КIэлэпIупкIэр игъом зымытыхэрэм язекIуакIэ зэрэмытэрэзыр агурыгъэIогъэным, зытефэхэрэм пшъэдэкIыжь ягъэхьыгъэным хьыкум приставхэм анаIэ тет. Пшъэрылъхэр зэрагъэцакIэрэм ежь ышъхьэкIэ лъэплъэ республикэм ихьыкум пристав шъхьаIэ.

Хэбзэгъэуцугъэм мы лъэныкъомкIэ къыдилъытэрэ шапхъэхэр агъэлъэшы­гъэх, ны-тыхэу зипшъэрылъхэр зымыгъэцакIэхэрэм уголовнэ Iофхэр къапагъэтаджэхэу къыхэкIы. Ащ Iофыр нэшъумыгъэсэу, кIэлэпIупкIэр игъом ыкIи икъоу шъутынэу хьыкум приставхэр къышъоджэх.

Хьыкум приставхэм яфедеральнэ къулыкъу и ГъэIорышIапIэу Адыгэ Рес­публикэм щыIэм Iофтхьабзэу «Хьыкум приставхэм — кIэлэцIыкIухэм апае» зыфиIорэр илъэс къэс зэхещэ. КIэлэпIупкIэмкIэ чIыфэхэр къаIыхы­жьыгъэным фэшI зипшъэрылъхэр зымыгъэцэкIэрэ ны-тыхэм адэжь хьыкум приставхэр макIох, ахэм адэгущыIэх, язекIуакIэ зэрэмытэрэзыр агурагъаIо.

Сабыим ипIункIэ хэбзэгъэуцугъэм къыгъэнэфэрэ лъэныкъохэр зымыгъэцакIэхэрэм административнэ пшъэ­дэкIыжь зэрахьыщтым дакIоу, уголовнэ Iофи къафызэIуахын зэралъэкIыщтыр араIо. ЗэдэгущыIэгъухэм ахэлажьэх динлэжьхэр, муниципальнэ образованиехэм ялIыкIохэр, гурыт еджапIэхэм япащэхэр, журналистхэр, нэмыкIхэри.

Джащ фэдэу кIэлэпIупкIэр зымытыхэрэм Iоф зыщашIэрэ организациехэм ябухгалтериехэр хьыкум приставхэм ауплъэкIух, охътэ гъэнэфагъэм къэралыгъом икIынхэ зэрэфимытхэм фэгъэ­хьыгъэ унашъохэр ашIых, административнэ хэбзэукъоныгъэ зэрэзэрахьагъэм­кIэ протоколхэр зэхагъэуцох, уголовнэ Iофхэр къызэIуахых, чIыфэ зытелъхэм ямылъку арест тыралъхьэ, IофшIэпIэ чIыпIэ зимыIэхэм цIыфхэм IофшIапIэ ягъэгъотыгъэнымкIэ Гупчэм иучет хагъэуцох. Мы пстэуми пшъэрылъэу яIэр зы — сабыйхэм къатефэрэ кIэлэпIупкIэр игъом ыкIи бырсыр къыпымыкIэу къатыныр ары.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.