Медицинэ IэпыIэгъу ягъэгъотыгъэнымкIэ кол-гупчэм цIыфхэм зэпхыныгъэу адыриIэр нахьышIу шIыгъэным фэшI иIофшIакIэ лъэхъаным диштэу гъэпсыгъэн фаеу Адыгеим и ЛIышъхьэу КъумпIыл Мурат ылъытагъ ыкIи чIыпIэ 80-мэ ателъытэгъэ гупчэр къызэIуахыгъэу Iоф зишIэрэр илъэс заулэ хъугъэ.

Мы уахътэм медицинэ IэпыIэгъум фэгъэзэгъэ оператор 50-м ехъумэ мафэ къэс, пчэдыжьым сыхьатыр 8-м къыщегъэжьагъэу пчыхьэм 8-м нэс, Iоф щашIэ. Зы мафэм къыкIоцI упчIэ мини 4-м ехъу къафагъазэ.

МэфэкI мафэу блэкIыгъэхэм мы гупчэм иIофшIэн нахь агъэ­мэкIагъэу щытыгъ, джы щылэ мазэм и 9-м къыщегъэжьагъэу кол-гупчэу «122-р» зыпкъ ит иIофшIакIэм техьажьыгъ. IофшIэгъу мафэхэм пчэдыжьым сыхьатыр 8-м къыщегъэжьагъэу пчы­хьэм 8-м нэс, зыгъэпсэфыгъо мафэхэм пчэдыжьым сыхьатыр 8-м къыщегъэжьагъэу мафэм сыхьатыр 2-м нэс шъуиупчIэхэр афэжъугъэзэн шъулъэкIыщт.

Шъугу къэдгъэкIыжьын, зыкI гупчэм иномерэу 122-мкIэ IэпыIэгъоу жъугъотыщтхэр:

— врачым шъуиунэ шъукъе­джэныр (кIэлэцIыкIухэми, на­хьыжъхэми апае);

— врачхэм адэжь зыхэшъутхэныр: терапевтым, отоларингологым, офтальмологым, акушер-гинекологым, стоматологым, хирургым, фтизиатрэм, психиатр-наркологым, кIэлэцIыкIу психиатрэм;

— медицинэ гупчэхэу «Мой доктор», «Атлант», «Вертеба» зыфиIохэрэм яневролог дэжь зыхэптхэныр;

— COVID-19-м фэгъэхьыгъэ упчIэу шъуиIэхэр афэжъугъэзэнхэр;

— частичнэ мобилизацием епхыгъэ упчIэхэр яшъутынхэр;

— бжыхьэ дзэ дэщыгъом фэгъэхьыгъэ упчIэхэр афэжъугъэзэнхэр.