Лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытэгъэ шъолъыр проектэу «Псы къабз» зыцIэм ишIуагъэкIэ къуаджэу Гъобэкъуае псыугъоипIэ щашIыгъ, къоджэдэсхэмкIэ ар илъэсыкIэ шIухьафтын хъугъэ.

Адыгэ Республикэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, мы псэуа­лъэр кIэу ашIыгъ. Къуаджэм артезианскэ псыр къызычIащыщт псынитIу ща­тIыгъ, псыр зыщаугъоищт пэуалъэр агъэуцугъ, джащ фэдэу псыр зыукъэбзыщт Iэмэ-псымэр зычIэтыщт унэри къыпашIыхьагъ, псырыкIуапIэу къуаджэм щызэбгырыкIырэм ар епхыгъэу агъэпсыгъ ыкIи мы чIыпIэр къашIыхьагъ.

«Псэуалъэхэм яшIын пэIуагъэхьанэу сомэ миллион 19 къатIупщыгъагъ, зэкIэ IофшIэнхэр игъом ыкIи дэгъоу агъэцэкIагъэх», — къыIотагъ Адыгэ Респу­бликэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ энергоухъумэнымкIэ иотдел ипащэу Хъымыщ Тимур.

ГушIуагъо хъурэр, джыри Адыгеим изы псэупIэ дэсхэм псы къабзэ къаIэкIахьэу ИлъэсыкIэм зэрэтехьагъэхэр ары.