Урысые прокуратурэм иIофышIэхэм я Мафэ зыщыхагъэунэфыкIырэм зэфэхьысыжьхэр ашIых ыкIи ведомствэм иветеранхэр агъашIох, джащ фэдэу Iоф къадэзышIагъэхэу нэмыкI шъолъырхэм къулыкъур ащызыхьыхэрэр ащыгъупшэхэрэп, афэгушIох.

Къалэу Смоленск и Промышленнэ район ипрокурорэу Мыгу Артур Хъызыр ыкъор, 2019-рэ илъэсым гъэтхапэм къыщегъэжьагъэу 2021-рэ илъэсым бэдзэогъум нэс Мыекъуапэ ипрокурорэу Iоф ышIэзэ иIофшIэн хэшIыкIышхо фыриIэу хабзэр ыкIи хэбзэ рэхьатныгъэр къэухъумэгъэнымкIэ къулыкъум иIахьышIу зэрэхишIыхьагъэм фэшI УФ-м и Генеральнэ прокурор бгъэхалъхьэу «УФ-м иIофышIэ гъэшIуагъ» зыфиIорэ тын лъапIэр къыфигъэшъошагъ. 2005-рэ илъэсым шышъхьэIум къыщегъэжьагъэу А. Мыгум АР-м ипрокуратурэ икъулыкъухэм IэнэтIэ зэфэшъхьафхэр ащиIыгъэу Iоф ышIагъ, квалификацие ин ыкIи IэпэIэсэныгъэшхо зыIэкIэлъ юристэу зыкъыгъэлъэгъуагъ. Щытхъу хэлъэу иIофшIэн зэригъэцакIэрэм фэшI мызэу-мытIоу УФ-м и Генеральнэ прокурор ыкIи АР-м ипрокурор тын лъапIэхэмкIэ къыхагъэщыгъ. Я 3-рэ степень зиIэ тамыгъэу «За верность закону», «АР-м и Заслуженнэ юрист» зыфиIохэрэр къыфагъэшъошагъ. АР-м ипрокуратурэ ипащэ ыкIи иIофышIэхэм агу къадеIэу Артур Хъызыр ыкъом тын лъапIэу къыфагъэшъошагъэмкIэ фэгушIох ыкIи тапэкIи гъэхъагъэхэр ышIызэ лъыкIотэнэу фэлъаIох. НэкIубгъор зыгъэхьазырыгъэр КIАРЭ Фатим.