Республикэм и ЛIышъхьэу КъумпIыл Мурат Адыгеим ипрокуратурэ изэIукIэу Урысыем ипрокуратурэ зызэхащагъэр илъэс 301-рэ зэрэхъурэм фэгъэхьыгъэм тыгъуасэ хэлэжьагъ.

Джащ фэдэу Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м ипрокурорэу Игорь Шевченкэр, АР-м и МВД, щынэгъочъэнымкIэ Федеральнэ къулыкъум АдыгеимкIэ и ГъэIорышIапIэ, АР-м и Апшъэрэ хьы­кум, пщыныжь ягъэхьыгъэнымкIэ Федеральнэ къулыкъум АР-мкIэ и ГъэIорышIапIэ, хьыкум приставхэм я Федеральнэ къулыкъу АР-мкIэ и ГъэIорышIапIэ, Росгвардием АР-мкIэ и ГъэIорышIапIэ, Адыгеим и Арбитраж хьыкум, Урысыем и Следственнэ комитет АР-мкIэ иследственнэ гъэIорышIапIэ япащэхэр, прокуратурэм иветеранхэр.

ЮстициемкIэ я 2-рэ класс зиIэгъэ къэралыгъо упчIэжьэ­гъоу, 1988-рэ илъэсым къыщегъэжьагъэу 2007-рэ илъэсым нэс республикэм ипрокурорэу щытыгъэ, цIыфым ифитыныгъэ­хэмкIэ Уполномоченнэу АР-м щыIэгъэ Михаил Прихленкэм имыжъобгъу мы мафэм къызэ­Iуа­хыгъ. Iофтхьабзэм къекIолIа­гъэхэм прокуратурэм иуцуни, ихэхъоныгъи иIахьышхо ащ зэрахишIыхьагъэр, республикэм ихэбзэгъэуцугъэхэр нахьышIу шIыгъэнхэм ишъыпкъэу зэрахэ­лэжьагъэр къыхагъэщыгъ. Михаил Прихленкэм иунагъо исхэм республикэми, ведомствэми япащэхэм «тхьашъуегъэпсэу» араIуагъ ятэ зэращымыгъуп­шэрэм ыкIи ащ лъытэныгъэ зэрэфашIырэм афэшI.

ЗэIукIэр къызэIуахыным ыпэкIэ Урысыем и Генеральнэ прокурорэу Игорь Красновыр АР-м ипрокуратурэ иIофышIэхэм къафэгушIуагъ. Ведомствэм Iоф щызышIэхэрэм гъэхъагъэу яIэ­хэр ащ къыхигъэщыгъ, мы илъэ­сымкIэ агъэцэкIэн фэе пшъэ­рылъхэр къафигъэнэфагъэх.

Iофтхьабзэм хэлажьэхэрэм зафигъазэзэ, Адыгеим и ЛIышъхьэу КъумпIыл Мурат прокуратурэм иIофышIэхэми иветеранхэми ясэнэхьат епхыгъэ мэфэкIымкIэ къафэгушIуагъ. Хабзэм игъэпытэни, цIыфхэм яфе­дэхэр цыхьэшIэгъоу къэухъумэгъэнхэми ведомствэм иIахь зэрахишIыхьэрэр республикэм ипащэ къыхигъэщыгъ.

«Хэгъэгум и Президентэу Владимир Путиным зэрэхигъэу­нэфыкIырэмкIэ, «прокуратурэм хэбзэухъумэкIо къулыкъухэр яIофшIэнкIэ егъэгъуазэх, зэхэ­щэ­гъэ бзэджэшIагъэм, экстремизмэм, къолъхьэ тын-Iыхыным ягъогупэ пебзыкIы, лъэпкъ проектхэм апае бюджет мылъкоу къатIупщырэр зэрагъэфедэрэм гъунэ лъефы». Адыгэ Республикэм ипрокуратурэ иIофышIэхэм къатефэрэр агъэцакIэ, пшъэрылъэу къафагъэуцурэр дэгъоу зэшIуахы», — къы­Iуагъ КъумпIыл Мурат.

