Гощыгъэу къатыжьын алъэкIыщт

Пыдзэфэ пытэхэм ядэщын ыпкIэ игъом къэзымытыгъэу, чIыфэ къызтефагъэхэм ар гощыгъэу къатыжьын амал «ЭкоЦентрэм» къареты.

Ащ фэдэ хэкIыпIэм къезэгъыгъэхэм лъэIу тхылъ къатын фае. Офисхэр зыдэщыIэхэр шъугу къэтэгъэ­кIыжьы: Мыекъуапэ, урамэу Пионерскэр, 297, п­оселкэу Яблоновскэр, урамэу Школьнэр, 10/1. ЛъэIу тхылъым зэрэхэплъэщтхэм мэфищ пIалъэу пылъ. Специалистхэм Iофыр зытетыр зызэрагъашIэрэм ыуж, мэзихым къыкIоцI чIыфэр тIэкIу-тIэкIоу къытыжьынэу фагъэпсы.

— Ащ фэдэ зэзэгъыныгъэ лъэныкъуитIум зызэдашIыкIэ, процентхэр темыхъуагъэхэу чIыфэр зытелъым къытыжьын ылъэкIыщт. Джащыгъум хьыкумым Iофыр нэсырэп, къэралыгъо пошлинэр ытын ищыкIагъэп, — къыIуагъ ООО-у «ЭкоЦентрэм» и Адыгэ шъо­лъыр къутамэ ипащэу Алыбэрд Налбый.

Адыгеир пштэмэ, хэкIыр зэрэдащырэм ыпкIэ зымытыгъэу чIыфэ зытелъхэр абонент мин 55-рэ мэхъу, ахъщэкIэ къэплъытэмэ, ар сомэ миллион 250-м ехъу. Анахьыбэу чIыфэхэр зыщызэIукIагъэхэр къалэу Мые­къуапэ, Тэхъутэмыкъое ыкIи Мыекъопэ районхэр ары.

ЗэхъокIыныгъэ фэхъугъэмэ

Унэм ис нэбгырэ пчъагъэм хэхъуа­гъэмэ е хэкIыгъэмэ шъолъыр опе­ра­­торым макъэ ежъугъэIун фаеу зэрэщытыр джыри зэ шъугу къэтэгъэкIыжьы.

— Ар хэбзэгъэуцугъэм зэхэугуфыкIыгъэу итхагъ. Пыдзэфэ пытэхэр зэрэIуащырэм ыуасэ унэм нэбгырэ пчъагъэу исым къыпкъырыкIхэзэ къалъытэ, ахэм аныбжь ар зыпарэкIи епхыгъэп. Арышъ, сабый къэ­хъугъакIэ унагъом исми, шъолъыр операторым ышIэн фае. ХэткIи шъэфэп кIэлэцIыкIум зызакъо нахьыбэрэ амыгъэфедэрэ пкъыгъуабэ зэрэрахьылIэрэр, джэгуалъ, щыгъын зыфэпIощтхэри хэкIым «макIох». Ныбжь зиIэм нахьи сабыим хэкIэу къыпыкIырэр зэрэнахьыбэр нафэ, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Унэм ис нэбгырэ пчъагъэм зэхъокIыныгъэ фэхъугъэмэ «ЭкоЦентрэм» иофисхэм зафэжъугъэзэн шъу­лъэкIыщт. Ахэр зыдэщытхэр: къалэу Мыекъуапэ, урамэу Пионерскэр, 297, поселкэу Яблоновскэр, урамэу Школьнэр, 10/1. Электроннэ почтэри жъугъэфедэн амал щыI: adg_ecocentr@clean-rf.ru.

Мы илъэсымкIэ зэзэгъыныгъэр

2023-рэ илъэсэу къихьагъэм хэ­кIыр зэрэдащыщтым пае шъолъыр оперторым икIэрыкIэу зэзэгъыныгъэ дэпшIын фаемэ унэе предпринимательхэмрэ юридическэ лицэхэмрэ егъэгумэкIых. Ащ фэшI мы упчIэм иджэуап къеттыжьмэ тшIоигъу.

Шъолъыр операторым ащ фэдэ тхылъ дыкIэтхэныр юридическэ лицом шIокI зимыIэ пшъэрылъэу ыгъэцэкIэн фаехэм ащыщ. Компанием хэкI къизыхыхэрэм зэкIэми ар Iущыгъэным фэгъэхьыгъэ зэзэгъыныгъэ дашIын фае. ХъызмэтшIапIэу хэкIыр зыдищэщт полигон зиIэхэр ары ныIэп мы пшъэрылъыр зынэмысырэр. Ау ахэми хэкIитэкъупIэр къапэблагъэу агъэпсын фае. Сыда пIомэ, пыдзафэхэр зэрищэнхэу фитыныгъэ зиIэр компаниеу «ЭкоЦентрэр» ары ныIэп. Арышъ, юри­дическэ лицэу зиIофшIэн къэзымыгъэуцугъэхэм зэзэгъыныгъэ шъолъыр операторым дамышIынэу е дашIыгъахэр акъутэжьынэу фитыныгъэ яIэп.

Унэе предпринимательхэмрэ юридическэ лицэхэмрэ зэзэгъыныгъэр зэрэбгъэпсыщтыр мы телефонымкIэ къытеохэмэ нахь игъэкIотыгъэу къафаIотэщт: 8-800-707-05-08. Электроннэ почтэмкIи къэтхэнхэ алъэ­кIыщт: adg_ecocentr@clean-rf.ru. Офисхэр зыдэщыIэхэр: къалэу Мыекъуапэ, урамэу Пионерскэр, 297, поселкэу Яблоновскэр, урамэу Школьнэр, 10/1.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.