщт. Ащ фэдэ бзэ­джэшIагъэ зезыхьагъэу къаубытырэм тазырэу ытыщтыр сомэ миллионхэмкIэ къэлъытагъ, илъэсищым нэсэу хьапс тыралъхьани алъэкIыщт. ЦIыф куп зэхэтэу ар ашIагъэмэ, илъэситфым къыщымыкIэу хьапс къа­хьыщт.

ИгъашIэм чIэсыщт

УФ-м и Уголовнэ кодекс зэхъокIы­ныгъэхэр фэзышIыгъэ хэбзэгъэуцугъи щыIэ хъугъэ.

СтатьякIэу ащ хагъэ­хьагъэхэр диверсием хэла­жьэ­хэрэм, ащ зы­фэ­зы­гъасэхэрэм, ащ фэдэ бзэ­джэшIагъэ зехьэгъэным тегъэпсыхьэгъэ обществэхэр зэхэзыщэхэрэм пшъэдэкIыжьэу ахьыщтым фэгъэхьыгъэх.

Диверсантхэм IэпыIэгъу афэхъухэу, ахэм цIыфхэр ахэзыщэхэрэм, Iашэ е мылъку аIэкIэзыгъахьэ­хэрэм егъашIэм чIэсынхэу хьапс атыралъхьащт.

Къэбар зехьанымкIэ, диверсантхэм е ахэм яIа­шэхэм ягъэбылъынкIэ а Iофым хэлэжьагъэхэм илъэси 10-м щыублагъэу 20-м нэсэу хьапс къа­хьыщт.

Диверсие Iофым фе­джагъэхэри егъашIэм чIэ­сынхэу агъэтIысынхэ алъэ­кIыщт, ау зэреджагъэхэр игъом хэбзэ къулыкъухэм алъагъэIэсымэ, ащ фэдэу пхъашэу пшъэдэкIыжьыр ахьыщтэп.

Диверсием пылъ об­ществэ зэхэзыщэхэрэр къызаубытхэкIэ, егъашIэм хьапсым чIэсыщтых, ащ хахьэхэ­рэм илъэси 10 — 20 атыралъхьащт.

Зы тариф яIэщт

Нотариусхэр ары ар зыфэгъэхьы­гъэр. Ахэм яфэIо-фа­шIэхэм ауасэ зэхъокIыныгъэхэр фэшIыгъэнхэм фэ­гъэхьыгъэ законыкIэм тызхэхьэгъэ илъэ­сым ичъэпыогъу мазэ и 1-м кIуа­чIэ иIэ хъущт.

Ащ къызэрэщиIорэмкIэ, джы нота­риусым ыгъэцэкIэрэ фэIо-фашIэхэм ауасэ зы тарифэу щытыщт. Ар къызщиIорэ тхылъыр къыхаутыгъ.

Ащ имызакъоу, нотариусым пшъэ­рылъэу иIэхэри нахь зэхэугуфыкIыгъэу мыщ щыгъэнэфагъэх. ГущыIэм пае, фэIо-фашIэу ыгъэцакIэхэрэр зэкIэ нотариатым и ЗыкI къэбарлъыгъэIэс сис­темэ щитхынхэ фае. Джащ фэдэу чIыфэ зытелъым нотариусыр ишыхьатэу кредитыр къызIихыгъэм мылъку горэ ретымэ, ари, ащ тхылъэу кIигъухэри ыгъэтIылъынхэр ыкIи къыухъумэнхэр шIокI зимыIэ Iофэу ыгъэцэкIэщтхэм ащыщ.

Министрэхэм япшъэрылъхэр

Шъолъыр министрэхэр, депутатхэр е нэмыкIэу пэщэ IэнатIэ зыIыгъхэр ары зигугъу къэтшIырэр.

Илъэсэу къихьагъэм кIуачIэ зиIэ хъущт хэбзэгъэуцугъэм къызэрэщиIорэмкIэ, къолъхьэ тын-Iыхын Iофым ылъэныкъокIэ пшъэрылъэу ахэм яIэхэр нахь агъэпхъэ­шагъэх. Джы ащ фэдэ предложение къызфа­хьыгъэ министрэм, депутатым е нэмыкI пащэм хэбзэухъумэкIо къулыкъухэм шIокI имыIэу макъэ аригъэIун фае.

НэкIубгъор зыгъэхьазырыгъэр ХЪУТ Нэфсэт.