Урысые Iофтхьабзэу «Елка желаний» зыфиIорэр ыкIэм фэкIо. Шъугу къэдгъэкIыжьын, Урысые Федерацием и Президентэу Владимир Путиныр кIэщакIо зыфэхъугъэ а Iофтхьабзэр 2018-рэ илъэсым къыщегъэжьагъэу зэхащэ.

Президент платформэу «Россия — страна возможностей» зыфиIорэм къы­хиубытэрэ шIушIэ проектэу «Мечтай со мной» зыцIэр ары ащ изэхэщакIор.

Хабзэ зэрэхъугъэу, Адыгеим и ЛIышъхьэу КъумпIыл Мурат Iофтхьабзэм хэлэжьагъ. Кремлым щагъэуцугъэ елкэм Адыгеим и ЛIышъхьэ республикэм икIэлэцIыкIухэм къагъэхьыгъэ открыткэхэр зэкIэ къыпихыгъэх ыкIи зыкIэхъо­псыхэрэр афигъэцэкIагъ. ГущыIэм пае, Мыекъуапэ щыщэу илъэси 7 зыныбжь Тимур телескопым кIэхъопсы, псэупIэу Каменномостскэм щыщ Мариеу илъэси 10 зыныбжьыр конструктор фай, Мые­къуапэ щыпсэурэ илъэс 12 зыныбжь Тимофей троллейбусыр ыгъэIорышIэ шIоигъу.

ШIушIэ проектым къыхэлэжьагъэх АР-м иминистрэхэм я Кабинет хэтхэр, депутатхэм ащыщхэр, муниципалитетхэм япащэхэр, «Единэ Россием» хэтхэр, бизнесым илIыкIохэр. Сабыибэ зэрыс ыкIи гъот макIэ зиIэ унагъохэм, сэнаущыгъэ зыхэлъ кIэлэцIыкIухэм, социальнэу мыухъумэгъэ цIыф купхэм ясабыйхэм – пстэумкIи кIэлэцIыкIу 200-м ехъумэ зыкIэхъопсыхэрэр афагъэцэкIагъэх.

КIэлэцIыкIухэм ащыщхэм шIухьафтынхэр къаратыгъахэх. Ахэр зэбгырыщыжьыгъэнхэмкIэ IэпыIэгъу къафэхъугъэх АР-м шIэныгъэмкIэ ыкIи гъэсэныгъэмкIэ и Министерствэ, Адыгеим иныбжьыкIэхэм я Ресурснэ гупчэрэ НыбжьыкIэхэм я Урысые Союз ишъолъыр организациерэ яволонтерхэр.

КIэлэцIыкIухэр нахьыбэрэмкIэ зы­фэягъэхэр ноутбукхэр, компьютерхэр, планшетхэр ыкIи смартфонхэр ары. Джащ фэдэу кIэлэцIыкIубэ зыкIэхъопсыгъэхэм ащыщых кушъхьэфачъэхэр, батутыр, столкIыIу теннисыр, цифрэ пианинэр, гитарэр, конструкторыр, сурэтшIыным ищыкIэгъэ пкъыгъохэр, зэрыдэхэрэ машинкэр, спиннингыр ыкIи нэмыкIхэр.

АР-м и ЛIышъхьэ ипресс-къулыкъу