Хабзэ зэрэхъугъэу, щылэ мазэм и 12-р Урысые Федерацием ипрокуратурэ иIофышIэ и Мафэу хэтэгъэунэфыкIы. Къэралыгъом щыIэкIэ тэрэз илъынымкIэ мы къулыкъум мэхьанэшхо иI. Сыд фэдэрэ лъэхъани прокурорхэм япшъэрылъ шъхьаIэр хабзэр, цIыфхэм яфитыныгъэхэр ыкIи яшIоигъоныгъэхэр къэухъумэ­гъэнхэр ары.

Адыгеим ипрокуратурэ пэщэныгъэ дызэрахьагъ ыкIи непи чанэу Iоф ашIэ опытышхо зыIэкIэлъ, зисэнэхьат хэшIыкIышхо фызиIэ прокурорхэм. КъулыкъушIэхэм япшъэрылъхэр зэрифэшъуашэу агъэцэкIэнхэмкIэ, шIуа­гъэ къытэу IофшIэныр зэшIуахынымкIэ амалышIухэр аIэкIэлъых. Прокурорхэм яIофшIэнкIэ анахь шъхьаIэр зекIокIэ-шIыкIэ тэрэз ахэлъыныр, ренэу яшIэныгъэхэм ахагъэхъоныр, япшъэрылъхэм язэшIохынкIэ шIыкIакIэу щыIэхэр къызфагъэфедэнхэр ары.

2022-рэ илъэсым АР-м ипрокуратурэ икъулыкъу­шIэхэр лъыплъэн IофшIэным ылъэныкъокIэ хэбзэ­гъэуцугъэм игъэцэкIэн чанэу дэлэжьагъэх, шIокI имыIэу хабзэр ыкIи рэхьатныгъэр къаухъумагъэх.

Тикъэралыгъо ипащэ ыкIи Урысыем и Генеральнэ прокурор прокуратурэм ылъэныкъокIэ пшъэрылъхэр къагъэуцугъэх — бзэджашIэхэм ыкIи къолъхьэ тын­-Iыхыным ябэныгъэнхэмкIэ хэбзэухъумэкIо къулы­къухэм зэдэштэныгъэ яIэным мэхьанэшхо етыгъэныр, ащ нэмыкIэу цIыфхэм ясоциальнэ ыкIи IофшIэн фи­ты­ныгъэхэр, предпринимательхэм яшIоигъоныгъэхэр къэухъумэгъэнхэр, джащ фэдэу хэбзэгъэуцугъэр амыукъоу лъэпкъ проектхэм ягъэцэкIэн анаIэ тырагъэтыныр.

Адыгэ Республикэм ипрокуратурэ иIофышIэхэм шъыпкъагъэ, гуетыныгъэ ыкIи IэпэIэсэныгъэ ин ахэлъэу япшъэрылъхэр зэрагъэцакIэрэм фэшI инэу сафэраз.

Урысые прокуратурэм ыныбжь илъэс 300 зэрэ­хъурэм фэшI сигуапэу сышъуфэгушIо! Анахьэу тиветеран лъапIэхэм шъхьэкIэфэныгъэ ин афэсэшIы. Прокуратурэм игъэпсын ыкIи ащ изэтегъэуцон ветеранхэм яIахьышхо хэлъ. ШIушIагъэу шъо шъуиIэм ихьатыркIэ непэ прокуратурэм IэпэIэсэныгъэ ин зыхэлъ ыкIи шъыпкъагъэр зигъогогъу прокурорхэр иIэх, ащ тырэгушхо.

ШъуигукIуачIэ къыщымыкIэу, псауныгъэ пытэ шъуи­Iэу, шъуиунагъохэм хъярыр къябэкIэу, шIоу щыIэр къыжъудэхъоу шъущыIэнэу шъуфэсэIо!

АР-м ипрокурорэу, юстициемкIэ я 2-рэ класс зиIэ къэралыгъо советникэу И. С. Шевченкэр.