Республикэм и ЛIышъхьэ къулыкъум иветеранхэми, дэгъоу Iоф зышIэгъэ, ведомствэм ихэхъоныгъэ зиIахьышхо хэзы­шIыхьэгъэ пстэуми «тхьашъуегъэпсэу» ариIуагъ. Республикэм ипрокурорщтыгъэ Михаил Прих­ленкэм къытегущыIэ зэхъум, общественнэ зэгурыIоныгъэр республикэм къыщыухъумэгъэнымкIэ, хабзэр амыукъонымкIэ ащ гъэхъэгъэшхохэр зэриIагъэр КъумпIыл Мурат шъхьафэу хигъэунэфыкIыгъ.

«Михаил Прихленкэр зэращымыгъупшэрэр, мыжъобгъу ащ зэрэфагъэуцугъэр лъэшэу си­гуап. Ащ фэдэ цIыфхэр джыдэдэм прокуратурэм Iоф щызышIэхэрэмкIэ щысэтехыпIэшIоу зэрэщытыщтхэм сицыхьэ телъ», — къыIуагъ КъумпIыл Мурат.

Джащ фэдэу республикэм и ЛIышъхьэ прокуратурэм гъэрекIо гъэхъэгъэшIухэу ышIыгъэхэр къыхигъэщыгъэх. Ау джыри бзэджэшIагъэхэр икъоу зэхэфыгъэнхэм, лъэпкъ джэгъогъуныгъэр кIэзыгъэблы зышIоигъохэм апэуцужьыгъэным, социальнэ фитыныгъэхэр къэухъумэгъэнхэм, IофшIэнымкIэ хэбзэгъэуцугъэхэр къызэрэдалъытэхэрэм гъунэ лъыфыгъэным, предпринимательхэм яфитыныгъэхэм якъэухъумэн, бизнесым пэры­охъу фэмыхъунхэм нахь лъэшэу анаIэ атырагъэтын зэрэфаер ащ къыIуагъ.

Хэгъэгум и Президент къыгъэуцугъэ пшъэрылъхэр агъэцакIэхэзэ, цIыфхэм яфитыныгъэхэмрэ яшъхьафитыныгъэрэ къэухъумэгъэнхэм, хабзэм дэ­хыхэрэм ягъогупэ псынкIэу пы­бзыкIыгъэным мэхьанэшхо зэряIэр КъумпIыл Мурат къыхигъэщыгъ. Республикэм ипащэ лъэныкъо зэфэшъхьафхэм, хэбзэ Iахь къулыкъухэри, бюджетри зэрахэтхэу, хабзэр къызэращыдалъытэрэм гъунэ зэ­-рэ­лъыфыгъэн фаер къыхигъэ­щыгъ.

«Прокуратурэм иIофышIэхэм яIофшIэн дэгъоу зэхащэнэу, мы ведомствэм хэбзэ къулыкъухэм зэдэлэжьэныгъэу адыриIэр тапэкIи нахь ыгъэпытэнэу, прокуратурэм зэпхыныгъэ пытэ зэрэдытиIэм ишIуагъэкIэ респуб­ликэм гъэхъагъэ хэлъэу хэхъоныгъэ ышIынэу сэгугъэ», — къыIуагъ КъумпIыл Мурат.

Джащ фэдэу зэIукIэм къыщыгущыIагъэх АР-м ипрокурорэу Игорь Шевченкэр, АР-м и Къэ­ралыгъо Совет — Хасэм и Тхьаматэу Владимир Нарожнэр, АР-м и Апшъэрэ хьыкум итхьаматэу Шумэн Байзэт.

ЗэIукIэм икIэух АР-м ипрокуратурэ иIофышIэхэу гъэрекIо гъэхъэгъэшхохэр зышIыгъэхэм АР-м и ЛIышъхьэ ирэзэныгъэ тхылъхэр, юбилей медалэу «АР-р зызэхащагъэр илъэси 100 хъугъэ» зыфиIорэр, ведомствэ тынхэр, АР-м и Къэралыгъо Совет – Хасэм ищытхъу тхылъхэмрэ ирэзэныгъэ тхылъхэмрэ афагъэшъошагъэх.

АР-м и ЛIышъхьэ ипресс-къулыкъу