Кушъхьэфэчъэ спортым игупчэу охътакIэм диштэщтыр илъэситIум къыкIоцI Мыекъуапэ щагъэпсын агу хэлъ. ЗарагъэнафэрэмкIэ, ар Мыекъуапэ икъохьэпIэ лъэныкъо, спорткомплексэу «Ошъутенэм» дэжь щашIынэу щыт.

Шъугу къэдгъэкIыжьын, Урысые Федерацием и Правительствэ и Тхьаматэ игуадзэу Дмитрий Чернышенкэр Адыгеим къызэкIом, къалэм икъохьэпIэ лъэныкъо хэхъоныгъэу ышIын ылъэкIыщтхэм ынаIэ атыридзагъ. АР-м и ЛIышъхьэу КъумпIыл Мурат ащ къыфиIотагъ спорткомплексэу «Ошъутенэм» пэмычыжьэу районыкIэ агъэпсын гухэлъ зэряIэр.

АР-м и ЛIышъхьэ къыхигъэщыгъ мы чIыпIэм унакIэхэр зэрэщашIыхэрэм дакIоу, социальнэ инфраструктурэри зэрэщагъэпсыщтыр. Спортивнэ гимнастикэмрэ батутымрэ ягупчэ, кушъхьэ­фэчъэ спортым пылъхэр зыщагъэхьазырыщт чIыпIэр, унэгъуакIэхэр зыщызэ­гуатхэщт Ордэунэр, псауныгъэм икъэу­хъумэн фытегъэпсыхьэгъэ культурнэ гупчэр ащашIыщтых.

Джырэ уахътэм кушъхьэфэчъэ гупчэм ишIын рахъухьэ. Ар зыгъэуцущт организа­циер къыхэхыгъэнымкIэ зэнэкъокъу за­ха­щагъ. АшIыщт псэуалъэм хэтыщтых метрэ 250-рэ зикIыхьэгъэ велотрекыр, тIысыпIэ 1500-рэ зиIэщт трибунэхэр, спор­тивнэ еджапIэу нэбгырэ 400 зыщагъэ­хьазы­рыщтыр, фристайл-паркыр, памп-тре­кыр, чIыпIэ 450-рэ зиIэщт хьакIэщыр.