БлэкIыгъэ зыгъэпсэфыгъо мафэхэм зекIохэр Адыгеим бэу къихьагъэх. Илъэсыжъым икIэух ыкIи ИлъэсыкIэм икъихьагъу охътэ зэблэкIыгъом осыр зэрэмэкIагъэм ыкIи сымаджэхэрэм япчъагъэ зэрэхахъощтыгъэм къыхэкIэу щылэ мазэм иапэрэ мафэхэм шъолъырым къэкIуагъэр мэкIагъэ. Ау къушъхьэхэм къазэрэщесыгъэм тетэу зекIохэм япчъагъэ къыхэхъуагъ.

Адыгэ Республикэм зекIонымкIэ ыкIи зыгъэпсэфыпIэхэмкIэ и Комитет итхьаматэ игуадзэу Джарымэ Бэлэ къызэрэтиIуагъэмкIэ, блэкIыгъэ илъэсым мыщ фэдэ иуахътэ Адыгеим зекIо мини 150-рэ къихьэгъагъ. Мыгъэ, пэшIорыгъэшъэу зэрагъэнэфэгъагъэм фэдэу, зекIоу къи­хьагъэхэм япчъагъэ мини 100-м кIэ­хьагъ. «2023-рэ илъэсым икIымафэ гужъуагъэ нахь мышIэми, зэлъашIэрэ зекIо чIыпIэу тиIэхэм — Лэгъонакъэ икъушъхьэтх, ащ гъэлъэгъопIэ чIыпIэу иIэхэм, Гъозэрыплъэ, ХъымыщкIэй, псэупIэу Дахъо цIыфыбэ якIолIагъ, — хигъэунэфы­кIыгъ Джарымэ Бэлэ. — Краснодар иаэропорт зэрэзэфэшIыгъэми емылъытыгъэу, шъо­лъыр зэфэшъхьафхэм къарыкIыгъэ зе­кIохэр багъэ».

ПсэупIэу Дахъом къыгот шъоф гъэхъу­нэу «Графская поляна» зыфиIорэм тет зекIо зыгъэпсэфыпIэм иIофышIэу Марина Сень къызэрэтиIуагъэмкIэ, блэкIыгъэ зыгъэпсэфыгъо мафэхэм цIыфыбэ къя­олIагъ. Ростов-на-Дону, Ставрополь, Москва, Украинэм къикIыжьыгъэхэу ти­шъо­лъыр щыпсэухэрэр ахэм бэу ахэтыгъэх. Атырэ унэхэр нэкIэу щытыгъэхэп.

«Зыгъэпсэфыгъо мафэхэм ащыщ кIэпсэ гъогоу Унэ-КIожь Iуашъхьэм удэ­зыщаерэм зекIо нэбгырэ минрэ ныкъорэ рыкIуагъ», — игуапэу хигъэунэфы­кIыгъ Маринэ.

Компаниеу «Ошъутен — тур» зыфиIорэм ипащэу Бэрзэдж Мурат къызэриIуагъэмкIэ, Мышъэкъо къушъхьэ тIуакIэм щыбыбы зышIоигъо зекIохэри къахэкIыгъэх.

«Экстрим-паркым цIыфхэр бэу къы­дэхьагъэх, ау къызэресыгъэм тетэу зе­кIохэм къушъхьэхэм алъэныкъокIэ нахь зыратыгъ. Джыри мы тхьамафэми фэбэщтмэ, къэблэгъэрэ зыгъэпсэфыгъо­хэми зекIохэр къэкIощтых. Тэ сыдигъокIи ахэм тапэгъокIынэу тыхьазыр», — еIо Мурат.

Джащ фэдэу зекIохэр Адыгеим къызихьэхэкIэ, анахь якIасэхэм ащыщ псы фабэхэр зыхэт зыгъэпсэфыпIэхэр.

Щылэ мазэм и 6 — 7-м къызесым, зекIохэм Партизан шъоф гъэхъунэу Гъозэрыплъэ лъэныкъом щыIэр гуIэтыпIэ афэхъугъ. Нэгъой Iуашъхьэм пэIулъ бгы ехыпIэхэм IажэхэмкIэ ягуапэу зыкъырагъэцIэнлъэхыщтыгъ. Ос къызе­сым къушъ­хьэ гъогухэр зэрагъэ­къэбзагъэхэм ишIуагъэкIэ шIоигъоныгъэ зиIэхэр зы­гъэпсэфыпIэхэм якIолIэнхэ алъэкIыгъ.

Тэу Замир.