КIымафэм иятIонэрэ мазэу щылэ мазэм имэфипшI пыкIыгъ. ГурытымкIэ мазэм къыкIоцI температурэр ыкIи ощх-осэу къехыщтыр шапхъэхэм афэдизыщтых.

КъызыщыучъыIырэ уахътэм мылыр чъыгхэм ыкIи электрорыкIуапIэхэм апишIыхьащт. Гъогухэр цIэнлъагъоу къыхэкIыщт. Къушъхьэхэм лъэшэу ос къащесыщт, ащ къыхэкIэу ос зэхэлъыр къецохъохыным ищынагъо щыIэщт.

Щылэ мазэм къыздихьыщтхэм тащигъэгъозагъ гидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым.

Апэрэ мэфипшIым чэщым чъыIэр градуси 3 фэдизыгъ, къыхэкIыгъ чъыIэр градуси 8-м нэсэуи. Мафэм фабэр градуси 5-м, градус 13-м кIахьэуи хъугъэ.

ЯтIонэрэ мэфипшIыр. Чэщхэр чъыIэ­щтых градуси 2 — 12-м нэсэу, мафэхэм чъыIэр градуси 3-м кIэхьащт, фабэр градуси 6-м зыщынэсыщтхэри къыхэ­кIыщт.

Ящэнэрэ мэфипшIыр. Щылэ мазэм икIэухым нахь къэучъыIыщт, чэщым чъыIэр градус 13-м, мафэм чъыIэр градуси 6-м анэсыщт. КъыхэкIыщтых мафэхэр фабэхэр градуси 5-м кIахьэу.

Къушъхьэхэм температурэр градуси 6 — 8-кIэ нахь ащычъыIэщт.

Щылэ мазэм псыхъохэм адэт псыр шапхъэхэм атетыщт, къызщигъэжъурэ уахътэм ыкIи лъэшэу къызещхыкIэ, къы­дэкIоещт.

Мы мазэм иапэрэ мэфипшIым бжы­хьасэхэм макIэу ахэхъуагъ. Ахэм чъыIэр къягоощтэп.

КIАРЭ Фатим.