Адыгеим и ЛIышъхьэу КъумпIыл Мурат АР-м ими­нистрэхэм я Кабинет хэтхэмрэ муниципальнэ об­разованиехэм япащэхэмрэ адыриIэгъэ зэIукIэ­гъум социальнэ ыкIи инфраструктурнэ псэуалъэхэм яшIынрэ язэтегъэпсыхьанрэ щатегущыIагъэх.

Мы илъэсым псэолъакIэхэр ашIыщтых, джащ фэдэу агъэфедэхэрэр игъэкIотыгъэу агъэцэкIэжьыщтых ыкIи зэтырагъэ­псыхьащтых. Ахэм ахэхьэх еджапIэхэр, кIэлэцIыкIу IыгъыпIэхэр, культурэм иунэхэр, IэзапIэхэр, спорт комплексхэр, инженер, транспорт ыкIи инфраструктурнэ псэуалъэхэр. Мыхэм ащыщых промышленностымрэ зекIонымрэ къахиубытэхэрэри. IофшIэнхэм пстэумкIи сомэ миллиарди 6,6-рэ фэдиз атефэщт.

Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур къызэриIуагъэмкIэ, лъэпкъ проектхэм, къэралыгъо программэхэм атегъэпсыхьагъэу а проектхэр мы илъэсым гъэцэкIагъэ хъущтых, инфраструктурнэ бюджет чIыфэхэри ащкIэ къызфагъэфедэщтых.

Республикэм и ЛIышъхьэ къяджагъ амал зэриIэкIэ бюджет къэкIуапIэхэр нахь шIуагъэ хэлъэу агъэфедэнхэу. Анахьэу ынаIэ зытыригъэтыгъэр федеральнэ, республикэ ыкIи муниципальнэ нэшанэ зиIэ IофтхьабзэхэмкIэ кIэу агъэпсыгъэ е агъэкIэжьыгъэ псэуалъэхэу социальнэ, культурнэ нэшанэ зиIэхэр ары.

«Творческэ ыкIи театральнэ коллектив шъхьаIэу тиIэхэм яIофшIэнкIэ къыдалъытэн фае культурэм имуниципальнэ унэхэу ядгъэшIыгъэхэм, дгъэ­кIэжьыгъэхэм къэгъэлъэгъонхэр нахьыбэу ащызэхэщэгъэнхэр. УчреждениякIэхэм Iофтхьэбзэ гъэшIэгъонхэу цIыфхэм гъэпсын кIуачIэ, гуетыныгъэ къахэзылъхьащтхэр ащызэхэщэгъэнхэ фае», — къыIуагъ КъумпIыл Мурат.

Анахьэу хэушъхьафыкIыгъэу респуб­ликэм ипащэ анаIэ зытыраригъэдзагъэ­хэм ащыщых къыхахыгъэ подряднэ организациехэм Iоф зэрадашIэщт шIыкIэр. Ахэм япшъэрылъхэр зэрагъэцакIэхэрэр пхъашэу уплъэкIугъэным мэхьанэшхо зэриIэр ащ къыхигъэщыгъ. Лъэпкъ проектхэмрэ къэралыгъо программэхэмрэ къыдалъытэхэрэр гъэцэкIагъэ хъунхэм пае игъом уплъэкIун-зэхэфын Iофтхьабзэхэр зехьэгъэнхэми анаIэ тыраригъэдзагъ.

АР-м и ЛIышъхьэ ипресс-къулыкъу