Урысые политическэ партиеу «Единэ Россием» и Тхьаматэу, Урысые Федерацием щынэгъончъэнымкIэ и Совет и Тхьаматэ игуадзэу Дмитрий Медведевым Урысые Федерацием и Правительствэ и Тхьаматэ игуадзэу Александр Новак игъусэу социальнэ газификациемкIэ партиер кIэщакIо зыфэхъугъэ Iофтхьабзэхэм япхырыщынкIэ Iофыгъоу къэуцугъэхэм япхыгъэ зэIукIэ шъолъырхэм адашIыгъ.

Адыгеим ыцIэкIэ видеозэпхыныгъэ шIыкIэм тетэу зэIукIэм хэлэжьагъ Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат.

Джащ фэдэу мы Iофтхьабзэм къекIолIагъэхэм ахэтыгъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м иминистрэхэм я Кабинет хэтхэр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIорэм игенеральнэ директорэу Игорь Сырчиныр.

«Единэ Россием» и Тхьаматэ пэублэ гущыIэу къышIыгъэм къыщыхигъэщыгъ социальнэ газификацием ипрограммэ мы аужырэ илъэсхэмкIэ анахь мэхьанэшхо зиIэ партийнэ Iоф­тхьабзэхэм зэращыщыр, Урысыем и Президентэу Владимир Путинми ащ къызэрэдыригъэштагъэр.

Дмитрий Медведевым джащ фэдэу къыIуагъ социальнэ газификацием ипрограммэ хэгъэгум ишъолъыр пстэуми анахь ящыкIагъэу щытхэм зыкIэ зэращыщыр.

«ДжырэкIэ анахь ищыкIагъэу щытыр унэгъо мин пчъагъэмэ а амалыр нахь псынкIэу къызфагъэфедэшъуныр ары. Урысые Федерацием къыхэхьэгъэ шъо­лъырыкIэхэми а программэр алъыгъэIэсыгъэн фае. Унэхэм газыр ящэлIэгъэным иIофыгъо цIыфхэм ящыIэкIэ-псэукIи нахь къыIэтыщт. Ащ фэдэ IофшIэн а чIыпIэхэм ащагъэцэкIагъэп ыкIи амал зэриIэкIэ нахь псынкIэу ар ублэгъэн фае», — къыIуагъ Дмитрий Медведевым.

КъызэрэхагъэщыгъэмкIэ, «Единэ Россием» игъоу зэрилъэгъугъэм тетэу социальнэ газификацием илъэхъан фэгъэ­кIотэныгъэ зиIэхэм IэпыIэгъу ятыгъэнымкIэ Iофтхьабзэхэм нахь зарагъэушъомбгъущт. Хэгъэгум и Президент газ оборудованиер ащэфыным пае фэгъэкIотэныгъэ зиIэ куп гъэнэфагъэхэм сомэ мини 100-м нахь мымакIэу субсидиехэр аратынхэу пшъэрылъ афишIыгъ.

Урысые Федерацием и Вице-премьерэу Александр Новак къызэгущыIэм къызэрэхигъэщыгъэмкIэ, газым епхыгъэ лъэIу мин 790-рэ фэдиз къаIэкIэхьэгъах, зэзэ­гъыныгъэ мин 724-рэ адашIыгъ. Илъэсэу къихьащтымкIи Александр Новак программэм къыпкъырыкIырэ пшъэрылъхэр къыгъэнэфагъэх.

«ПIэлъэ гъэнэфагъэ имыIэу программэр лъагъэкIотагъ Президентым уна­шъоу ышIыгъэм тетэу. ХапIэхэм газыр ящэлIэгъэнымкIэ пшъэрылъхэр агъэнэфа­гъэх, еджапIэхэми, медицинэ учреждениехэми атегъэпсыхьагъэу а программэм зырагъэушъомбгъугъ», — къыIуагъ Урысые Федерацием и Правительствэ и Тхьаматэ игуадзэ.

Шъолъырхэм ыкIи ве­домствэ зэфэшъхьафхэм япащэхэм а программэм тегъэпсыхьэгъэ IофшIэнэу зэшIуахырэм фэгъэхьыгъэу къаIотагъ.

ЗэIукIэм ыуж Адыгеим и ЛIышъхьэ АР-м иминистрэхэм я Кабинет, депутатхэм, чIыпIэ подразделениеу «Газпромым» иIэм ипащэхэм апашъхьэ къыгъэуцугъэ пшъэрылъхэр зытегъэпсыхьагъэхэр рес­публикэм программэм къыщыдэлъытэгъэ Iофтхьабзэхэр тапэкIи гъэцэкIагъэ щы­хъунхэр ары.

«Партиеу «Единэ Россиер» кIэщакIо зыфэхъугъэ ыкIи Президентэу Владимир Путиным зыдыригъэштэгъэ социальнэ газификацием ипрограммэ унэхэм ягъэ­фэбэн пыутэу къафыдэкIыным, цIыфхэм ящыIакIэ нахьышIу шIыгъэным иамал къаритыщт. ФэгъэкIотэныгъэ зиIэ цIыф купхэм, мыхэм ахэхьэх хэушъхьафыкIыгъэ дзэ операцием хэлажьэхэрэри, газ оборудованиер къызIэкIагъэхьаным пае субсидиехэр аратыщтых, унагъом имылъку нахь кIиугъоенымкIи ащ ишIуагъэ къэкIощт. Программэм игъэцэкIэн екIо­лIакIэу фыряIэм къыкIырагъэчы хъущтэп, чэзыу гъэнэфагъэхэмкIэ гъунапкъэхэри дэх имыIэу къыдэлъытэгъэнхэ фае», — къыIуагъ КъумпIыл Мурат.

НепэкIэ республикэм газификацием иIоф процент 94,6-рэ фэдизкIэ щыгъэцэкIагъэ хъугъэ. Графикхэм атетэу псэупIи 179-мэ яхэпIэ мини 5,4-м ехъумэ газыр алъыгъэIэсыгъэн фае, мыхэм ахэхьэх «дачнэ товариществэкIэ» за­джэхэрэм афэдэу 15. Газ хъытыухэм апышIэгъэнхэм пае зэзэгъыныгъэ мини 5-м ехъу зэдашIыгъах.

АР-м и ЛIышъхьэ ипресс-къулыкъу